YSR Praja News Telugu : హైదరాబాద్: స్థానిక సంస్థల ఎన్నికల్లో బీసీలకు 42 శాతం రిజర్వేషన్లకు సంబంధించిన జీవో-9పై హైకోర్టు స్టే ఇవ్వడం, తదనంతరం రాష్ట్ర ఎన్నికల సంఘం ఎన్నికల ప్రక్రియను నిలిపివేయడంతో రాజకీయ పరిణామాలు వేగంగా మారుతున్నాయి. ఈ నేపథ్యంలో బీఆర్ఎస్ అధ్యక్షుడు, మాజీ సీఎం కే. చంద్రశేఖరరావు గురువారం రాత్రి ఎర్రవల్లి నివాసంలో కీలక సమావేశం నిర్వహించారు.
ఈ భేటీలో పార్టీ వర్కింగ్ ప్రెసిడెంట్ కే. తారక రామారావు, మాజీ మంత్రి టి. హరీశ్రావు, ఎమ్మెల్యే పల్లా రాజేశ్వర్ రెడ్డి పాల్గొన్నారు. తాజా పరిణామాలపై కేసీఆర్ నేతలతో చర్చించి, బీసీ రిజర్వేషన్ల విషయంలో కాంగ్రెస్ ప్రభుత్వం మోసగించిన తీరును ప్రజల్లో ఎండగట్టాలని ఆదేశించారు.
కేసీఆర్ వ్యాఖ్యానించినట్లుగా, బీసీ రిజర్వేషన్ల విషయంలో కాంగ్రెస్‌కు చిత్తశుద్ధి లేకపోవడం, అసెంబ్లీ లోపల, బయట బీఆర్ఎస్ మద్దతు ఉన్నప్పటికీ జీవోకు చట్టబద్దత సాధించడంలో రేవంత్ ప్రభుత్వం విఫలమైందని అన్నారు.
ఇక, బీసీ రిజర్వేషన్ల అంశంపై కేంద్ర, రాష్ట్ర ప్రభుత్వ వైఖరిని బహిర్గతం చేసేలా ఉద్యమ కార్యాచరణకు సిద్ధమవుతున్నట్లు సమాచారం. అదే సమయంలో జూబ్లీహిల్స్ ఉపఎన్నిక సన్నద్ధతపైనా కేసీఆర్ సమీక్ష నిర్వహించారు.
ఈ సందర్భంగా ఐదుగురు మాజీ మంత్రుల నేతృత్వంలో ఏర్పడిన వార్ రూమ్‌ పనిచేయాల్సిన తీరుపై ఆయన దిశానిర్దేశం చేసినట్లు తెలిసింది. కాంగ్రెస్ అభ్యర్థి నవీన్ యాదవ్ వ్యూహం, బలాబలాలపై విశ్లేషణ జరిపి తగు సూచనలు చేశారు.
స్థానిక సంస్థల ఎన్నికలు వాయిదా పడ్డ నేపధ్యంలో, గ్రామీణ ప్రాంత నేతలు, కేడర్‌ను జూబ్లీహిల్స్ ప్రచారంలో భాగస్వాములను చేయాలని కేసీఆర్ ఆదేశించారు.
ఉపఎన్నిక ప్రచార వ్యూహానికి తుదిరూపు ఇవ్వడానికి కేటీఆర్, హరీశ్రావు రాబోయే ఒకట్రెండు రోజుల్లో పార్టీ డివిజన్ ఇన్‌చార్జీలు, ముఖ్య నేతలతో సమావేశం కానున్నార
ని సమాచారం.
