YSR Praja News Telugu : తాండూర్: నాగర్కర్నూల్ జిల్లా కుమ్మేర్ జాతరలో చోటుచేసుకున్న పసికందు హత్య ఘటనపై రాష్ట్రవ్యాప్తంగా తీవ్ర ఆగ్రహావేశాలు వ్యక్తమవుతున్నాయి. చాకలి కుటుంబానికి చెందిన కేవలం రెండు నెలల పసికందుపై అగ్రకుల పెత్తందారులు దుర్మార్గంగా దాడి చేసి హత్య చేసిన ఘటన తెలంగాణ సమాజాన్ని కలిచివేసింది. ఈ అమానుష ఘటనను నిరసిస్తూ తాండూర్ పట్టణంలో పలు ప్రజా సంఘాల ఆధ్వర్యంలో నిరసన కార్యక్రమం నిర్వహించారు.
సీఐటీయూ, ఎంఆర్పీఎస్, తెలంగాణ మైనార్టీ హక్కుల పోరాట సమితి, ఎస్సీ, ఎస్టీ, బీసీ, మైనార్టీ హక్కుల పోరాట సంఘాల ఆధ్వర్యంలో జరిగిన ఈ నిరసనలో పాల్గొన్న నాయకులు, కుల వివక్ష, అంటరానితనం ఇంకా కొనసాగుతుండటంపై తీవ్ర ఆందోళన వ్యక్తం చేశారు. ఆధునిక కాలంలో కూడా ఇలాంటి కుల దురంకార హింస చోటుచేసుకోవడం రాష్ట్రానికి సిగ్గుచేటని వారు విమర్శించారు.
పసికందుపై జరిగిన దాడి కేవలం ఒక కుటుంబంపై జరిగిన దురాగతమే కాకుండా, సమాజంపై జరిగిన దాడిగా భావించాలని ప్రజా సంఘాలు స్పష్టం చేశాయి. ఎస్సీ, ఎస్టీ, బీసీ, మైనార్టీ వర్గాలపై జరుగుతున్న దౌర్జన్యాలు, అక్రమాలు, అణచివేత చర్యలు రోజురోజుకీ పెరుగుతున్నాయని ఆవేదన వ్యక్తం చేశారు. కుల అహంకారంతో అమాయకుల ప్రాణాలు తీసే సంఘటనలు ప్రజాస్వామ్య వ్యవస్థకు మచ్చగా నిలుస్తున్నాయని వారు తెలిపారు.
ఈ ఘటనపై తెలంగాణ రాష్ట్ర ప్రభుత్వం తక్షణమే స్పందించాలని ప్రజా సంఘాల నాయకులు డిమాండ్ చేశారు. ముఖ్యమంత్రి రేవంత్ రెడ్డి స్వయంగా జోక్యం చేసుకుని, నిందితులను వెంటనే అరెస్టు చేసి కఠిన శిక్షలు విధించాలని కోరారు. ఇలాంటి ఘటనలు మళ్లీ జరగకుండా కఠిన చట్టపరమైన చర్యలు తీసుకోవడంతో పాటు, బాధిత కుటుంబానికి ప్రభుత్వం తగిన న్యాయం చేయాలని డిమాండ్ చేశారు.
ఈ కార్యక్రమంలో సీఐటీయూ జిల్లా కార్యదర్శి కే. శ్రీనివాస్, ఎస్సీ ఎస్టీ మైనార్టీ హక్కుల పోరాట సంఘం నాయకుడు కొత్తూరు చంద్రయ్య, కెఎన్పీఎస్ జిల్లా నాయకులు గుమ్మడి రత్నం, తెలంగాణ మైనార్టీ హక్కుల పోరాట సమితి తాండూర్ నియోజకవర్గ ఇన్చార్జ్ ఎండీ సాదిక్, సంయోద్దీన్, ఆర్ఎంపీ డాక్టర్ మగ్దూం గౌస్, ఎంఆర్పీఎస్ పట్టణ అధ్యక్షులు బలరాం మాదిగ, సీనియర్ నాయకులు తానేష్ మాదిగ తదితరులు పాల్గొన్నారు.
పసికందు హత్య ఘటనపై సమగ్ర విచారణ జరిపి, నిందితులకు ఉదాహరణాత్మక శిక్షలు విధించాల్సిన అవసరం ఉందని ప్రజా సంఘాల నేతలు ప్రభుత్వాన్ని మరోసారి కోరారు.
