YSR Praja News Telugu : కొడంగల్లో రోడ్డు విస్తరణ పేరుతో కూల్చివేసిన ముస్లిం మతపరమైన కట్టడాలను ప్రభుత్వం వెంటనే పునర్నిర్మించాలని, లేనిపక్షంలో నెల రోజుల్లోగా తీవ్రస్థాయి ఆందోళనలు చేపడతామని తెలంగాణ స్టేట్ మైనారిటీ హక్కుల పోరాట సమితి స్పష్టం చేసింది. ముఖ్యమంత్రి రేవంత్ రెడ్డి సొంత నియోజకవర్గమైన కొడంగల్లో ఏడాది కిందట జరిగిన ఈ ఘటనపై ప్రభుత్వం ఇప్పటివరకు స్పందించకపోవడం పట్ల సమితి రాష్ట్ర అధ్యక్షుడు అబ్దుల్ వాహబ్ తీవ్ర ఆగ్రహం వ్యక్తం చేశారు. ఈ మేరకు ఆయన ప్రభుత్వ వైఖరిని ఖండిస్తూ ఒక ప్రకటన విడుదల చేశారు.
హామీలకే పరిమితమైన పునర్నిర్మాణ చర్యలు
గత ఏడాది సెప్టెంబర్ మూడవ వారంలో మున్సిపల్ అధికారులు ఎలాంటి ముందస్తు నోటీసులు ఇవ్వకుండా, అర్ధరాత్రి వేళ బుల్డోజర్లతో హజ్రత్ మహబూబ్ సుభాని చిల్లా, పలు ఖాబ్రాస్తాన్లు (సమాధులు), అషురఖానాలను కూల్చివేశారని అబ్దుల్ వాహబ్ గుర్తుచేశారు. ఆ సమయంలో రాష్ట్రవ్యాప్తంగా నిరసనలు వ్యక్తమవ్వడంతో దెబ్బతిన్న కట్టడాలను ప్రభుత్వ ఖర్చులతోనే అదే స్థలంలో పునర్నిర్మిస్తామని అధికారులు, ప్రజాప్రతినిధులు హామీ ఇచ్చారని, కానీ ఏడాది పూర్తయినా ఆచరణలో ఒక్క అడుగు కూడా ముందుకు పడలేదని విమర్శించారు.
మాటలకే తప్ప ఆచరణకు నోచుకోని సంక్షేమం
“సీఎం రేవంత్ రెడ్డికి తన సొంత నియోజకవర్గంలోని ముస్లింలపై ఉన్న ప్రేమ, గౌరవం ఈ ఘటనతో స్పష్టమవుతోంది. గొప్పలు చెప్పడం తప్ప మైనారిటీల సంక్షేమం, వారి మనోభావాల పరిరక్షణపై ప్రభుత్వానికి ఎలాంటి చిత్తశుద్ధి లేదు” అని అబ్దుల్ వాహబ్ ధ్వజమెత్తారు. ఇప్పటికైనా ప్రభుత్వం కళ్లు తెరిచి కూల్చివేసిన ప్రార్థనా స్థలాలు, మహబూబ్ సుభాని చిల్లా, ఖాబ్రాస్తాన్లు, అషురఖానాలను తక్షణమే పునర్నిర్మించాలని డిమాండ్ చేశారు.
ప్రభుత్వానికి నెల రోజుల అల్టిమేటం
రాబోయే నెల రోజుల్లోగా పునర్నిర్మాణ పనులు చేపట్టకపోతే తెలంగాణ స్టేట్ మైనారిటీ హక్కుల పోరాట సమితి ఆధ్వర్యంలో దళిత, ప్రజా సంఘాలను కలుపుకొని కొడంగల్ నడిబొడ్డున భారీ ‘మహాధర్నా’ నిర్వహిస్తామని హెచ్చరించారు. మైనారిటీ వ్యతిరేక విధానాలు అవలంబిస్తున్న ప్రభుత్వానికి ప్రజలే తగిన సమయంలో తగిన బుద్ధి చెబుతారని స్పష్టం చేశారు.
ఈ కార్యక్రమంలో మైనారిటీ నాయకులు డాక్టర్ నవాజ్, కొడంగల్ పట్టణ అధ్యక్షుడు మొహమ్మద్ రఫీఖ్ తదితరులు పాల్గొన్నారు.
