YSR Praja News Telugu : హైదరాబాద్: రాష్ట్రంలో వక్ఫ్ ఆస్తుల పరిరక్షణే ధ్యేయంగా జామియా నిజామియా రాయిదుర్గ్ వక్ఫ్, వక్ఫ్ బచావో తహ్రీక్ జాయింట్ యాక్షన్ కమిటీ (జేఏసీ) కీలక అడుగు వేసింది. వక్ఫ్ ఆస్తుల పరిరక్షణకు తాము చేపడుతున్న పోరాటంలో భాగంగా, బీఆర్ఎస్ పార్టీ జాతీయ అధ్యక్షులు, మాజీ ముఖ్యమంత్రి కేసీఆర్తో సమావేశమయ్యేందుకు జేఏసీ నాయకులు సన్నద్ధమయ్యారు. ఈ మేరకు కేసీఆర్ను కలిసేందుకు సమయం కల్పించాలని కోరుతూ బుధవారం తెలంగాణ భవన్లో పార్టీ ఇన్చార్జికి లేఖ అందజేశారు.
జేఏసీ చైర్మన్, తెలంగాణ స్టేట్ మైనారిటీ హక్కుల పోరాట సమితి (TSMHPS) రాష్ట్ర అధ్యక్షుడు అబ్దుల్ వాహబ్ నేతృత్వంలో ఒక ప్రతినిధి బృందం తెలంగాణ భవన్ ఇన్చార్జి రావుల చంద్రశేఖర్ రావును మర్యాదపూర్వకంగా కలిసింది. ఈ బృందంలో జేఏసీ వైస్ చైర్మన్, TSMHPS కోఆర్డినేటర్ అబ్రార్ హుస్సేన్ ఆజాద్, జేఏసీ వైస్ చైర్మన్ ఎం.డి. వాజీద్ తదితరులు ఉన్నారు. మాజీ సీఎం కేసీఆర్తో జేఏసీ నాయకులు ప్రత్యేకంగా సమావేశం నిర్వహించాలని కోరుతూ వీరు వినతిపత్రం సమర్పించారు.
ప్రధాన చర్చనీయాంశాలు ఇవే..
రాయిదుర్గ్లోని జామియా నిజామియా వక్ఫ్ భూముల వ్యవహారంతో పాటు, తెలంగాణ రాష్ట్రవ్యాప్తంగా ఉన్న వక్ఫ్ ఆస్తుల పరిరక్షణకు సంబంధించిన పలు కీలక అంశాలను కేసీఆర్ దృష్టికి తీసుకెళ్లనున్నట్లు జేఏసీ నాయకులు తెలిపారు. ప్రధానంగా వక్ఫ్ ఆస్తుల ఆక్రమణలకు అడ్డుకట్ట వేయడం, దీర్ఘకాలికంగా అపరిష్కృతంగా ఉన్న వక్ఫ్ సమస్యల పరిష్కారం తదితర అంశాలపై జేఏసీ చేపడుతున్న కార్యక్రమాలను కేసీఆర్కు వివరించనున్నారు. ఆయన సలహాలు, సూచనలతో భవిష్యత్ కార్యాచరణను రూపొందించుకునేలా చర్చించేందుకు అవకాశం కల్పించాలని లేఖలో కోరారు.
అందరి మద్దతు కోరుతున్నాం:
వక్ఫ్ ఆస్తుల పరిరక్షణ అనేది కేవలం ఒక వర్గానికి సంబంధించిన సమస్య కాదని, దీనికోసం అన్ని వర్గాల ప్రజాప్రతినిధులు, వివిధ రాజకీయ పార్టీల నాయకుల మద్దతును కూడగడతామని జేఏసీ నాయకులు స్పష్టం చేశారు. వక్ఫ్ ఆస్తులను కాపాడుకునే వరకు తమ పోరాటం, కార్యక్రమాలు నిరంతరాయంగా కొనసాగుతాయని వారు ఈ సందర్భంగా ఉద్ఘాటించారు.
