YSR Praja News Telugu : ధర్మశాల: క్రికెట్ అభిమానులను ఉర్రూతలూగిస్తున్న ఐపీఎల్ 2026 (IPL 2026) సీజన్లో ఒక ఊహించని, అత్యంత తీవ్రమైన వివాదం తెరపైకి వచ్చింది. క్రికెట్ ప్రపంచంలోనే అత్యంత సంపన్నమైన, ప్రతిష్టాత్మకమైన లీగ్ను నిర్వహిస్తున్న భారత క్రికెట్ నియంత్రణ మండలి (BCCI), స్థానిక నిర్వాహకులు చేసిన ఒక ఘోర తప్పిదం ఇప్పుడు దేశవ్యాప్తంగా తీవ్ర దుమారం రేపుతోంది. క్వాలిఫైయర్ 1 మ్యాచ్ వేదికగా దేశ పటాన్ని (India Map) తప్పుగా ప్రదర్శించి ఐపీఎల్ నిర్వాహకులు అభాసుపాలయ్యారు. ఈ బాధ్యతారాహిత్యంపై సోషల్ మీడియా వేదికగా నెటిజన్లు, క్రికెట్ అభిమానులు ఓ రేంజ్లో విరుచుకుపడుతున్నారు.
అసలేం జరిగిందంటే..
హిమాచల్ ప్రదేశ్లోని అత్యంత రమణీయమైన ధర్మశాల క్రికెట్ స్టేడియం (HPCA) మంగళవారం రాత్రి రాయల్ ఛాలెంజర్స్ బెంగళూరు (RCB), గుజరాత్ టైటాన్స్ (GT) జట్ల మధ్య జరిగిన క్వాలిఫైయర్-1 మ్యాచ్కు ఆతిథ్యం ఇచ్చింది. ఇరు జట్ల మిడ్ ఇన్నింగ్స్ (విరామ సమయం) బ్రేక్ సమయంలో మైదానంలో ఉన్న ప్రేక్షకులను, టీవీల్లో చూస్తున్న కోట్లాది మంది అభిమానులను అలరించడానికి నిర్వాహకులు ఒక సరికొత్త ‘సౌండ్ అండ్ లైట్ షో’ను ఏర్పాటు చేశారు. సుమారు 25 నిమిషాల పాటు అత్యంత అట్టహాసంగా సాగిన ఈ లేజర్ షోలో.. ఐపీఎల్ ట్రోఫీతో పాటు లేజర్ కాంతులతో భారతదేశ మ్యాప్ను మైదానంలో ప్రదర్శించారు.
కానీ, ఇక్కడే నిర్వాహకులు ఒక బ్లండర్ మిస్టేక్ చేశారు. మైదానంలో లేజర్తో ప్రదర్శించిన ఆ భారతదేశ మ్యాప్ పూర్తిగా అసంపూర్ణంగా ఉంది. ఆ మ్యాప్లో దేశ శిరస్సు లాంటి జమ్మూ కాశ్మీర్తో పాటు, అత్యధిక జనాభా కలిగిన ఉత్తరప్రదేశ్, బీహార్ రాష్ట్రాలు కనిపించలేదు. వీటికి తోడు దేశంలో అంతర్భాగమైన ఈశాన్య భారత రాష్ట్రాలు (నార్త్ ఈస్ట్ – సెవెన్ సిస్టర్స్) చాలా వరకు అందులో గల్లంతయ్యాయి. ఈ అసంపూర్ణ మ్యాప్ను ప్రత్యక్ష ప్రసారంలో చూసిన క్రికెట్ అభిమానులు, దేశ ప్రజలు ఒక్కసారిగా షాక్కు గురయ్యారు.
భగ్గుమంటున్న నెటిజన్లు..
భారతదేశ ప్రాంతీయ సమగ్రతను, సార్వభౌమత్వాన్ని దెబ్బతీసేలా ఉన్న ఈ తప్పుడు మ్యాప్ విజువల్స్ నిమిషాల వ్యవధిలోనే సోషల్ మీడియాలో (X, ఇన్స్టాగ్రామ్) వైరల్గా మారాయి. వందల కోట్ల రూపాయలు వెచ్చించి లీగ్ను నిర్వహిస్తున్న వారికి, కనీసం మన దేశ పటాన్ని కూడా సరిగ్గా ప్రదర్శించలేరా? అంటూ అభిమానులు మండిపడుతున్నారు. ఇది కేవలం టెక్నికల్ గ్రాఫిక్స్ చేసిన పొరపాటు మాత్రమే కాదని, దేశ గౌరవానికి సంబంధించిన అత్యంత తీవ్రమైన విషయమని నెటిజన్లు ఫైర్ అవుతున్నారు. ఈ ఘోర తప్పిదానికి కారణమైన బీసీసీఐ ఉన్నతాధికారులు, ఐసీసీ చీఫ్ జై షా, హిమాచల్ ప్రదేశ్ క్రికెట్ అసోసియేషన్ (HPCA) యాజమాన్యం తక్షణమే దేశ ప్రజలకు క్షమాపణలు చెప్పాలని, బాధ్యులపై కఠిన చర్యలు తీసుకోవాలని డిమాండ్ చేస్తున్నారు.
పరుగుల వరద పారించిన ఆర్సీబీ.. పటీదార్ సునామీ!
ఒకపక్క ఈ వివాదం తీవ్రంగా కొనసాగుతుండగానే.. మైదానంలో మాత్రం రాయల్ ఛాలెంజర్స్ బెంగళూరు (RCB) బ్యాటర్లు పరుగుల వరద పారించారు. అత్యంత కీలకమైన ఈ క్వాలిఫైయర్ సమరంలో టాస్ ఓడి మొదట బ్యాటింగ్కు దిగిన ఆర్సీబీ.. నిర్ణీత 20 ఓవర్లలో 5 వికెట్ల నష్టానికి 254 పరుగుల భారీ స్కోరు సాధించింది. గుజరాత్ బౌలర్లను ఆర్సీబీ బ్యాటర్లు ఊచకోత కోశారు.
ముఖ్యంగా ఆర్సీబీ కెప్టెన్ రజత్ పటీదార్ క్రీజులో శివతాండవం చేశాడు. బౌలర్ ఎవరైనా సరే బంతిని బౌండరీ దాటించడమే లక్ష్యంగా చెలరేగిపోయాడు. గుజరాత్ బౌలర్లను సునామీలా చుట్టుముట్టిన పటీదార్.. కేవలం 33 బంతుల్లోనే 5 బౌండరీలు (ఫోర్లు), ఏకంగా 9 భారీ సిక్సర్ల సాయంతో 93 పరుగులు చేసి నాటౌట్గా నిలిచాడు. తృటిలో సెంచరీ చేజార్చుకున్నప్పటికీ.. జట్టుకు కొండంత స్కోరును అందించాడు.
ఇన్నింగ్స్ విరామంలో ప్లేఆఫ్స్ చేరిన జట్ల వివరాలు, మ్యూజికల్ పెర్ఫార్మెన్స్లతో షో అదిరిపోయినప్పటికీ, క్రికెట్ అభిమానులు పటీదార్ ఇన్నింగ్స్ను ఆస్వాదించినప్పటికీ.. చివర్లో జరిగిన ఈ ‘ఇండియా మ్యాప్’ వివాదంతో బీసీసీఐ పరువు బజారున పడినట్లయింది. ఈ వివాదంపై బోర్డు ఎలా స్పందిస్తుందో చూడాలి.
