YSR Praja News Telugu : కాకినాడ జిల్లాలో శనివారం గుండెలను పిండేసే అత్యంత విషాదకరమైన ఘటన చోటుచేసుకుంది. సామర్లకోట మండల పరిధిలోని వేట్లపాలెంలో ఉన్న ఓ బాణసంచా తయారీ కేంద్రంలో భారీ పేలుడు సంభవించి ఏకంగా 23 మంది కార్మికులు సజీవ దహనమయ్యారు. మంటలు అకస్మాత్తుగా ఎగసిపడటంతో ప్రాణాలు దక్కించుకునే అవకాశం లేక కార్మికులు అగ్నికి ఆహుతయ్యారు.
పేలుడు తీవ్రతకు పొలాల్లోకి ఎగిరిపడ్డ మృతదేహాలు
ప్రమాద సమయంలో పేలుడు ధాటి చాలా తీవ్రంగా ఉందని, కార్మికుల మృతదేహాలు ఛిద్రమై సమీపంలోని వ్యవసాయ పొలాల్లోకి ఎగిరిపడ్డాయని స్థానికులు భయాందోళనలతో చెబుతున్నారు. తీవ్రంగా గాయపడిన పలువురిని ఆసుపత్రికి తరలించారు. క్షతగాత్రుల్లో కొందరి పరిస్థితి విషమంగా ఉండటంతో మృతుల సంఖ్య మరింత పెరిగే అవకాశం ఉందని అధికారులు ఆందోళన వ్యక్తం చేస్తున్నారు.
ప్రాథమిక సమాచారం మేరకు మృతుల్లో కింది వారు ఉన్నట్లు గుర్తించారు:
అడబాల శ్రీను
కడిపల్లి కృపమ్మ
ధనరాజు
సాధనాల సత్యవతి
వల్లూరి రవి
రాము
గంపల మంగ
గోడత మహేష్
మందపల్లి చిన్ని
నిమ్మడ కరుణ
గౌట్ట మహేష్
రమణ
నాని
డీఎన్ఏ పరీక్షల ద్వారానే మృతదేహాల గుర్తింపు
ప్రమాదంలో మృతదేహాలు గుర్తుపట్టలేనంతగా కాలిపోవడంతో, మృతుల గుర్తింపు అధికారులకు సవాలుగా మారింది. దీంతో డీఎన్ఏ (DNA) పరీక్షల ఆధారంగా మృతదేహాలను గుర్తించి, రిపోర్టులు వచ్చిన తర్వాతే బాధిత కుటుంబ సభ్యులకు భౌతికకాయాలను అప్పగించాలని అధికారులు నిర్ణయించారు.
కొనసాగుతున్న మృత్యుఘోష: జిల్లాలో బాణసంచా ప్రమాదాల చరిత్ర
ఉమ్మడి తూర్పుగోదావరి జిల్లా పరిధిలోని వేట్లపాలెం, జువ్విపాడు, ద్రాక్షారామ, వేళంగి, రాయవరం, వి. సావరం, కొమురిపాలెం, బిక్కవోలు, మండపేట తదితర ప్రాంతాలు బాణసంచా తయారీకి ఎంతో ప్రసిద్ధి. ఇక్కడి వ్యాపారులకు ఏడాది పొడవునా చేతినిండా పని ఉంటుంది. నిబంధనల ప్రకారం తయారీ కోసం ఫారమ్ 20, అమ్మకాల కోసం ఫారమ్ 24 లైసెన్సులు జారీ చేస్తారు. జిల్లా వ్యాప్తంగా సుమారు 50కి పైగా లైసెన్స్డ్ కేంద్రాలున్నప్పటికీ.. భద్రతా ప్రమాణాల లేమి వల్ల తరచూ ఇక్కడ ప్రాణనష్టం జరుగుతూనే ఉంది.
గతంలో జిల్లాను కలచివేసిన ప్రధాన విషాదాలు:
వాకతిప్ప ఘోరం (2014 అక్టోబర్ 22): యు.కొత్తపల్లి మండలం వాకతిప్పలోని బాణసంచా కేంద్రంలో జరిగిన పేలుడులో 18 మంది కార్మికులు మృత్యువాత పడ్డారు. ఈ ఘటన యాజమాన్యాల లోపాలను తీవ్రంగా ఎత్తిచూపింది.
రాయవరం పేలుడు (గతేడాది): శ్రీ గణపతి గ్రాండ్ ఫైర్ వర్క్స్లో జరిగిన భారీ పేలుడులో నలుగురు మహిళలు, ఇద్దరు పురుషులు అక్కడికక్కడే దుర్మరణం పాలయ్యారు.
విలస అగ్నిప్రమాదం: కోనసీమ జిల్లా అయినవిల్లి మండలం విలస గ్రామంలోని ఓ కిరాణా షాపులో బాణసంచా పేలి కంచర్ల శ్రీనివాసరావు, సీతామాంబ అనే భార్యాభర్తలు ప్రాణాలు కోల్పోయారు.
ప్రభుత్వాలు, అధికారులు ఎన్ని నిబంధనలు పెడుతున్నా.. క్షేత్రస్థాయిలో భద్రతా లోపాలు అమాయక కార్మికుల పాలిట శాపంగా మారుతున్నాయని ఈ తాజా ఘటన మరోసారి రుజువు చేసింది.
