కర్ణాటక రాజకీయాల్లో ఇప్పటికే సీఎం పదవి మార్పుపై చర్చలు ఊపందుకుంటున్న వేళ, ముఖ్యమంత్రి సిద్ధరామయ్య సర్కార్కు మరో పెద్ద ఎదురుదెబ్బ తగిలింది. రాష్ట్రంలో మద్యం అమ్మకాల వ్యవహారంలో వేల కోట్ల రూపాయల అవినీతి జరిగిందంటూ కర్ణాటక వైన్ మర్చంట్స్ అసోసియేషన్ చేసిన ఆరోపణలు రాజకీయ వర్గాల్లో ప్రకంపనలు రేపుతున్నాయి.
మద్యం అమ్మకాలకు సంబంధించిన సీఎల్–7 లైసెన్సుల జారీ ప్రక్రియలో భారీగా లంచాలు వసూలు చేసినట్లు అసోసియేషన్ ప్రతినిధులు ఆరోపించారు. ఒక్కో లైసెన్స్ కోసం రూ.30 లక్షల నుంచి రూ.70 లక్షల వరకు వసూలు చేశారని, ఈ విధంగా మొత్తం లావాదేవీలు సుమారు రూ.6000 కోట్ల వరకు చేరినట్టు వారు పేర్కొన్నారు. ఈ ఆరోపణలు బయటకు రావడంతో కర్ణాటక రాజకీయ వాతావరణం ఒక్కసారిగా వేడెక్కింది.
ఈ వ్యవహారంలో ఎక్సైజ్ మంత్రి ఆర్బీ తిమ్మాపూర్తో పాటు శాఖకు చెందిన పలువురు ఉన్నతాధికారులు పాత్ర వహించారని అసోసియేషన్ ఆరోపిస్తోంది. ముగ్గురు డిప్యూటీ కమిషనర్లు, తొమ్మిది మంది సూపరింటెండెంట్లు, 13 మంది డిప్యూటీ సూపరింటెండెంట్లు, 20 మంది ఎక్సైజ్ ఇన్స్పెక్టర్లు ఈ కుంభకోణంలో భాగస్వాములయ్యారని వెల్లడించింది. ఈ అంశంపై కాంగ్రెస్ జాతీయ అధ్యక్షుడు మల్లికార్జున ఖర్గేకు, లోక్సభ ప్రతిపక్ష నేత రాహుల్ గాంధీకి లేఖ రాయనున్నట్టు కూడా వారు తెలిపారు.
మరోవైపు, సిద్ధరామయ్య ప్రభుత్వం అవినీతికి కేంద్రంగా మారుతోందని వైన్ మర్చంట్స్ అసోసియేషన్ తీవ్ర విమర్శలు చేసింది. ఇప్పటికే 2024లోనే ఎక్సైజ్ శాఖలో జరుగుతున్న అవకతవకలపై ముఖ్యమంత్రి, గవర్నర్, లోకాయుక్తకు ఫిర్యాదు చేసినప్పటికీ సరైన చర్యలు తీసుకోలేదని అసంతృప్తి వ్యక్తం చేశారు. ప్రభుత్వ నిర్లక్ష్యం వల్లే ఈ కుంభకోణం మరింత పెద్దదిగా మారిందని ఆరోపించారు.
సీఎల్–7 లైసెన్స్ వ్యవహారం బెంగళూరులోని హోటల్స్, లాడ్జీలు, బోర్డింగ్ హౌజ్లకు కీలకంగా ఉంటుంది. ఖరీదైన ప్రాంతాల్లో ఈ లైసెన్స్ విలువ రూ.కోటి నుంచి రూ.2 కోట్ల వరకు ఉంటుందని అధికారులు చెబుతున్నారు. అయితే, ఈ లైసెన్సుల మంజూరులో అక్రమ లావాదేవీలు జరిగాయన్న ఆరోపణలు ప్రజల్లో ఆందోళన కలిగిస్తున్నాయి.
ఇక ఈ ఆరోపణలను ఎక్సైజ్ మంత్రి తిమ్మాపూర్ పూర్తిగా ఖండించారు. ఆరోపణల్లో ఎలాంటి నిజం లేదని స్పష్టం చేస్తూ, అవసరమైతే ఈ అంశంపై అసెంబ్లీలో స్పష్టత ఇస్తానని తెలిపారు. అయితే ప్రతిపక్ష పార్టీలు మాత్రం ఈ వ్యవహారాన్ని తీవ్రంగా విమర్శిస్తున్నాయి. పాలనను పక్కనపెట్టి కాంగ్రెస్ ప్రభుత్వం కుంభకోణాల్లో మునిగిపోయిందని ఆరోపిస్తూ విచారణకు డిమాండ్ చేస్తున్నాయి.
ఈ పరిణామాలతో కర్ణాటక రాజకీయాల్లో కొత్త చర్చ మొదలైంది. మద్యం కుంభకోణంపై స్వతంత్ర విచారణ జరుగుతుందా? ప్రభుత్వం ఎలాంటి చర్యలు తీసుకుంటుంది? అన్నది రాబోయే రోజుల్లో ఆసక్తికరంగా మారనుంది.
