YSR Praja News Telugu : తెలంగాణ ముఖ్యమంత్రి రేవంత్ రెడ్డి సొంత నియోజకవర్గమైన కొడంగల్లో మైనారిటీల మతపరమైన కట్టడాల కూల్చివేత జరిగి ఏడాది గడుస్తున్నా.. పునర్నిర్మాణ చర్యలు చేపట్టకపోవడంపై తీవ్ర విమర్శలు వ్యక్తమవుతున్నాయి. రోడ్డు విస్తరణ పేరుతో కూల్చేసిన హజ్రత్ మహబూబ్ సుభాని చిల్లా, ఖబరస్తాన్లు (సమాధులు), అషురఖానాలను తిరిగి నిర్మిస్తామన్న ప్రభుత్వ హామీ నీటిమూటగానే మిగిలిపోయింది. ఈ నేపథ్యంలో తెలంగాణ స్టేట్ మైనారిటీ హక్కుల పోరాట సమితి రాష్ట్ర అధ్యక్షులు అబ్దుల్ వాహబ్ రాష్ట్ర ప్రభుత్వ తీరుపై తీవ్ర ఆగ్రహం వ్యక్తం చేస్తూ ఒక ప్రకటన విడుదల చేశారు.
అసలేం జరిగిందంటే..
గత ఏడాది (సెప్టెంబర్ 2025) మూడవ వారంలో కొడంగల్ మున్సిపల్ అధికారులు రోడ్డు విస్తరణ పనుల సాకుతో ఎలాంటి ముందస్తు నోటీసులు ఇవ్వకుండానే మతపరమైన కట్టడాలను కూల్చివేశారు. అర్ధరాత్రి సమయంలో భారీ బుల్డోజర్లను మోహరించి హజ్రత్ మహబూబ్ సుభాని చిల్లాతో పాటు పవిత్రమైన ఖబరస్తాన్లు, అషురఖానాలను రాత్రికి రాత్రే నేలమట్టం చేశారు. ముఖ్యమంత్రి ప్రాతినిధ్యం వహిస్తున్న నియోజకవర్గ కేంద్రంలోనే ఇలాంటి ఘటన జరగడం అప్పట్లో రాష్ట్రవ్యాప్తంగా సంచలనం సృష్టించింది. మైనారిటీల మనోభావాలను దెబ్బతీసేలా అధికారులు వ్యవహరించిన తీరుపై అప్పట్లో పెద్ద ఎత్తున నిరసనలు వెల్లువెత్తాయి.
అమలుకాని పునర్నిర్మాణ హామీలు
కట్టడాల కూల్చివేత అనంతరం చోటుచేసుకున్న ఉద్రిక్త పరిస్థితులు, విమర్శల నేపథ్యంలో అప్పట్లో అధికారులు, స్థానిక ప్రజాప్రతినిధులు దిగివచ్చారు. ధ్వంసమైన మతపరమైన కట్టడాలను అదే స్థలంలో, పూర్తిగా ప్రభుత్వ ఖర్చులతో పునర్నిర్మిస్తామని మైనారిటీలకు స్పష్టమైన హామీలు ఇచ్చారు. ఆ హామీలు ఇచ్చి నేటికి కచ్చితంగా ఒక సంవత్సరం పూర్తవుతున్నప్పటికీ, క్షేత్రస్థాయిలో పునర్నిర్మాణ పనులు ఒక్క అడుగు కూడా ముందుకు పడలేదని అబ్దుల్ వాహబ్ ఆవేదన వ్యక్తం చేశారు. ఇది ప్రభుత్వ నిర్లక్ష్యానికి, మైనారిటీల పట్ల ఉన్న చిన్నచూపునకు నిదర్శనమని ఆయన పేర్కొన్నారు.
సీఎం రేవంత్ రెడ్డికి చిత్తశుద్ధి లేదు: అబ్దుల్ వాహబ్
ఈ సందర్భంగా రాష్ట్ర ప్రభుత్వ వైఖరిని అబ్దుల్ వాహబ్ తీవ్రస్థాయిలో ఎండగట్టారు. “సీఎం రేవంత్ రెడ్డికి తన సొంత నియోజకవర్గంలోని మైనారిటీల మీద ఎంత ప్రేమ ఉందో, వారి పట్ల ఎంత గౌరవం ఉందో ఈ ఘటనతో స్పష్టమవుతోంది. కేవలం మాటలు చెప్పడం తప్ప, ఆచరణలో మైనారిటీల సంక్షేమం, వారి మనోభావాల పరిరక్షణపై ఈ ప్రభుత్వానికి ఏమాత్రం చిత్తశుద్ధి లేదు” అని ఆయన ధ్వజమెత్తారు. హామీలు ఇచ్చి గాలికొదిలేసే సంస్కృతికి ఇది అద్దం పడుతోందని విమర్శించారు.
వెంటనే నిర్మించకపోతే తగిన బుద్ధి చెబుతాం..
ఇప్పటికైనా ముఖ్యమంత్రి రేవంత్ రెడ్డి తక్షణమే స్పందించి, కూల్చివేసిన ప్రార్థనా స్థలాలు, మహబూబ్ సుభాని చిల్లా, ఖబరస్తాన్లు మరియు అషురఖానాలను వెంటనే పునర్నిర్మించాలని అబ్దుల్ వాహబ్ డిమాండ్ చేశారు. ఒకవేళ ప్రభుత్వం మొండివైఖరితో మైనారిటీ వ్యతిరేక విధానాలను ఇలాగే కొనసాగిస్తే.. తగిన సమయంలో మైనారిటీలు ఏకమై, ఈ ప్రభుత్వానికి తప్పకుండా బుద్ధి చెబుతారని ఆయన తీవ్రస్థాయిలో హెచ్చరించారు.
