YSR Praja News హైదరాబాద్ / తెలంగాణభవన్:
తెలంగాణ రాష్ట్రంలో భారీ స్థాయిలో భూ కుంభకోణం జరుగుతోందని బీఆర్ఎస్ వర్కింగ్ ప్రెసిడెంట్ కేటీఆర్ తీవ్ర ఆరోపణలు చేశారు. సుమారు రూ.4 లక్షల కోట్ల విలువైన భూములను అక్రమంగా దక్కించుకునే ప్రయత్నం జరుగుతోందని ఆయన సంచలన వ్యాఖ్యలు చేశారు. ఈ కుంభకోణానికి ముఖ్యమంత్రి రేవంత్ రెడ్డి నాయకత్వం వహిస్తున్న ముఠా కారణమని ఆరోపించారు.
తెలంగాణభవన్‌లో మీడియాతో మాట్లాడిన కేటీఆర్ మాట్లాడుతూ..
బాలానగర్, కాటేదాన్, జీడిమెట్ల పరిసర ప్రాంతాల్లో వేల ఎకరాల భూములను కొందరి చేతిలో పెట్టేందుకు ప్రయత్నం జరుగుతోందన్నారు. ముఖ్యంగా రేవంత్ రెడ్డి కుటుంబ సభ్యులు, సన్నిహితుల దృష్టి విలువైన ప్రభుత్వ భూములపై పడిందని తెలిపారు.
9300 ఎకరాలకు పైగా భూములపై అక్రమ కేటాయింపులు జరిగాయని, జపాన్ పర్యటన సమయంలో కూడా ఈ ఫైళ్లపై ముఖ్యమంత్రి ఆదేశాలు ఇచ్చారని కేటీఆర్ ఆరోపించారు. ఈ వ్యవహారంలో బీజేపీ కూడా మౌనంగా ఉండటం వెనుక కారణాలున్నాయని వ్యాఖ్యానించారు.
బీఆర్ఎస్ పార్టీ తరఫున ఈ భూ కుంభకోణంపై న్యాయపోరాటం చేస్తామని స్పష్టం చేశారు. ప్రభుత్వం మారిన తర్వాత ఈ వ్యవహారంపై పూర్తిస్థాయి విచారణ నిర్వహిస్తామని హెచ్చరించారు. పారిశ్రామికవేత్తలు ఈ స్కామ్‌లో చిక్కుకోవద్దని ఆయన హెచ్చరికలు చేశారు.
ఫార్ములా ఈ రేస్ కేసుపై స్పందన:
ఫార్ములా ఈ కారు రేస్ కేసులో తాను ఎలాంటి తప్పు చేయలేదని కేటీఆర్ స్పష్టం చేశారు. తనపై కేసులు పెట్టడమే తప్ప, ఆధారాలు లేవన్నారు. తనను అరెస్ట్ చేసే ధైర్యం రేవంత్ రెడ్డికి లేదని వ్యాఖ్యానించారు. అవసరమైతే లై డిటెక్టర్ టెస్ట్‌కు కూడా సిద్ధమని చెప్పారు.
అలాగే కడియం శ్రీహరి, దానం నాగేందర్ వ్యవహారాలపై స్పందిస్తూ..
కొందరిని కాపాడేందుకు రాజకీయ కుట్రలు జరుగుతున్నాయని ఆరోపించారు. తెలంగాణలో కాంగ్రెస్, బీజేపీ కలిసి ప్రభుత్వాన్ని నడుపుతున్నాయని విమర్శించారు. వచ్చే ఎన్నికల్లో బీఆర్ఎస్ మళ్లీ అధికారంలోకి వస్తుందని కేటీఆర్ ధీమా వ్యక్తం చేశారు
