YSR Praja News Telugu : తాండూరు రాజకీయాల్లో మరోసారి తీవ్ర ఉత్కంఠ నెలకొంది. డ్రగ్స్ కేసు ఆరోపణల నేపథ్యంలో మాజీ ఎమ్మెల్యే పైలట్ రోహిత్ రెడ్డి చుట్టూ ఉచ్చు బిగుసుకుంటోంది. ఆయనపై క్రమశిక్షణా చర్యలు తీసుకునే దిశగా బీఆర్ఎస్ అధిష్టానం పావులు కదుపుతున్నట్లు సమాచారం. అయితే, ఈ నిర్ణయం పార్టీకి ఎలాంటి పరిణామాలను తీసుకువస్తుందనే దానిపై గులాబీ శ్రేణుల్లో తీవ్ర తర్జనభర్జన జరుగుతోంది.
ముగిసిన గడువు.. స్పందించని రోహిత్ రెడ్డి
ఇటీవల మొయినాబాద్ సమీపంలోని ఓ ఫామ్ హౌస్లో జరిగిన రేవ్ పార్టీపై టాస్క్ ఫోర్స్, ఈగల్ టీం సభ్యులు దాడి చేసిన విషయం విదితమే. ఈ దాడుల్లో పైలట్ రోహిత్ రెడ్డితో పాటు మరికొందరిని పోలీసులు అదుపులోకి తీసుకున్నారు. ఈ డ్రగ్స్ ఉదంతం తీవ్ర కలకలం రేపడంతో, బీఆర్ఎస్ అధిష్టానం వెంటనే స్పందించి రోహిత్ రెడ్డికి షోకాజ్ నోటీసులు జారీ చేసింది. వారం రోజుల్లోగా వివరణ ఇవ్వాలని ఆదేశించినప్పటికీ, శుక్రవారంతో గడువు ముగిసినా ఆయన నుంచి ఎలాంటి సమాధానం రాలేదని తెలుస్తోంది. దీంతో ఆయనపై సస్పెన్షన్ వేటు పడే అవకాశాలు మెండుగా ఉన్నాయని రాజకీయ వర్గాల్లో చర్చ నడుస్తోంది.
అధిష్టానం డైలమా.. ఉంచితే కష్టమా? వేటు వేస్తే నష్టమా?
రోహిత్ రెడ్డి విషయంలో బీఆర్ఎస్ సీనియర్ నాయకులు రెండు రకాలుగా ఆలోచిస్తున్నారు.
సస్పెండ్ చేస్తే: గతంలో సంచలనం సృష్టించిన ‘ఎమ్మెల్యేల కొనుగోలు కేసు’లో రోహిత్ రెడ్డి కీలక పాత్ర పోషించారు. ఇప్పుడు ఆయనను పార్టీ నుంచి దూరం పెడితే, అసంతృప్తితో పార్టీకి సంబంధించిన అంతర్గత విషయాలు లేదా రహస్యాలను బయటపెట్టి ఇరకాటంలో పెడతారా? అన్న ఆందోళన పార్టీ వర్గాల్లో ఉన్నట్లు తెలుస్తోంది.
పార్టీలో కొనసాగిస్తే: ఒకవేళ రోహిత్ రెడ్డిని కేవలం మందలించి వదిలేస్తే, రాబోయే రోజుల్లో ప్రతిపక్షాలకు అదొక ప్రధాన ఆయుధంగా మారుతుంది. డ్రగ్స్ ఆరోపణలను సాకుగా చూపి, వర్కింగ్ ప్రెసిడెంట్ కేటీఆర్తో పాటు పార్టీ మొత్తాన్ని టార్గెట్ చేసే అవకాశం ఉందని సీనియర్లు అధిష్టానం దృష్టికి తీసుకెళ్లినట్లు సమాచారం.
తాండూరులో ప్రత్యామ్నాయ నేత కోసం వేట
రోహిత్ రెడ్డిని తప్పిస్తే తాండూరు నియోజకవర్గంలో పార్టీ పగ్గాలు ఎవరికి అప్పగించాలన్నది బీఆర్ఎస్కు పెద్ద సవాల్గా మారింది. రోహిత్ రెడ్డి తర్వాత ఆ స్థాయిలో క్యాడర్ను నడిపించే బలమైన నాయకుడు ప్రస్తుతం అక్కడ కనిపించడం లేదు. ఆయన చిన్నాన్న పార్టీలో ఉన్నప్పటికీ బాధ్యతలు దక్కే అవకాశం లేదు. అలాగే, గతంలో కీలకంగా వ్యవహరించిన పట్నం వర్గం అధికార పార్టీలో చేరడం, మందకృష్ణ లాంటి నేతలు పార్టీని వీడటంతో బలమైన నాయకత్వ లేమి స్పష్టంగా కనిపిస్తోంది. బయటి ప్రాంతాల నుంచి ‘దిగుమతి’ చేసుకున్న నేతలను కాకుండా, స్థానికంగా ఉన్నవారికే అవకాశం ఇవ్వాలని పార్టీ భావిస్తోంది.
రేసులో ఉన్న ఆ ముగ్గురు నాయకులు వీరే..
ప్రస్తుత కాంగ్రెస్ ఎమ్మెల్యే బుయ్యని మనోహర్ రెడ్డిని ధీటుగా ఎదుర్కోవాలంటే బలమైన నాయకుడు కావాలి. ఈ నేపథ్యంలో ప్రధానంగా ముగ్గురు నేతల పేర్లను బీఆర్ఎస్ అధిష్టానం పరిశీలిస్తున్నట్లు సమాచారం:
శుభప్రద్ పటేల్: బీసీ కమిషన్ మాజీ సభ్యుడైన ఈయన, చాలా కాలంగా తాండూరు టికెట్ ఆశిస్తున్నారు. క్షేత్రస్థాయిలో ప్రజలతో సత్సంబంధాలు పెంచుకుంటూ బలమైన క్యాడర్ను సిద్ధం చేసుకుంటున్నారు.
పట్నం అవినాష్ రెడ్డి: షాబాద్ తాజా మాజీ జెడ్పీటీసీ అయిన అవినాష్ రెడ్డికి బాధ్యతలు ఇస్తే ఎలా ఉంటుందనే చర్చ కూడా జరుగుతోంది. ఈయన ద్వారా పట్నం మహేందర్ రెడ్డి వర్గాన్ని తిరిగి బీఆర్ఎస్ వైపు ఆకర్షించే అవకాశం ఉంటుందని పార్టీ అంచనా వేస్తోంది.
కొప్పుల అనిల్ రెడ్డి: మాజీ ఎమ్మెల్యే కొప్పుల హరీశ్వర్ రెడ్డి కుమారుడైన అనిల్ రెడ్డికి పార్టీ పగ్గాలు అప్పగించే యోచన కూడా అధిష్టానం చేస్తున్నట్లు తెలుస్తోంది.
ఏది ఏమైనా, డ్రగ్స్ కేసు ఆరోపణల నడుమ పైలట్ రోహిత్ రెడ్డి రాజకీయ భవితవ్యం డోలాయమానంలో పడింది. తాండూరులో బీఆర్ఎస్ తన పట్టును నిలుపుకోవడానికి ఎలాంటి సంచలన నిర్ణయం తీసుకుంటుందో వేచి చూడాలి.
