YSR Praja News Telugu : ఆంధ్రప్రదేశ్ రాష్ట్రానికి ముఖ్యమంత్రి నారా చంద్రబాబు నాయుడు రూపంలో ఒక ‘చంద్రగ్రహణం’ పట్టిందని, ఈ గ్రహణం రాష్ట్రాన్ని రాబోయే ఐదేళ్ల పాటు పట్టి పీడిస్తూనే ఉంటుందని వైఎస్సార్ కాంగ్రెస్ పార్టీ సీనియర్ నేత, తిరుమల తిరుపతి దేవస్థానం (టీటీడీ) మాజీ చైర్మన్ భూమన కరుణాకర్ రెడ్డి తీవ్ర స్థాయిలో విరుచుకుపడ్డారు. ఆదివారం నాడు ఆయన తిరుపతిలో ఏర్పాటు చేసిన మీడియా సమావేశంలో కూటమి ప్రభుత్వంపై, ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్ల తీరుపై నిప్పులు చెరిగారు. తనదైన శైలిలో పదునైన విమర్శలు గుప్పించారు.
టీడీపీ అంటే ‘తెలుగు దొంగల పార్టీ’
తెలుగుదేశం పార్టీ (టీడీపీ) విధానాలపై భూమన తీవ్ర స్థాయిలో మండిపడ్డారు. టీడీపీ అంటే ప్రజలకు సేవ చేసే పార్టీ కాదని, అది “తెలివిగా దోచుకునే పార్టీ” అని, స్పష్టంగా చెప్పాలంటే అది “తెలుగు దొంగల పార్టీ” గా మారిందని ఆయన ఎద్దేవా చేశారు. పార్టీ కార్యకర్తల ముసుగులో గ్రామాల్లో, పట్టణాల్లో రౌడీ మూకలను పెంచి పోషిస్తున్నారని, రాష్ట్రంలో శాంతిభద్రతలను గాలికి వదిలేశారని ఆయన తీవ్ర ఆగ్రహం వ్యక్తం చేశారు. మాజీ సీఎం వైఎస్ జగన్మోహన్ రెడ్డి ఐదేళ్ల పాలన “సంక్షేమం” అయితే, ప్రస్తుత కూటమి పాలన ప్రజల పాలిట “సంక్షోభం” అని ఆయన అభివర్ణించారు.
సూపర్ సిక్స్ మోసాలు – పథకాల వైఫల్యం
ఎన్నికల ముందు ఓట్ల కోసం ప్రజలను మభ్యపెట్టడానికి కూటమి అట్టహాసంగా ప్రకటించిన ‘సూపర్ సిక్స్’ పథకాలు అమలులో పూర్తిగా విఫలమయ్యాయని భూమన విమర్శించారు. అవి సూపర్ సిక్స్ కాదని, “సూపర్ సిక్స్ మోసాలు” అని మండిపడ్డారు. ఈ కూటమి ప్రభుత్వం ప్రజలను ఆదుకునే ప్రభుత్వం కాదని, నిండా ముంచే ప్రభుత్వమని రాష్ట్ర ప్రజలంతా ఇప్పటికే ఒక స్పష్టమైన నిర్ణయానికి వచ్చారని అన్నారు. ఆయన లేవనెత్తిన ప్రధాన వైఫల్యాలు:
ఆడబిడ్డ నిధి: ప్రతినెలా ఆర్థిక సాయం కింద ఇస్తామన్న ‘ఆడబిడ్డ నిధి’ ఏమైందని రాష్ట్రంలోని మహిళలు కన్నెర్రజేస్తున్నారని గుర్తుచేశారు.
నిరుద్యోగ భృతి: నిరుద్యోగ భృతి ఎక్కడని యువత రోడ్లెక్కి నిలదీస్తున్నారని పేర్కొన్నారు.
తల్లికి వందనం: బడికి వెళ్లే పిల్లల తల్లులకు ఇస్తామన్న ‘తల్లికి వందనం’ పథకాన్ని చంద్రబాబు ఉద్దేశపూర్వకంగానే ఎగ్గొట్టారని విమర్శించారు.
ఉచిత బస్సు ప్రయాణం: ఎంతో ఆర్భాటంగా చెప్పిన మహిళలకు ఉచిత బస్సు ప్రయాణం పథకం ‘ఫ్రీ బస్సు’ కాస్తా బస్సుల్లో ‘కస్సుబుస్సు’లా తయారైందని ఎద్దేవా చేశారు.
దీపం పథకం: పేదల కోసం ప్రకటించిన ఉచిత గ్యాస్ సిలిండర్ల ‘దీపం’ పథకం వారి పాలిట శాపంగా మారిందని, కేవలం గ్రాఫిక్స్తో గ్యాస్ కొడుతూ.. ఇంట్లో వెలగని దీపాన్ని చంద్రబాబు పేదలకు ఇస్తున్నారని ఎత్తిచూపారు.
అన్ని వర్గాలకు అన్యాయం.. విద్యారంగానికి గ్రహణం
చంద్రబాబు పాలనలో రాష్ట్రంలోని ఏ ఒక్క వర్గం కూడా సంతోషంగా, సంతృప్తిగా లేదని భూమన స్పష్టం చేశారు. రైతన్నలకు ఇది అత్యంత కష్టకాలమని, ప్రభుత్వానికి ఎవరైతే విరాళాలు ఇస్తున్నారో ఆ ‘చంద్రన్న దాతలకు’ మాత్రమే ఈ ప్రభుత్వంలో ‘సుఖీభవ’ అంటూ వ్యంగ్యాస్త్రాలు సంధించారు. ప్రభుత్వ ఉద్యోగులకు ఎన్నికల ముందు ఎన్నో మాయమాటలు చెప్పి, తీరా అధికారంలోకి వచ్చాక వారిని నిండా ముంచారని, ఉద్యోగులను ఈ ప్రభుత్వం కేవలం బానిసలుగా చూస్తోందని ఆగ్రహం వ్యక్తం చేశారు.
గత ప్రభుత్వంలో ఎంతో అభివృద్ధి చెందిన విద్యారంగం.. ఈ కూటమి పాలనలో అత్యంత హీన దశకు పడిపోయిందని ఆవేదన వ్యక్తం చేశారు. ప్రభుత్వ పాఠశాలలు పూర్తిగా నిర్వీర్యమయ్యాయని, ఆ బడులకు కూడా చంద్రగ్రహణం పట్టిందని విమర్శించారు.
‘తాగుదాం ఆంధ్రా’ గా మారిన అప్పుల ప్రదేశ్
రాష్ట్రాన్ని అభివృద్ధి పథంలో నడిపిస్తానని గొప్పలు చెప్పిన చంద్రబాబు, ఆంధ్రప్రదేశ్ను పూర్తిగా “అప్పుల ప్రదేశ్” గా మార్చేశారని భూమన దుయ్యబట్టారు. రాష్ట్రంలో ఎక్కడ చూసినా మద్యం ఏరులై పారుతోందని, రాష్ట్రాన్ని “తాగుదాం ఆంధ్రా” గా మార్చేశారని మండిపడ్డారు. గతంలో ఇంటింటికి మద్యం అన్నట్లు విమర్శలు ఉంటే, ఇప్పుడు ఏకంగా వీధివీధికి బెల్ట్ షాపులు తెరిచి ప్రజల జీవితాలతో, పేదల కుటుంబాలతో చెలగాటం ఆడుతున్నారని ఆరోపించారు. చంద్రబాబు నాయుడు తన డబ్బా తాను కొట్టుకోవడంలో సిద్ధహస్తుడని, “గోల్కొండ కోటను కట్టింది నేనే, సముద్రాన్ని తవ్వించింది నేనే” అని కూడా ఆయన ఎలాంటి సిగ్గు, సంకోచం లేకుండా ప్రజలకు అబద్ధాలు చెప్పగలరని భూమన ఎద్దేవా చేశారు.
వెన్నుపోటు రాజకీయాలు.. లోకేష్ సేవలో పవన్
చంద్రబాబు నాయుడు రాజకీయ చరిత్ర అంతా వెన్నుపోటుతోనే నిండి ఉందని భూమన విమర్శించారు. నాడు పార్టీ పెట్టి, అధికారం తెచ్చిన పిల్లనిచ్చిన మామ, టీడీపీ వ్యవస్థాపకుడు ఎన్టీ రామారావును ఒక్కసారే వెన్నుపోటు పొడిచి అధికారం లాక్కున్న చంద్రబాబు.. నేడు రాష్ట్ర ప్రజలను అనునిత్యం అబద్ధపు హామీలతో వెన్నుపోటు పొడుస్తూనే ఉన్నారని తీవ్ర వ్యాఖ్యలు చేశారు.
ఇక జనసేన అధినేత, ఉప ముఖ్యమంత్రి పవన్ కళ్యాణ్పై కూడా భూమన విమర్శనాస్త్రాలు సంధించారు. పవన్ కళ్యాణ్ చంద్రబాబు చేసిన తప్పులను కప్పిపుచ్చే ఒక “ధర్మ పరిరక్షకుడి”లా వ్యవహరిస్తున్నారని ఎద్దేవా చేశారు. రాష్ట్ర ప్రయోజనాలను, ప్రజల సమస్యలను గాలికి వదిలేసి, మంత్రి నారా లోకేష్ సేవలో పవన్ కళ్యాణ్ తన లోకాలను సైతం మరిచిపోయి బతుకుతున్నారని భూమన కరుణాకర్ రెడ్డి తీవ్ర స్థాయిలో ధ్వజమెత్తారు. ప్రజలు ఈ ఐదేళ్ల గ్రహణ కాలాన్ని అప్రమత్తంగా గమనించాలని ఆయన సూచించారు.
