YSR Praja News Telugu : రాష్ట్రంలోని కాంగ్రెస్ ప్రభుత్వంపై భారత రాష్ట్ర సమితి (బీఆర్ఎస్) వర్కింగ్ ప్రెసిడెంట్ కల్వకుంట్ల తారక రామారావు (కేటీఆర్) తీవ్ర స్థాయిలో విరుచుకుపడ్డారు. తెలంగాణ రాష్ట్రం ఏర్పడిన తర్వాత రైతులు ఇంతటి దౌర్భాగ్య, దయనీయ పరిస్థితులను ఎన్నడూ ఎదుర్కోలేదని ఆయన ఆవేదన వ్యక్తం చేశారు. రాజన్న సిరిసిల్ల జిల్లా తంగళ్లపల్లి మండలం రామనపల్లిలో శనివారం ఏర్పాటు చేసిన డాక్టర్ బి.ఆర్. అంబేద్కర్ విగ్రహావిష్కరణ కార్యక్రమంలో ఆయన పాల్గొన్నారు. ఈ సందర్భంగా ఆయన మాట్లాడుతూ.. రాష్ట్రంలో నెలకొన్న తాజా పరిస్థితులు, రైతుల కష్టాలు, కాంగ్రెస్ ప్రభుత్వ వైఫల్యాలపై ఘాటు విమర్శలు చేశారు.
అంబేద్కర్ మార్గంలోనే తెలంగాణ సాధన
విశ్వమేధావి డాక్టర్ బి.ఆర్. అంబేద్కర్ విగ్రహాన్ని ఆవిష్కరించడం తన అదృష్టంగా భావిస్తున్నానని కేటీఆర్ పేర్కొన్నారు. వందేళ్ల క్రితమే లండన్ లాంటి దేశాల్లో ఉన్నత విద్యను అభ్యసించిన గొప్ప దార్శనికుడు అంబేద్కర్ అని కొనియాడారు. ఆయన రచించిన రాజ్యాంగం, చూపిన పోరాట స్ఫూర్తితోనే 14 ఏళ్ల పాటు అలుపెరగని పోరాటం చేసి తెలంగాణ రాష్ట్రాన్ని సాధించుకున్నామని గుర్తుచేశారు. కేసీఆర్ నాయకత్వంలోని బీఆర్ఎస్ ప్రభుత్వం పదేళ్ల పాటు అన్ని కులాలు, మతాలకు అండగా నిలిచి సుపరిపాలన అందించిందని స్పష్టం చేశారు.
కాంగ్రెస్ది దళిత వ్యతిరేక చరిత్ర
ఈ సందర్భంగా కాంగ్రెస్ పార్టీ చరిత్రను కేటీఆర్ ఎండగట్టారు. 1952-54 కాలంలో దళిత ఆశాజ్యోతి అంబేద్కర్ పార్లమెంట్లో అడుగుపెట్టకుండా అడ్డుకుని, ఆయన ఓటమికి కారణమైన ఘనత కాంగ్రెస్ పార్టీదేనని దుయ్యబట్టారు. దేశానికి అంతటి గొప్ప రాజ్యాంగాన్ని అందించిన ఆ మహనీయుడికి కాంగ్రెస్ హయాంలో కనీస గుర్తింపు దక్కలేదని, కాంగ్రెసేతర ప్రభుత్వం వల్లే ఆయనకు ‘భారతరత్న’ పురస్కారం దక్కిందని గుర్తుచేశారు. ప్రజలకు ఓటు హక్కు కల్పించిన గొప్ప వ్యక్తి అంబేద్కర్ అని, ఆ హక్కును వినియోగించుకునేటప్పుడు ప్రజలు అప్రమత్తంగా ఉండి ఆలోచించి ఓటు వేయాలని ఆయన పిలుపునిచ్చారు.
కొనుగోలు కేంద్రాల్లో దగా.. దళారులకే లాభం
రాష్ట్రంలో అన్నదాతల పరిస్థితి అత్యంత దారుణంగా మారిందని కేటీఆర్ మండిపడ్డారు. రైతులు నెల రోజుల క్రితమే కల్లాలకు ధాన్యం తెచ్చినా, ఇప్పటివరకు ప్రభుత్వం ఒక్క గింజ కూడా కొనుగోలు చేయలేదని ఆగ్రహం వ్యక్తం చేశారు. ధాన్యం కొనుగోలు చేస్తే మద్దతు ధరతో పాటు, ఎన్నికల్లో ఇచ్చిన హామీ మేరకు బోనస్ కూడా చెల్లించాల్సి వస్తుందనే నెపంతోనే రాష్ట్ర ప్రభుత్వం కొనుగోళ్లలో ఉద్దేశపూర్వకంగా జాప్యం చేస్తోందని ఆరోపించారు. ప్రభుత్వ తీరుతో విసిగిపోయిన రైతులు, వానలకు పంట ఎక్కడ తడిసిపోతుందోననే భయంతో కవర్లు కప్పుకుంటూ అరిగోస పడుతున్నారన్నారు. గత్యంతరం లేని పరిస్థితుల్లో తమ కష్టాన్ని దళారులకు తక్కువ ధరకు అమ్ముకుని నష్టపోతున్నారని ఆవేదన వ్యక్తం చేశారు.
అటకెక్కిన హామీలు.. అస్తవ్యస్తమైన పాలన
తాము రైతుల పక్షపాతి అని చెప్పుకునే కాంగ్రెస్ నాయకులు, ఆచరణలో మాత్రం రైతులను నిలువునా ముంచుతున్నారని విమర్శించారు. గతంలో క్రమం తప్పకుండా పడిన రైతుబంధు ఇప్పుడు ఎకరాల వారీగా, నెలల తరబడి వాయిదాల పద్ధతిలో ఇస్తున్నారని ఎద్దేవా చేశారు. కోటి మందిని కోటీశ్వరులను చేస్తానని ప్రగల్భాలు పలికిన ముఖ్యమంత్రి రేవంత్ రెడ్డి, కనీసం వృద్ధులకు, వితంతువులకు నెలవారీ పింఛన్లు కూడా సక్రమంగా ఇవ్వలేని దయనీయ స్థితిలో ఉన్నారని విమర్శించారు. కరెంట్ కోతలతో రైతులు, సామాన్యులు తీవ్ర ఇబ్బందులు పడుతున్నారని తెలిపారు.
దురదృష్టవశాత్తు ఎన్నికల్లో బీఆర్ఎస్ ఓడిపోయి ప్రతిపక్షానికి పరిమితమైందని, కానీ ప్రజల పక్షాన పోరాడే బాధ్యతను తాము విస్మరించబోమని కేటీఆర్ స్పష్టం చేశారు. రాష్ట్ర ప్రభుత్వం వెంటనే మేల్కొని యుద్ధప్రాతిపదికన ధాన్యం కొనుగోలు కేంద్రాలను ప్రారంభించి, రైతులకు మద్దతు ధర, బోనస్ అందించి వారిని ఆదుకోవాలని కేటీఆర్ గట్టిగా డిమాండ్ చేశారు.
