లేబర్ కోడ్లు, విద్యుత్ సవరణ, జాతీయ విత్తన చట్టాల రద్దు కోరుతూ తాండూర్లో సీపీఎం సమావేశం

YSR Praja News Telugu : తాండూర్, జనవరి 20: లేబర్ కోడ్లు, వి బి జి రాంజీ, విద్యుత్ సవరణ బిల్లు, జాతీయ విత్తన చట్టం వంటి ప్రజావ్యతిరేక, రైతు వ్యతిరేక బిల్లులను వెంటనే రద్దు చేయాలని సీపీఎం పార్టీ డిమాండ్ చేసింది. ఈ మేరకు తాండూర్ పట్టణంలో సీపీఎం పార్టీ శాఖ సమావేశం కే. శ్రీనివాస్ అధ్యక్షతన జరిగింది.

ఈ సమావేశానికి ముఖ్య అతిథులుగా సీపీఎం జిల్లా కార్యదర్శి ఆర్. మహిపాల్, జిల్లా కమిటీ సభ్యులు కే. శ్రీనివాస్ హాజరై మాట్లాడారు. కేంద్ర, రాష్ట్ర ప్రభుత్వాలు ప్రజా ప్రయోజనాలను విస్మరించి కార్మిక, రైతు వర్గాలకు తీవ్ర నష్టం కలిగించే విధానాలను అమలు చేస్తున్నాయని వారు ఆరోపించారు.

లేబర్ కోడ్ల ద్వారా కార్మికుల హక్కులు కాలరాయబడుతున్నాయని, ఉపాధి హామీ పథకాన్ని నిర్వీర్యం చేయడానికి వి బి జి రాంజీ నిబంధనలు ఉపయోగిస్తున్నారని విమర్శించారు. అలాగే జాతీయ విత్తన చట్టం ద్వారా రైతులు విత్తన సంస్థలపై ఆధారపడే పరిస్థితి వస్తుందని, విద్యుత్ సవరణ బిల్లు రైతులకు అదనపు భారం మోపే ప్రమాదం ఉందని తెలిపారు.

✊ ప్రధాన డిమాండ్లు ఇవే:

🔹 తాండూర్ ప్రాంతంలో కార్మికుల కోసం ఈఎస్ఐ ఆసుపత్రిని ఏర్పాటు చేయాలి.

🔹 ప్రైవేటు పాఠశాలలు, ఆసుపత్రుల్లో అధిక ఫీజులను నియంత్రించాలి.

🔹 అర్హులైన పేదలందరికీ ఇందిరమ్మ ఇళ్లను మంజూరు చేయాలి.

🔹 తాండూర్ నియోజకవర్గంలో అక్రమంగా సాగుతున్న ఇసుక మాఫియా, ఎర్రమట్టి మాఫియాను అరికట్టడంలో అధికారులు విఫలమయ్యారని విమర్శించారు.

🔹 రైతులకు కంది పంటకు గిట్టుబాటు ధరను ప్రస్తుతం ఉన్న రూ.7,767 నుంచి రూ.12,000కు పెంచాలని డిమాండ్ చేశారు.

🔹 కంది బోర్డును ఏర్పాటు చేయాలని కోరారు.

🔹 రైతులకు యూరియా, ఎరువులు సమృద్ధిగా అందుబాటులో ఉంచి బ్లాక్ మార్కెట్ అమ్మకాలను అరికట్టాలని అన్నారు.

🌳 పట్టణ అభివృద్ధి అంశాలపై డిమాండ్లు

తాండూర్ మున్సిపల్ పరిధిలోని పార్కులు ఆక్రమణలకు గురవుతున్నాయని, ప్రభుత్వం వెంటనే వాటిని కాపాడి అభివృద్ధి చేయాలని సీపీఎం నేతలు కోరారు. పార్కుల్లో మంచినీరు, మరుగుదొడ్లు, లైటింగ్ సదుపాయాలు ఏర్పాటు చేయాలని, భద్రత కోసం సీసీ కెమెరాలు, పోలీస్ బందోబస్తు ఏర్పాటు చేయాలని సూచించారు.

ఆర్‌టీసీ బస్సు స్టాండ్‌లో మరుగుదొడ్లను పునరుద్ధరించి, తాగునీటి సౌకర్యం కల్పించాలని డిమాండ్ చేశారు. అలాగే డబుల్ బెడ్‌రూమ్ ఇళ్లు, ఇందిరమ్మ ఇండ్లు, ఇళ్ల స్థలాలను పేదలకు వెంటనే కేటాయించాలని అన్నారు.

గ్రామాలు – మండలాల మధ్య పెండింగ్‌లో ఉన్న రోడ్ల పనులను వెంటనే పూర్తి చేయాలని ప్రభుత్వాన్ని కోరారు.

ఈ సమావేశంలో సీపీఎం నాయకులు జైపాల్, చంద్రప్ప, వెంకటేష్, రాజు, బాలస్వామి తదితరులు మరియు పార్టీ కార్యకర్తలు పెద్ద సంఖ్యలో పాల్గొన్నారు.