YSR Praja News Telugu : హైదరాబాద్: తెలంగాణ ప్రజల ఆస్తిపై కాంగ్రెస్ ప్రభుత్వం చేస్తున్న నిర్ణయాలు తీవ్రమైన అనర్థాలకు దారితీస్తాయని బీఆర్ఎస్ వర్కింగ్ ప్రెసిడెంట్ కేటీఆర్ హెచ్చరించారు. రాష్ట్రానికి చెందిన సుమారు రూ. 5 లక్షల కోట్ల విలువైన భూములను ‘ఏటీఎం’లా మార్చే విధానాలను ప్రజలు అసలు అంగీకరించరని ఆయన స్పష్టం చేశారు. తాజాగా సీఎం రేవంత్ రెడ్డి ప్రవేశపెట్టిన హైదరాబాద్ ఇండస్ట్రియల్ ల్యాండ్ ట్రాన్స్ఫర్మేషన్ పాలసీ (HILTP/HILPI) దేశంలో పెద్ద భూ కుంభకోణాల్లో ఒకటిగా నిలుస్తుందని కేటీఆర్ వ్యాఖ్యానించారు.
ఆదివారం కేటీఆర్ కాంగ్రెస్ అగ్రనేత రాహుల్ గాంధీకి లేఖ రాసి తమ ఆందోళనలు వెల్లడించారు. ప్రభుత్వ ఆస్తులను అత్యల్ప ధరలకు ప్రైవేట్ సంస్థలకు అప్పగించే అవకాశం ఈ పాలసీలో స్పష్టంగా కనిపిస్తోందని ఆయన అన్నారు. పారిశ్రామికాభివృద్ధి కోసం గత ప్రభుత్వాల కాలంలో 9,300 ఎకరాల పరిశ్రమల భూమి కేటాయించబడిందని, అయితే ప్రస్తుత పాలసీ ప్రజలకు రావలసిన లాభాలను ప్రైవేట్ వర్గాలకు మళ్లించే ప్రయత్నంగా ఉందని ఆరోపించారు.
కేటీఆర్ అభిప్రాయంలో హిల్ట్ప పాలసీ అమలులో పారదర్శకత లేదని, పర్యావరణ ప్రభావాలపై కూడా సరైన పరిశీలన చేయలేదని పేర్కొన్నారు. పరిశ్రమలను ఓఆర్ఆర్ వెలుపలికి తరలించాలనే మాటలు చెప్పినా, వాటికి ప్రత్యామ్నాయ స్థలాలు చూపించకపోవడం ప్రభుత్వ ఉద్దేశ్యాలపై అనుమానాలు కలిగిస్తోందని అన్నారు.
ఈ విధానం వల్ల హైదరాబాదులో కొత్త పారిశ్రామిక యూనిట్లకు అవకాశం తగ్గిపోయి, పాత పారిశ్రామిక ప్రాంతాల్లో రియల్ ఎస్టేట్, కమర్షియల్ నిర్మాణాలు పెరిగే పరిస్థితి వస్తుందని ఆయన హెచ్చరించారు. కొన్ని కాంగ్రెస్ నాయకులు, పలుకుబడి ఉన్న రియల్ ఎస్టేట్ గ్రూపులు, సీఎం సన్నిహిత వ్యాపారవేత్తలు, కుటుంబ సభ్యులకు లాభం చేకూర్చడానికే ఈ పాలసీ రూపొందించబడిందని కేటీఆర్ ఆరోపించారు.
రాహుల్ గాంధీకి కేటీఆర్ లేఖలో స్పష్టమైన హెచ్చరిక చేశారు—
“ఈ ఘటనల గురించి ఇప్పటికైనా తెలుసుకుని చర్యలు తీసుకోకపోతే, ఈ కుంభకోణంలో మీకూ భాగస్వామ్యం ఉన్నట్టే ప్రజలు భావిస్తారు” అని పేర్కొన్నారు.
Telangana ప్రజాస్వామ్యాన్ని, వారి ఆస్తులను రక్షించేందుకు బీఆర్ఎస్ పోరాటం కొనసాగుతుందని తెలిపారు.
