YSR Praja News Telugu : వికారాబాద్: తమ దశాబ్దాల కలలను, న్యాయమైన సమస్యలను ప్రభుత్వం వెంటనే పరిష్కరించాలని డిమాండ్ చేస్తూ వికారాబాద్ జిల్లా కేంద్రంలో అంగన్వాడీ కార్యకర్తలు కదం తొక్కారు. తెలంగాణ అంగన్వాడీ అండ్ హెల్పర్స్ యూనియన్ (సీఐటీయూ) వికారాబాద్ జిల్లా కమిటీ పిలుపుమేరకు గురువారం పెద్ద ఎత్తున తరలివచ్చిన అంగన్వాడీ టీచర్లు, హెల్పర్లు జిల్లా కలెక్టర్ కార్యాలయాన్ని ముట్టడించారు. కలెక్టరేట్ ముందు బైఠాయించి ప్రభుత్వానికి వ్యతిరేకంగా నినాదాలు చేస్తూ భారీ ధర్నా కార్యక్రమాన్ని నిర్వహించారు. అనంతరం జిల్లా పాలనాధికారికి తమ డిమాండ్లతో కూడిన వినతిపత్రాన్ని అందజేశారు.
ఈ మహా ధర్నాను ఉద్దేశించి సీఐటీయూ రాష్ట్ర కార్యదర్శి పి. జయలక్ష్మి, జిల్లా కార్యదర్శి కే. శ్రీనివాస్, అంగన్వాడీ యూనియన్ జిల్లా కార్యదర్శి నర్సమ్మ ప్రసంగించారు. తాము అడుగుతున్నవి అమలు చేయలేని గొంతెమ్మ కోరికలు కావని, అత్యంత పారదర్శకంగా, న్యాయబద్ధంగా ఉన్న తమ సమస్యలను పరిష్కరించే దిశగా రాష్ట్ర ప్రభుత్వం చిత్తశుద్ధితో వ్యవహరించాలని వారు డిమాండ్ చేశారు. రాబోయే అసెంబ్లీ బడ్జెట్ సమావేశాల్లో అంగన్వాడీ టీచర్లు, హెల్పర్ల వేతనాన్ని రూ. 18,000లకు పెంచుతూ ప్రకటన చేయాలని వారు స్పష్టం చేశారు. ఐసీడీఎస్ (ICDS) మనుగడ సాగాలంటే బడ్జెట్లో సరిపడా నిధులు కేటాయించాల్సిన ఆవశ్యకతను వారు ఈ సందర్భంగా గుర్తుచేశారు.
అనంతరం అంగన్వాడీ యూనియన్ నాయకులు తమ డిమాండ్లను పలు విభాగాల వారీగా ప్రభుత్వ దృష్టికి తీసుకెళ్లారు. ఆయా డిమాండ్ల పూర్తి వివరాలు ఇలా ఉన్నాయి:
వేతనాలు, బకాయిల చెల్లింపులు
అంగన్వాడీల కనీస వేతనాన్ని రూ. 26,000గా నిర్ణయించాలని యూనియన్ నాయకులు డిమాండ్ చేశారు. గతంలో చేసిన 24 రోజుల సమ్మె కాలానికి సంబంధించిన వేతనాలను వెంటనే విడుదల చేయాలన్నారు. అలాగే, మినీ అంగన్వాడీ టీచర్లకు రావాల్సిన 11 నెలల ఏరియర్స్, 2021 జూలై, అక్టోబర్, నవంబర్ నెలలకు సంబంధించిన మూడు నెలల పీఆర్సీ (PRC) బకాయిలను తక్షణమే చెల్లించాలన్నారు. 2017 నుంచి పెండింగ్లో ఉన్న టీఏ, డీఏలు, ఇన్చార్జ్ అలవెన్సులు ఇవ్వాలని, సీనియారిటీని ప్రాతిపదికగా తీసుకొని ఇంక్రిమెంట్లు అమలు చేయాలని కోరారు.
ఉద్యోగ భద్రత, సామాజిక సంక్షేమం
అంగన్వాడీ టీచర్లు, హెల్పర్లందరికీ పీఎఫ్ (PF), ఈఎస్ఐ (ESI) సౌకర్యాలు కల్పించి సామాజిక భద్రత కల్పించాలని నేతలు డిమాండ్ చేశారు. రాష్ట్రంలో అంగన్వాడీలకు ఉద్యోగ భద్రత కల్పించేలా జీఓ నెం.14ను సవరించాలన్నారు. అదేవిధంగా జీఓ నెం.80 ని సవరించి, 2024 జూలై 1 నుంచి పదవీ విరమణ పొందిన వారందరికీ దానిని వర్తింపజేయాలని కోరారు. రిటైర్ అయిన టీచర్లకు రూ. 2 లక్షలు, హెల్పర్లకు రూ. 1 లక్షల బెనిఫిట్ వెంటనే చెల్లించడంతో పాటు, ఎటువంటి షరతులు లేకుండా ఆసరా పెన్షన్ మంజూరు చేయాలని విజ్ఞప్తి చేశారు. సమ్మె ఒప్పందం ప్రకారం.. విధి నిర్వహణలో మరణించిన అంగన్వాడీలకు రూ. 2 లక్షల ప్రమాద బీమా సౌకర్యం కల్పించాలని, కారుణ్య నియామకాలను వేగవంతం చేయాలని కోరారు. రాష్ట్ర ప్రభుత్వ సంక్షేమ పథకాలన్నింటినీ అంగన్వాడీలకు వర్తింపజేయాలన్నారు.
విద్యా విధానం, మౌలిక వసతులు
కేంద్ర ప్రభుత్వం తీసుకువచ్చిన జాతీయ విద్యా విధానం (NEP)-2020 ని తీవ్రంగా వ్యతిరేకిస్తున్నామని, దీనికి వ్యతిరేకంగా రాష్ట్ర అసెంబ్లీలో తీర్మానం చేయాలని నాయకులు ప్రభుత్వాన్ని కోరారు. 2026 ఎడ్యుకేషన్ పాలసీని సవరించాలని, రాష్ట్రంలో ప్రీ-ప్రైమరీ (పీఎం శ్రీ) విద్యను అంగన్వాడీ కేంద్రాల్లోనే కొనసాగించాలని స్పష్టం చేశారు. అంగన్వాడీ కేంద్రాలకు పక్కా భవనాలు నిర్మించి, మౌలిక వసతులు మెరుగుపరచాలన్నారు. ఆరోగ్య లక్ష్మి పథకం కింద ఇస్తున్న మెనూ చార్జీలను పెంచాలని.. పిల్లలకు రూ. 5, గర్భిణులు, బాలింతలకు రూ. 10 చొప్పున కేటాయించాలన్నారు. ప్రతి కేంద్రానికి డబుల్ సిలిండర్ సదుపాయం కల్పించాలన్నారు.
పని భారం తగ్గింపు – సాంకేతిక సమస్యల పరిష్కారం
అంగన్వాడీ కేంద్రాల్లో ఖాళీగా ఉన్న పోస్టులను వెంటనే భర్తీ చేసి పని భారం తగ్గించాలని డిమాండ్ చేశారు. ప్రస్తుతం ఉన్న ఎస్ఆర్ఎస్ (SRS) యాప్ను రద్దు చేసి, అన్ని పనులకు వీలుగా ఒకే ఆన్లైన్ యాప్ ఉండేలా చూడాలన్నారు. విధి నిర్వహణ కోసం 5G నెట్వర్క్ సదుపాయం ఉన్న స్మార్ట్ ఫోన్లను అందించాలని కోరారు. కేంద్ర స్త్రీ, శిశు సంక్షేమ శాఖ ఆదేశాల ప్రకారం అంగన్వాడీలకు బీఎల్ఓ (BLO) డ్యూటీలను రద్దు చేయాలని, ఐసీడీఎస్తో సంబంధం లేని ఇతర పనులను తమతో చేయించకూడదని స్పష్టం చేశారు. వేసవి తీవ్రత దృష్ట్యా మార్చి 16 నుంచి ఒంటిపూట బడులు నిర్వహించాలని, మే 1 నుంచి 31 వరకు టీచర్లు, హెల్పర్లకు ఆటంకాలు లేకుండా సెలవులు మంజూరు చేయాలని విజ్ఞప్తి చేశారు.
ప్రభుత్వం స్పందించి ఈ సమస్యలను సత్వరమే పరిష్కరించాలని, లేనిపక్షంలో భవిష్యత్తులో ఆందోళనలు మరింత ఉధృతం చేస్తామని నాయకులు హెచ్చరించారు. ఈ కార్యక్రమంలో సీఐటీయూ జిల్లా అధ్యక్షులు పి. రామకృష్ణ, జిల్లా కోశాధికారి బుస్స చంద్రయ్య, అంగన్వాడీ యూనియన్ జిల్లా ఉపాధ్యక్షురాళ్లు బాలమణి, బేబి, మనోహర, ప్రాజెక్టుల అధ్యక్ష కార్యదర్శులు మంజుల, భారతమ్మ, రేణుక, సంతోష, సుజాత, రామంజమ్మ, రాజేశ్వరి, మల్లమ్మ తదితరులతో పాటు పెద్ద సంఖ్యలో అంగన్వాడీ కార్యకర్తలు పాల్గొన్నారు.
