YSR Praja News : హైదరాబాద్: రాష్ట్ర ప్రభుత్వం చేపట్టనున్న కీలక కార్యక్రమాల నేపథ్యంలో ముఖ్యమంత్రి రేవంత్ రెడ్డి ఆదివారం మంత్రివర్గ సభ్యులతో ప్రత్యేక సమీక్షా సమావేశం నిర్వహించనున్నారు. సచివాలయంలో సాయంత్రం 4 గంటలకు జరగనున్న ఈ సమావేశంలో వచ్చే నెల డిసెంబర్ 8–9 తేదీల్లో ఫ్యూచర్ సిటీలో నిర్వహించబోయే ‘తెలంగాణ రైజింగ్ గ్లోబల్ సమ్మిట్’ ఏర్పాట్లపై విస్తృతంగా చర్చించే అవకాశం ఉంది.
సమ్మిట్ నిర్వహణకు సంబంధించి ఇండియన్ స్కూల్ ఆఫ్ బిజినెస్ (ఐఎస్బీ) సిద్ధం చేసిన సమగ్ర ప్రజెంటేషన్‌ను సీఎం పరిశీలించనున్నారు. దీనితో పాటు మంత్రుల మధ్య పనుల విభజన, బాధ్యతల కేటాయింపు వంటి అంశాలపై కూడా రేవంత్ నిర్ణయం తీసుకునే అవకాశమున్నట్టు సమాచారం.
సాయంత్రం జరగనున్న ఈ సమీక్ష అనంతరం ముఖ్యమంత్రి మీడియాతో మాట్లాడే అవకాశముందని అధికార వర్గాలు తెలుపుతున్నాయి.
ఇదిలా ఉంటే, శనివారం రోజున కూడా పలువురు మంత్రులు సీఎం రేవంత్‌ను కలిసి పలు అభివృద్ధి కార్యక్రమాలు, ప్రజా పాలన వారోత్సవాల నిర్వహణపై చర్చించారని తెలిసింది. సాగునీటి శాఖ మంత్రి ఉత్తమ్ కుమార్ రెడ్డి, రెవెన్యూ మంత్రి పొంగులేటి శ్రీనివాస్ రెడ్డి సహా పలువురు మంత్రులు ముఖ్యమంత్రితో సమావేశమై వివిధ విభాగాల ప్రగతి, ప్రజాభ్యున్నతి చర్యలపై వివరాలు అందించినట్టు సమాచారం.
