YSR Praja News Telugu : తాండూర్: కేంద్ర ప్రభుత్వం ప్రవేశపెట్టిన నాలుగు లేబర్ కోడ్లను రద్దు చేయాలని డిమాండ్ చేస్తూ ఫిబ్రవరి 12, 2026న దేశవ్యాప్తంగా నిర్వహించిన సార్వత్రిక సమ్మెకు తాండూర్ పట్టణంలో విస్తృత మద్దతు లభించింది. సీఐటీయూ, వ్యవసాయ కార్మిక సంఘం, రైతు సంఘాల ఆధ్వర్యంలో దొడ్డి కొమరయ్య పార్క్ నుంచి డాక్టర్ బి.ఆర్. అంబేద్కర్ విగ్రహం వరకు భారీ ర్యాలీ నిర్వహించారు.
ఈ ర్యాలీ భద్రేశ్వర చౌక్, గాంధీ చౌక్, వినాయక చౌక్ మీదుగా సాగింది. పెద్ద సంఖ్యలో కార్మికులు, ఉద్యోగులు, మహిళా సంఘాల ప్రతినిధులు పాల్గొని కేంద్ర ప్రభుత్వ విధానాలకు వ్యతిరేకంగా నినాదాలు చేశారు.
ఈ సందర్భంగా సీఐటీయూ వికారాబాద్ జిల్లా కార్యదర్శి కే. శ్రీనివాస్, వ్యవసాయ కార్మిక సంఘం జిల్లా అధ్యక్షులు యు. బుగ్గప్ప, కేవీపీఏ జిల్లా కార్యదర్శి మల్కయ్య మాట్లాడుతూ లేబర్ కోడ్లు కార్మిక హక్కులను బలహీనపరుస్తున్నాయని విమర్శించారు. పని గంటలను పెంచడం, కనీస వేతనాల అమలును నీరుగార్చడం, కార్మిక సంఘాల ఏర్పాటుకు అడ్డంకులు సృష్టించడం ద్వారా కార్మిక వర్గంపై ఒత్తిడి పెరుగుతోందన్నారు.
ప్రభుత్వ రంగ సంస్థలను ప్రైవేటీకరించే విధానాలు ప్రజా రంగాన్ని దెబ్బతీస్తున్నాయని నేతలు ఆందోళన వ్యక్తం చేశారు. బ్యాంకులు, ఇన్సూరెన్స్ రంగంలో విదేశీ పెట్టుబడులకు అధిక ప్రాధాన్యం ఇవ్వడం వల్ల దేశ సంపద విదేశాలకు వెళ్లే ప్రమాదం ఉందని హెచ్చరించారు. ఎల్ఐసీ, పోస్టల్ శాఖ, టెలికాం, రైల్వే, విద్యుత్, బొగ్గు గనులు, విమానయానం వంటి కీలక రంగాల్లో ప్రైవేటీకరణకు ప్రోత్సాహం ఇవ్వడం వల్ల ఉద్యోగ భద్రత దెబ్బతింటోందని అన్నారు.
పీఎఫ్, ఈఎస్ఐ, బోనస్, గ్రాట్యూటీ, పెన్షన్ వంటి సామాజిక భద్రతా పథకాలపై దాడులు జరుగుతున్నాయని నేతలు పేర్కొన్నారు. వేతన పరిమితులను మార్చి కార్మికులుగా గుర్తించకుండా చేయడం ద్వారా కార్మిక చట్టాల నుంచి తప్పించుకునే ప్రయత్నాలు జరుగుతున్నాయని విమర్శించారు.
ఈ సమ్మె దేశవ్యాప్తంగా కోట్లాది మంది కార్మికులు పాల్గొన్న సార్వత్రిక ఉద్యమమని, పలు ప్రాంతాల్లో పరిశ్రమలు, బ్యాంకులు, వాణిజ్య సంస్థలు మూతపడ్డాయని నేతలు తెలిపారు. కార్మిక వ్యతిరేక విధానాలను వెంటనే ఉపసంహరించుకోవాలని, లేబర్ కోడ్లను రద్దు చేసి కార్మికులకు అనుకూలమైన చట్టాలను తీసుకురావాలని డిమాండ్ చేశారు.
ఈ కార్యక్రమంలో సీఐటీయూ తాండూర్ మండల నాయకులు జైపాల్, చంద్రప్ప, అంగన్వాడీ టీచర్స్ అండ్ హెల్పర్స్ యూనియన్ నాయకులు బాలమణి, బేబీ, రామంజమ్మ, కాంట్రాక్ట్ ఏఎన్ఎంల సంఘం జిల్లా అధ్యక్షురాలు వెంకటమ్మ, మున్సిపల్ కార్మికుల యూనియన్ నాయకులు నరేష్, బలరాం, అశోక్, నర్సింలు, గ్రామపంచాయతీ కార్మిక సంఘం ప్రతినిధులు నర్సింలు, వెంకటేష్, జిలాని, లక్ష్మీ, బిచ్చప్ప తదితరులు పాల్గొన్నారు.
కార్మిక హక్కుల పరిరక్షణ కోసం ఉద్యమాలు కొనసాగుతాయని నాయకులు స్పష్టం చేశారు.
