YSR Praja News Telugu : రాష్ట్రంలో ఆచరణకు ఏమాత్రం సాధ్యంకాని అమరావతి రాజధాని పేరుతో ముఖ్యమంత్రి నారా చంద్రబాబు నాయుడు ప్రజలను తీవ్రంగా మోసం చేస్తున్నారని వైఎస్సార్సీపీ రాష్ట్ర సంయుక్త కార్యదర్శి మల్లు సురేంద్ర రెడ్డి తీవ్రస్థాయిలో ధ్వజమెత్తారు. కేవలం తన సొంత రియల్ ఎస్టేట్ ప్రయోజనాలు, బినామీల వ్యాపారాల కోసమే ఆయన పదేపదే అమరావతి జపం చేస్తున్నారని దుయ్యబట్టారు. అమరావతి రాజధానికి పూర్తిస్థాయి ప్రత్యామ్నాయంగా మాజీ ముఖ్యమంత్రి వైఎస్ జగన్మోహన్ రెడ్డి ఎంతో ముందుచూపుతో తెరపైకి తెచ్చిన ‘మావిగన్’ (మచిలీపట్నం, విజయవాడ, గుంటూరు) కారిడార్తోనే రాష్ట్ర సమగ్రాభివృద్ధి సాధ్యమవుతుందని ఆయన స్పష్టం చేశారు. మంగళవారం ఆయన మీడియాతో మాట్లాడుతూ కూటమి ప్రభుత్వం తీసుకుంటున్న నిర్ణయాలపై, అధికారుల తీరుపై నిప్పులు చెరిగారు.
అదొక అతిపెద్ద ఆర్థిక కుంభకోణం
రాష్ట్ర ఆర్థిక పరిస్థితి ఏమాత్రం ఆశాజనకంగా లేని ప్రస్తుత తరుణంలో, అమరావతి నిర్మాణమనేది కేవలం ఒక పగటికల అని సురేంద్ర రెడ్డి ఎద్దేవా చేశారు. అమరావతి ప్రాంతంలో భౌగోళిక పరిస్థితుల దృష్ట్యా అక్కడ కనీస మౌలిక సదుపాయాలు అయిన రోడ్లు, డ్రైనేజీ వ్యవస్థ, కరెంటు, త్రాగునీరు వంటివి కల్పించాలన్నా ఎకరాకు సుమారు రూ. 2 కోట్లకు పైగా ఖర్చవుతుందని ఆయన విశ్లేషించారు. కేవలం ఆడంబరమైన భవనాల నిర్మాణం కోసమే లక్షల కోట్లు అప్పులు తెస్తారా? అని ఆయన ప్రభుత్వాన్ని నిలదీశారు. అంతపెద్ద ఎత్తున అప్పులు తీసుకొస్తే, ఆ భారాన్ని అంతిమంగా ప్రజల నెత్తిమీద రుద్దుతారని, ఇది భావితరాలకు తీరని నష్టమని ఆయన ఆవేదన వ్యక్తం చేశారు. అమరావతి అనేది రాష్ట్ర భవిష్యత్తు కోసం చేస్తున్న నిర్మాణం కాదని, చంద్రబాబు ఆయన అనుయాయుల దోపిడీకి అనువైన అతిపెద్ద కుంభకోణం అని తీవ్రస్థాయిలో ఆరోపించారు.
వాస్తవాలు దాస్తున్న సీఆర్డీఏ అధికారులు
కూటమి ప్రభుత్వ పెద్దల ఒత్తిళ్లకు తలొగ్గి రాజధాని ప్రాంత అభివృద్ధి ప్రాధికార సంస్థ (CRDA) అధికారులు సైతం క్షేత్రస్థాయి వాస్తవాలను పక్కనబెడుతున్నారని సురేంద్ర రెడ్డి ధ్వజమెత్తారు. అమరావతి నిర్మాణానికి లక్షల కోట్ల నిధులు ఎక్కడి నుంచి వస్తాయో కనీస అవగాహన లేకపోయినా, గుడ్డిగా పాలకుల భ్రమల్లో అధికారులు సైతం కొట్టుకుపోవడం దారుణమన్నారు. ప్రజలు కట్టిన పన్నుల రూపంలో ఉన్న ప్రజాధనం వృథా అవుతున్నా, కనీస సామాజిక బాధ్యత లేకుండా అక్రమాలకు వంతపాడుతున్న అధికారుల తీరు భవిష్యత్తులో తీవ్ర పరిణామాలకు దారితీస్తుందని హెచ్చరించారు. గ్రౌండ్ రియాలిటీని, క్షేత్రస్థాయిలో ఉన్న వాస్తవాలను ప్రభుత్వానికి ధైర్యంగా నివేదించాల్సిన అధికారులే, వాస్తవాలను దాస్తూ రియల్ ఎస్టేట్ బ్రోకర్లలా వ్యవహరించడం వ్యవస్థీకృత లోపానికి అద్దం పడుతోందని ఆయన విమర్శించారు.
‘మావిగన్’తోనే అద్భుతమైన గ్రోత్ ఇంజిన్
అమరావతిపై మూర్ఖపు పట్టుదలకు ప్రత్యామ్నాయంగా జగన్ ఎంతో ముందుచూపుతో ప్రాక్టికల్ ప్లాన్ ‘మావిగన్’ (MAVIGAN) ను ప్రతిపాదించారని సురేంద్ర రెడ్డి వివరించారు. సముద్ర రేవు (పోర్టు) అందుబాటులో ఉన్న మచిలీపట్నం, రాష్ట్రంలోనే అతిపెద్ద వాణిజ్య కేంద్రమైన విజయవాడ, విద్యా మరియు వ్యవసాయ కేంద్రమైన గుంటూరులను కలుపుతూ ఉన్న సుమారు 110 కిలోమీటర్ల కారిడార్ను రాజధాని ప్రాంతంగా గుర్తిస్తే సహజంగానే అద్భుతమైన అభివృద్ధి సాధ్యమవుతుందన్నారు. ఇక్కడ అప్పటికే విస్తృతమైన జాతీయ రహదారులు, రైల్వే నెట్వర్క్, గన్నవరం అంతర్జాతీయ ఎయిర్పోర్టు, ఓడరేవు వంటి అత్యుత్తమ మౌలిక వసతులు అందుబాటులో ఉన్నాయని గుర్తుచేశారు. దీనికి తోడు ఈ ప్రాంతంలో సుమారు 40 లక్షల పైచిలుకు జనాభా అందుబాటులో ఉన్నారని, మానవ వనరుల పరంగా ఇది ఎంతో అనుకూలమైన ప్రాంతమని స్పష్టం చేశారు. దీనికోసం ప్రత్యేకంగా లక్షల కోట్లు అప్పులు చేయాల్సిన పనే లేదని, అతి తక్కువ ఖర్చుతో వెంటనే అద్భుతమైన ఫలితాలనిచ్చే అసలైన “గ్రోత్ ఇంజిన్” రాష్ట్రానికి మావిగన్ మాత్రమేనని ఆయన స్పష్టం చేశారు.
డైవర్షన్ పాలిటిక్స్ మానుకోవాలి
ఎంతో ఆచరణాత్మకమైన మావిగన్ ప్రతిపాదనతో రాష్ట్ర ప్రజల్లో, మేధావుల్లో వస్తున్న సానుకూల చర్చను చూసి అధికార కూటమి ఉలిక్కిపడుతోందని సురేంద్ర రెడ్డి అన్నారు. వాస్తవాల నుంచి, పాలకుల వైఫల్యాల నుంచి ప్రజల దృష్టిని మరల్చేందుకే చంద్రబాబు నాయుడు డైవర్షన్ పాలిటిక్స్ చేస్తున్నారని విమర్శించారు. ఇప్పటికైనా ప్రభుత్వం పనికిమాలిన భేషజాలకు పోకుండా, ఆచరణ సాధ్యం కాని అమరావతి భ్రమలను పక్కనబెట్టాలని హితవు పలికారు. రాష్ట్ర ప్రయోజనాల దృష్ట్యా, రాష్ట్ర భవిష్యత్తు దృష్ట్యా మావిగన్ కారిడార్ను అభివృద్ధి చేసే దిశగా తక్షణమే అడుగులు వేయాలని మల్లు సురేంద్ర రెడ్డి గట్టిగా డిమాండ్ చేశారు.
