YSR Praja News : న్యూఢిల్లీ: దేశవ్యాప్తంగా చలికాలం ప్రభావం పెరగడంతో పలు ప్రాంతాల్లో దట్టమైన పొగమంచు కమ్ముకుంది. తక్కువ దృశ్యమానత కారణంగా దేశీయ విమానయాన రంగం తీవ్ర ఆటంకాలను ఎదుర్కొంటోంది. ముఖ్యంగా ఇండిగో ఎయిర్లైన్స్ కార్యకలాపాలు తీవ్రంగా ప్రభావితమయ్యాయి. గురువారం ఒక్కరోజే వివిధ విమానాశ్రయాల నుంచి మొత్తం 67 విమానాలను ఇండిగో రద్దు చేసినట్లు సమాచారం.
బెంగళూరు, వారణాసి, అగర్తల, చండీగఢ్ వంటి ప్రధాన నగరాల్లో వాతావరణ పరిస్థితులు అనుకూలించకపోవడంతో విమానాల రాకపోకలు నిలిచిపోయాయి. డిసెంబర్ 10వ తేదీ నుంచి పొగమంచు కారణంగా ఇండిగో తరచూ ఈ తరహా అంతరాయాలను ఎదుర్కొంటోంది.
పొగమంచు పరిస్థితుల్లో విమానాల ల్యాండింగ్ విషయంలో పౌర విమానయాన డైరెక్టరేట్ జనరల్ (DGCA) కఠిన నిబంధనలు అమలు చేస్తోంది. 50 మీటర్ల కంటే తక్కువ దృశ్యమానత ఉన్నా ల్యాండ్ చేయగల అత్యాధునిక విమానాలు, ప్రత్యేక శిక్షణ పొందిన పైలట్లు ఉండాల్సిందేనని స్పష్టం చేసింది. అయితే ఈ నిబంధనలను సమర్థంగా అమలు చేయడంలో ఏర్పడిన లోపాలు ప్రయాణికులకు తీవ్ర ఇబ్బందులను తెచ్చిపెడుతున్నాయి.
వాతావరణ సమస్యలతో పాటు సిబ్బంది కొరత, పైలట్ల విశ్రాంతి నిబంధనల ఉల్లంఘనలు కూడా ఇండిగోకు పెద్ద సవాలుగా మారాయి. ఈ నేపథ్యంలో కేంద్ర ప్రభుత్వం సంస్థపై చర్యలకు దిగింది. ఫలితంగా ఇండిగో తన శీతాకాల షెడ్యూల్ను 10 శాతం మేర తగ్గించి, రోజువారీ విమానాల సంఖ్యను 1,930కి పరిమితం చేసింది.
ఇటీవల ఒకే రోజు 1,600 విమానాలు రద్దైన ఘటన తీవ్ర చర్చనీయాంశంగా మారిన సంగతి తెలిసిందే. వరుస వైఫల్యాల వెనుక అసలు కారణాలను గుర్తించేందుకు డీజీసీఏ నాలుగు సభ్యులతో కూడిన ఉన్నత స్థాయి కమిటీని ఏర్పాటు చేసింది. ఈ కమిటీ ఈ వారంలో తన నివేదికను సమర్పించనుంది.
మరోవైపు, గంటల తరబడి విమానాశ్రయాల్లో వేచి ఉండాల్సి వస్తుండటంతో ప్రయాణికుల అసహనం వ్యక్తమవుతోంది. ఐదు గంటలకు పైగా ఆలస్యమవుతున్న విమానాలు, సరైన సమాచారం అందకపోవడంపై సోషల్ మీడియాలో ఆగ్రహం వెల్లువెత్తుతోంది. వృద్ధులు, చిన్నారులతో ప్రయాణిస్తున్న వారు తీవ్ర ఇబ్బందులు ఎదుర్కొంటున్నామని, వాతావరణాన్ని కారణంగా చూపకుండా నష్టపరిహారం ఇవ్వాలని డిమాండ్ చేస్తున్నారు.
అయితే పరిస్థితులు సాధారణ స్థితికి వచ్చే వరకు ప్రయాణికులు తమ విమానాల స్థితిని ముందుగానే తనిఖీ చేసుకుని బయలుదేరాలని ఇండిగో సూచించింది.
