YSR Praja News Telugu : అమరావతి: డీఎస్సీ-2025లో జరిగిన అక్రమాలకు నైతిక బాధ్యత వహిస్తూ విద్యాశాఖ మంత్రి నారా లోకేశ్ తక్షణమే రాజీనామా చేయాలని వైఎస్సార్సీపీ డిమాండ్ చేసింది. విద్యార్థులు, నిరుద్యోగుల సమస్యల పరిష్కారం కోసం సోమవారం (ఆగస్టు 10న) రాష్ట్రవ్యాప్తంగా అన్ని అసెంబ్లీ నియోజకవర్గాల్లో పార్టీ తలపెట్టిన శాంతియుత ర్యాలీలను అడ్డుకునేందుకు ప్రభుత్వం పోలీసులను ఉసిగొల్పడాన్ని శాసనమండలి ప్రతిపక్ష నేత బొత్స సత్యన్నారాయణ తీవ్రంగా ఖండించారు. ఆదివారం ఆయన ఈ మేరకు ఒక పత్రికా ప్రకటన విడుదల చేశారు.
వైఎస్సార్సీపీ ప్రధాన డిమాండ్లు ఇవే:
డీఎస్సీ-2025 పరీక్షల్లో జరిగిన అక్రమాలపై సమగ్ర విచారణ జరిపించాలి. విద్యాశాఖ మంత్రి లోకేశ్ రాజీనామా చేయాలి.
విద్యార్థులకు పెండింగ్లో ఉన్న ఫీజు రీయింబర్స్మెంట్, వసతి దీవెన బకాయిలను వెంటనే విడుదల చేయాలి.
ఎన్నికల ముందు ఇచ్చిన హామీ మేరకు నిరుద్యోగ భృతిని తక్షణమే అమలు చేయాలి.
ప్రశ్నించే హక్కును కాలరాస్తున్నారు
సమస్యలపై పోరాడుతున్న వైఎస్సార్సీపీ నాయకులు, కార్యకర్తలకు ఎక్కడికక్కడ పోలీసులు ముందస్తు నోటీసులు ఇవ్వడం, ర్యాలీలకు అనుమతులు నిరాకరించడం అత్యంత దుర్మార్గమైన చర్య అని బొత్స సత్యన్నారాయణ మండిపడ్డారు. విద్యార్థులు, నిరుద్యోగ యువతకు జరిగిన అన్యాయంపై ప్రశ్నించే హక్కును ప్రభుత్వం కాలరాస్తోందని విమర్శించారు. గత కొద్ది రోజులుగా తమ పార్టీ ఆధ్వర్యంలో జరుగుతున్న ఉద్యమాలు అత్యంత శాంతియుతంగా, ప్రజాస్వామ్య పద్ధతుల్లో సాగుతున్నాయని, అయినా వాటిని అడ్డుకునేందుకు ప్రభుత్వం కుట్రలు చేయడం శోచనీయమన్నారు.
సీబీఐ విచారణకు ఎందుకు భయం?
“డీఎస్సీ పరీక్షల నిర్వహణలో ఎలాంటి అక్రమాలు జరగలేదని ప్రభుత్వం గట్టిగా భావిస్తే.. సీబీఐ విచారణకు ఎందుకు భయపడుతోంది?” అని బొత్స సూటిగా ప్రశ్నించారు. తమ న్యాయమైన సమస్యలపై విద్యార్థులు, నిరుద్యోగులు శాంతియుతంగా గొంతెత్తితే.. వారిని పోలీసు బలగాలతో అణిచివేయాలని చూడటం చంద్రబాబు నాయుడి ప్రభుత్వ పిరికితనానికి నిదర్శనమని ఆయన ఎద్దేవా చేశారు.
నోటీసులతో ప్రజాస్వామ్యాన్ని నిర్బంధించలేరు
ఎన్నికలకు ముందు యువతకు పెద్దఎత్తున హామీలు గుప్పించిన కూటమి పార్టీలు, అధికారంలోకి రాగానే వారిని నిలువునా మోసం చేస్తున్నాయని బొత్స ఆరోపించారు. ఈ మోసాన్ని ప్రశ్నిస్తున్న విద్యార్థులు, యువతతో పాటు ప్రతిపక్షంపై ప్రభుత్వం పోలీసు నిర్బంధాన్ని ప్రయోగిస్తోందని ఆగ్రహం వ్యక్తం చేశారు. డీఎస్సీ ప్రక్రియపై నిష్పక్షపాత విచారణ కోరుతుంటే, ప్రభుత్వం పోలీసు నోటీసులతో గొంతు నొక్కుతోందని విమర్శించారు. అరెస్టులు, అక్రమ కేసులు, నోటీసులతో ప్రజాస్వామ్యాన్ని ఎవరూ నిర్బంధించలేరని ఆయన స్పష్టం చేశారు.
వెనక్కి తగ్గేది లేదు.. ర్యాలీలు జరిగి తీరుతాయి
ప్రభుత్వం ఎన్ని ఆటంకాలు కల్పించినా, ఎన్ని నోటీసులు ఇచ్చినా.. ముందుగా నిర్ణయించిన ప్రకారం సోమవారం వైఎస్సార్సీపీ శాంతియుత ర్యాలీలు జరిగి తీరుతాయని బొత్స సత్యన్నారాయణ తేల్చిచెప్పారు. విద్యార్థులు, యువత భవిష్యత్తుతో ముడిపడిన ఈ అత్యంత కీలకమైన సమస్యపై ప్రభుత్వం స్పందించి చర్యలు తీసుకునే వరకు.. తమ పార్టీ వారి తరఫున పోరాటాన్ని అలుపెరగకుండా కొనసాగిస్తుందని ఆయన స్పష్టం చేశారు.
