YSR Praja News Telugu : పశ్చిమాసియాలో నెలకొన్న తాజా యుద్ధ వాతావరణం భారతీయ మార్కెట్లపై తీవ్ర ప్రభావం చూపుతోంది. ముఖ్యంగా వంటగదిపై ఈ సెగ స్పష్టంగా కనిపిస్తోంది. గ్యాస్ కొరత ఏర్పడుతుందన్న ఆందోళనతో జనం ఎలక్ట్రిక్ వంట పరికరాల వైపు పరుగులు తీస్తున్నారు. ఫలితంగా కేవలం 48 గంటల వ్యవధిలోనే ఇండక్షన్ స్టవ్ల అమ్మకాలు ఏకంగా 30 రెట్లు పెరిగి సరికొత్త రికార్డు నమోదు చేశాయి.
క్షణాలు తిరగకముందే ‘అవుట్ ఆఫ్ స్టాక్’
వినియోగదారులు ఇండక్షన్ స్టవ్ల కోసం ఎగబడుతుండటంతో ఆన్లైన్ మార్కెట్లకు డిమాండ్ తాకిడి పెరిగింది. అమెజాన్, ఫ్లిప్కార్ట్ వంటి దిగ్గజ ఈ-కామర్స్ సంస్థలతో పాటు.. నిమిషాల్లో డెలివరీ ఇచ్చే జెప్టో, బ్లింకిట్ లాంటి క్విక్ కామర్స్ యాప్లలో సైతం ఆర్డర్లు వెల్లువెత్తుతున్నాయి. జనం ఆర్డర్ చేసిన కొద్ది నిమిషాల్లోనే స్టాక్ అంతా ఖాళీ అయిపోయి ‘అవుట్ ఆఫ్ స్టాక్’ బోర్డులు దర్శనమిస్తున్నాయి. కేవలం ఇండక్షన్ స్టవ్లు మాత్రమే కాకుండా, ఎయిర్ ఫ్రయ్యర్లు, రైస్ కుక్కర్ల విక్రయాలు కూడా మునుపటి కంటే నాలుగు రెట్లు పెరగడం గమనార్హం.
రెచ్చిపోతున్న గ్యాస్ బ్లాక్ మార్కెట్ మాఫియా
ఒకపక్క యుద్ధ భయం వెంటాడుతుంటే, మరోపక్క అక్రమార్కులు సామాన్యులను నిలువునా దోచుకుంటున్నారు. గ్యాస్ సిలిండర్లకు కృత్రిమ కొరత సృష్టించి బ్లాక్ మార్కెట్లో భారీ ధరకు విక్రయిస్తున్నారు. బీహార్ లాంటి రాష్ట్రాల్లో గృహోపయోగ సిలిండర్ ధర ఏకంగా రూ.1,800కు చేరుకోగా, మధ్యప్రదేశ్లో వాణిజ్య సిలిండర్ ధరలు వేలల్లో పలుకుతున్నాయి. ప్రభుత్వాలు కఠిన చర్యలు తీసుకుంటామని హెచ్చరిస్తున్నా ఈ బ్లాక్ దందా ఆగడం లేదు. గ్యాస్ ధరల వాత భరించలేక.. గృహిణుల నుంచి స్టార్ హోటళ్ల నిర్వాహకుల వరకు అందరూ చౌకైన, సురక్షితమైన ఇండక్షన్ కుకింగ్ను ప్రత్యామ్నాయంగా ఎంచుకుంటున్నారు.
గ్లోబల్ మార్కెట్లోనూ అదే ట్రెండ్
గ్యాస్ స్టవ్ల నుంచి ఎలక్ట్రిక్ వంట వైపు మళ్లుతున్న ట్రెండ్ కేవలం మన దేశానికే పరిమితం కాలేదు. గ్యాస్ సరఫరాలో అంతరాయాలు ఏర్పడవచ్చనే భయంతో ఆసియా, ఐరోపా దేశాల్లోని ప్రజలు సైతం ముందు జాగ్రత్తలు పడుతున్నారు. ఇంధన భద్రత దృష్ట్యా, శిలాజ ఇంధనాల వాడకాన్ని తగ్గించి ఇండక్షన్ పద్ధతులకు ప్రాధాన్యత ఇస్తున్నారు. తాజా భౌగోళిక రాజకీయ పరిస్థితులు ఈ మార్పు ప్రక్రియను మరింత వేగవంతం చేశాయి.
జేబుకు ఆదా.. స్మార్ట్ వంటకు బాట
ప్రస్తుతం మార్కెట్లో సామాన్యులకు అందుబాటులో ఉండే బేసిక్ ఇండక్షన్ స్టవ్లు రూ.1,200 నుంచి ప్రారంభమవుతుండగా, అత్యాధునిక ఫీచర్లు ఉన్నవి రూ.14,000 వరకు పలుకుతున్నాయి. గ్యాస్తో పోలిస్తే ఎలక్ట్రిక్ స్టవ్ల వాడకం వల్ల సమయం, డబ్బు రెండూ ఆదా అవుతున్నాయని వినియోగదారులు భావిస్తున్నారు. పరిస్థితులు ఇలాగే కొనసాగితే, రాబోయే రోజుల్లో సంప్రదాయ గ్యాస్ స్టవ్ల కనుమరుగై.. ఆ స్థానాన్ని స్మార్ట్ ఎలక్ట్రిక్ కుకింగ్ పరికరాలు పూర్తిగా భర్తీ చేయడం ఖాయంగా కనిపిస్తోంది
