YSR Praja News : హైదరాబాద్: తెలంగాణ ముఖ్యమంత్రి రేవంత్ రెడ్డిపై బీఆర్ఎస్ వర్కింగ్ ప్రెసిడెంట్ కేటీఆర్ తీవ్ర స్థాయిలో విమర్శలు గుప్పించారు. శుక్రవారం తెలంగాణ భవన్లో జరిగిన చేరికల కార్యక్రమంలో మాట్లాడిన ఆయన.. ముఖ్యమంత్రి స్థాయికి తగని భాష, తీరుతో రేవంత్ రెడ్డి వ్యవహరిస్తున్నారని మండిపడ్డారు. రోజూ తిట్ల రాజకీయాలే తప్ప ప్రజలకు ఇచ్చిన హామీల అమలుపై కాంగ్రెస్ ప్రభుత్వానికి చిత్తశుద్ధి లేదని ఆరోపించారు.
రేవంత్ రెడ్డి రాజకీయ ప్రస్థానం అందరికీ తెలుసని, ఆయన మాటల్లో బాధ్యతా రాహిత్యం స్పష్టంగా కనిపిస్తోందన్నారు. కేసీఆర్ లాంటి నాయకుడిపై వ్యక్తిగత దూషణలకు దిగడం దురదృష్టకరమని వ్యాఖ్యానించారు. ముఖ్యమంత్రి హోదాలో ఉండి అసభ్యకర వ్యాఖ్యలు చేయడం తగదని కేటీఆర్ అన్నారు.
ఎన్నికల సమయంలో ఇచ్చిన హామీలను కాంగ్రెస్ ప్రభుత్వం విస్మరించిందని కేటీఆర్ ఆరోపించారు. మహిళలకు నెలకు రూ.2500 ఇస్తామన్న హామీ ఎక్కడ అమలయ్యిందని ప్రశ్నించారు. కోటి మంది మహిళలను కోటీశ్వరులు చేస్తామని చెప్పిన మాటలకు ఇప్పటివరకు ఆధారాలు చూపలేదన్నారు. ముందు ప్రజలకు ఇచ్చిన హామీలను నెరవేర్చాలని డిమాండ్ చేశారు.
అభివృద్ధి పనుల విషయంలో కాంగ్రెస్ పాలన పూర్తిగా విఫలమైందని కేటీఆర్ విమర్శించారు. బీఆర్ఎస్ ప్రభుత్వం నిర్మించిన ప్రాజెక్టులు, చెక్డ్యాంలను ధ్వంసం చేయడమే కాంగ్రెస్ పని అయిందని ఆరోపించారు. ఇసుక దందాలు, భూకబ్జాలే ప్రభుత్వ లక్ష్యంగా మారాయని, వాటిని ప్రశ్నించిన అధికారులను వేధిస్తున్నారని తెలిపారు.
కొంతమంది ఎమ్మెల్యేల పార్టీ మార్పులపై కూడా కేటీఆర్ స్పందించారు. ప్రజాస్వామ్య విలువలను తుంగలో తొక్కుతూ రాజకీయాలు చేస్తున్నారని, స్పీకర్ కూడా మౌనంగా ఉండటం దురదృష్టకరమన్నారు. ఎన్నికలకు భయపడి కాంగ్రెస్ దిక్కుమాలిన రాజకీయాలకు పాల్పడుతోందని విమర్శించారు.
కేసీఆర్ను వ్యక్తిగతంగా టార్గెట్ చేయడం ద్వారా కాంగ్రెస్ తన అసమర్థతను కప్పిపుచ్చుకుంటోందని కేటీఆర్ వ్యాఖ్యానించారు. కేసీఆర్ ఒక్కసారి మీడియా ముందుకు వచ్చినా కాంగ్రెస్ నేతల్లో భయం కనిపిస్తోందన్నారు. తెలంగాణ ఆత్మగౌరవంతో బీఆర్ఎస్ పోరాటం కొనసాగిస్తుందని స్పష్టం చేశారు.
ముందు రోజుల్లో పార్టీని మరింత బలోపేతం చేసి, ప్రజల సమస్యలపై ఉద్యమాలు ఉధృతం చేస్తామని కేటీఆర్ తెలిపారు. 2026–27 నాటికి రాజకీయ వాతావరణం పూర్తిగా మారుతుందని, కేసీఆర్ను మళ్లీ ముఖ్యమంత్రిని చేసే వరకు బీఆర్ఎస్ శ్రేణులు విశ్రమించవని ఆయన స్పష్టం చేశారు.
