YSR Praja News : ఢిల్లీ:
ఏఐసీసీ అధ్యక్షుడు మల్లికార్జున ఖర్గే ఆరోగ్య పరిస్థితి గురించి ప్రధాని నరేంద్ర మోదీ ఫోన్ ద్వారా ఆరా తీశారు.
ప్రధాని మోదీ ఎక్స్‌లో పోస్ట్ చేస్తూ, “నేను ఖర్గే గారితో మాట్లాడాను. ఆయన ఆరోగ్య పరిస్థితి గురించి అడిగి తెలుసుకున్నాను. ఆయన త్వరగా కోలుకోవాలని కోరుకుంటున్నాను. దీర్ఘాయుష్షు పొందాలని ప్రార్థిస్తున్నాను” అన్నారు.
ఇక, బుధవారం రాత్రి బెంగళూరు ఎంఎస్ రామయ్య ఆసుపత్రిలో ఖర్గేకు వైద్యులు పేస్మేకర్ అమర్చారు. పార్టీ కార్యక్రమాల్లో పాల్గొనేందుకు బెంగళూరు వచ్చిన ఆయనకు శ్వాసలో ఇబ్బంది, జ్వరం రావడంతో మంగళవారం సాయంత్రం ఆసుపత్రిలో చేర్చినట్లు సమాచారం.
ఖర్గే తనయుడు, రాష్ట్ర ఐటీ మంత్రి ప్రియాంక్ ఖర్గే మాట్లాడుతూ, “వయో సంబంధ సమస్యలు, శ్వాస సమస్యల కారణంగా వైద్యులు పేస్మేకర్ అమర్చాలని సూచించారు” అని తెలిపారు.
ముఖ్యమంత్రి సిద్ధరామయ్య వెల్లడించిన ప్రకారం, శస్త్రచికిత్స విజయవంతంగా పూర్తయింది. ఖర్గే ఆరోగ్యం బాగుందని, గురువారం డిశ్చార్జి అవుతారని
తెలిపారు.
