YSR Praja News Telugu : ఆంధ్రప్రదేశ్ రాష్ట్రంలో అధికారంలో ఉన్న కూటమి ప్రభుత్వంపై మాజీ మంత్రి రోజా తీవ్ర స్థాయిలో విరుచుకుపడ్డారు. భీమవరంలో మీడియాతో మాట్లాడిన ఆమె.. తిరుమల లడ్డూ వివాదం, అసెంబ్లీ సమావేశాల్లో అధికార పక్షం వ్యవహరిస్తున్న తీరుపై ఘాటు విమర్శలు చేశారు. అధికారంలోకి వచ్చి ప్రజలకు మంచి చేయడం చేతకాకపోతే.. తక్షణమే పదవులకు రాజీనామా చేసి ఇంట్లో కూర్చోవాలని సవాల్ విసిరారు.
రోజా ప్రెస్ మీట్ లోని ముఖ్యాంశాలు:
సుప్రీంకోర్టు చెప్పినా మారని తీరు:
దేవుడిని సైతం రాజకీయ వివాదాల్లోకి లాగడం మానుకోవాలని రోజా కూటమి నేతలకు హితవు పలికారు. తిరుమల శ్రీవారి లడ్డూ ప్రసాదంలో ఎలాంటి జంతువుల కొవ్వు ఆనవాళ్లు లేవని సీబీఐ దర్యాప్తు నివేదిక ద్వారా సుప్రీంకోర్టు స్పష్టం చేసిన విషయాన్ని ఆమె గుర్తుచేశారు. అత్యున్నత న్యాయస్థానం స్పష్టత ఇచ్చినప్పటికీ.. సీఎం, డిప్యూటీ సీఎం, చివరకు హోంమంత్రి కూడా తమ వైఖరి మార్చుకోకుండా చాలా దిగజారి మాట్లాడుతున్నారని మండిపడ్డారు. కూటమి నేతల తీరును రాష్ట్ర ప్రజలు నిశితంగా గమనిస్తున్నారని హెచ్చరించారు.
అసెంబ్లీలో దారిమళ్లింపు రాజకీయాలు:
చట్టసభల్లో అధికార పార్టీ నేతల వ్యవహారశైలిని రోజా తీవ్రంగా తప్పుబట్టారు. లడ్డూ వివాదాన్ని పక్కదారి పట్టించేందుకే ఉద్దేశపూర్వకంగా కులాల అంశాన్ని తెరపైకి తెస్తూ ‘డైవర్షన్ పాలిటిక్స్’ చేస్తున్నారని ఆరోపించారు. బాధ్యతాయుతమైన శాసన మండలి చైర్మన్ మోషేన్ రాజు కులాన్ని ప్రస్తావించేంత దారుణమైన స్థితికి ఈ ప్రభుత్వం చేరుకుందని ఆవేదన వ్యక్తం చేశారు. మంత్రి పదవిలో ఉన్న అచ్చెన్నాయుడు అసెంబ్లీలో ఏ ఒక్కరోజైనా హుందాగా, సక్రమంగా మాట్లాడారా? అంటూ రోజా సూటిగా ప్రశ్నించారు.
ఎన్నికలు ఎప్పుడొచ్చినా ఓటమే:
దేవుడి పేరుతో భక్తుల మనోభావాలతో ఆడుకోవద్దని రోజా సూచించారు. రాజకీయాల్లోకి వచ్చింది ప్రజలకు సేవ చేసి మంచి పేరు తెచ్చుకోవడానికని, అది చేయలేనప్పుడు రాజీనామా చేయడమే ఉత్తమమని ఎద్దేవా చేశారు. కూటమి ప్రభుత్వ పాలనపై ప్రజల్లో తీవ్ర వ్యతిరేకత ఉందని, రాష్ట్రంలో ఏ క్షణంలో ఎన్నికలు వచ్చినా కూటమి పార్టీలను ఓడించేందుకు ఏపీ ప్రజానీకం సిద్ధంగా ఉందని రోజా ధీమా వ్యక్తం చేశారు.
