YSR Praja News Telugu : తాండూరు: కేంద్రంలోని మోడీ ప్రభుత్వం తీసుకొచ్చిన ప్రజా వ్యతిరేక, కార్పొరేట్ అనుకూల విధానాలను నిరసిస్తూ 2026 ఫిబ్రవరి 12న జరగనున్న దేశవ్యాప్త సార్వత్రిక సమ్మెను జయప్రదం చేయాలని సిఐటియు, కెవిపిఎస్, వ్యవసాయ కార్మిక సంఘం, ఎమ్మార్పీఎస్ నేతలు పిలుపునిచ్చారు. ఈ సందర్భంగా తాండూరు పట్టణంలో నిర్వహించిన సమావేశంలో కార్మిక వర్గ సమస్యలపై విస్తృతంగా చర్చించారు.
సిఐటియు వికారాబాద్ జిల్లా కార్యదర్శి కే. శ్రీనివాస్ మాట్లాడుతూ…
భారత కార్మిక వర్గం దశాబ్దాల పాటు సాగించిన పోరాటాల ఫలితంగా ఏర్పడిన 44 కార్మిక చట్టాల్లోని 29 చట్టాలను రద్దు చేసి, వాటి స్థానంలో 2019–2020 మధ్య నాలుగు లేబర్ కోడ్లను కేంద్ర ప్రభుత్వం తీసుకురావడం కార్మిక హక్కులకు తీవ్ర భంగం కలిగించే చర్యగా అభివర్ణించారు. గత కొన్ని సంవత్సరాలుగా కార్మిక సంఘాలు నిర్వహించిన ఉద్యమాల వల్లే ఇప్పటివరకు ఈ కోడ్ల అమలు ఆలస్యమైందన్నారు. అయితే తాజాగా ‘శ్రమ శక్తి నీతి – 2025’ పేరుతో కొత్త విధానాన్ని ప్రకటించి లేబర్ కోడ్ల అమలుకు నోటిఫికేషన్ జారీ చేయడం కార్మిక వ్యతిరేక ధోరణికి నిదర్శనమని పేర్కొన్నారు.
కొత్త విధాన రూపకల్పనలో ప్రజాస్వామ్య పద్ధతిలో జరగాల్సిన సంప్రదింపుల ప్రక్రియను పక్కన పెట్టారని విమర్శించారు. యూనియన్ నమోదు ప్రక్రియను మరింత క్లిష్టతరం చేయడం, సమ్మెలపై ఆంక్షలు విధించడం, కార్మిక శాఖ తనిఖీ వ్యవస్థను బలహీనపరచడం వంటి నిర్ణయాలు కార్మికుల హక్కులను తగ్గించే దిశగా ఉన్నాయని అన్నారు. కార్మిక శాఖను ఉపాధి కల్పించే ఏజెన్సీగా మార్చడం ద్వారా కార్మికుల సమస్యల పరిష్కారంపై ప్రభుత్వ బాధ్యత తగ్గుతోందని వ్యాఖ్యానించారు.
పని గంటలను ఎనిమిది గంటల నుంచి పన్నెండు గంటలకు పెంచే ప్రతిపాదనలు కార్మికుల ఆరోగ్యం, కుటుంబ జీవితం, విశ్రాంతి హక్కులను తీవ్రంగా ప్రభావితం చేస్తాయని నాయకులు హెచ్చరించారు. ఆధునిక సాంకేతికత పేరుతో ఉద్యోగ భద్రతను దెబ్బతీసే ‘హైర్ అండ్ ఫైర్’ విధానాన్ని చట్టబద్ధం చేయడం ద్వారా కార్మికులపై అనిశ్చితి పెరుగుతోందన్నారు. ఉత్పత్తి ప్రక్రియలో కార్మికులకు దక్కుతున్న వేతన వాటా తగ్గుతుండగా, యజమానుల లాభాలు పెరుగుతున్నాయన్నారు.
నిత్యావసర వస్తువుల ధరలు పెరుగుతున్న నేపథ్యంలో కనీస వేతనాల విషయంలో ప్రభుత్వం అనుసరిస్తున్న వైఖరి అన్యాయమని పేర్కొన్నారు. కార్మికుల ఆదాయాలు పెరిగితేనే కొనుగోలు శక్తి పెరిగి పారిశ్రామిక రంగం ముందుకు సాగుతుందని, కానీ ప్రభుత్వం పెట్టుబడిదారుల ప్రయోజనాలకే ప్రాధాన్యం ఇస్తోందని విమర్శించారు. మహిళా కార్మికుల భద్రత, పని ప్రదేశాల్లో రక్షణ వంటి అంశాలపై కూడా స్పష్టమైన చర్యలు లేకపోవడం ఆందోళన కలిగిస్తోందన్నారు.
ఈ పరిస్థితుల్లో కార్మిక వర్గం సంఘటితంగా ఉద్యమించాల్సిన అవసరం ఉందని స్పష్టం చేశారు. ఫిబ్రవరి 12న జరిగే దేశవ్యాప్త సార్వత్రిక సమ్మెలో మున్సిపల్ ఉద్యోగులు, అంగన్వాడీ, ఆశా కార్యకర్తలు, గ్రామ పంచాయతీ కార్మికులు, మధ్యాహ్న భోజన పథకం కార్మికులు, ఫీల్డ్ అసిస్టెంట్లు, ఉపాధి హామీ కూలీలు సహా అన్ని విభాగాల కార్మికులు పెద్ద సంఖ్యలో పాల్గొని సమ్మెను విజయవంతం చేయాలని పిలుపునిచ్చారు.
ఈ సమావేశంలో వ్యవసాయ కార్మిక సంఘం జిల్లా అధ్యక్షులు యు. బుగ్గప్ప, కెవిపిఎస్ జిల్లా కార్యదర్శి ఉప్పల్ మల్కయ్య, ఎమ్మార్పీఎస్ జిల్లా ఉపాధ్యక్షులు ఎం. నరసింహులు, ఎమ్మార్పీఎస్ మండల అధ్యక్షులు కృష్ణ, కెవిపిఎస్ సహాయ కార్యదర్శి సురేష్, గోపాల్ తదితరులు పాల్గొన్నారు. కార్మికుల హక్కుల పరిరక్షణ కోసం ఐక్యంగా పోరాడాలని వారు పిలుపునిచ్చారు.
