AP DSC Irregularities: YS Jagan Mohan Reddy Demands CBI Probe, to Submit Complaint to Governor ఏపీలో పతాక స్థాయికి కక్షసాధింపు చర్యలు.. డీఎస్సీ అక్రమాలపై సీబీఐ విచారణ కోరుతూ నేడు గవర్నర్ను కలవనున్న వైఎస్ జగన్
YSR Praja News Telugu : తాడేపల్లి: ఆంధ్రప్రదేశ్ రాష్ట్రంలో రాజకీయ కక్షసాధింపు చర్యలు పతాక స్థాయికి చేరుకున్నాయని వైఎస్సార్ కాంగ్రెస్ పార్టీ (వైఎస్సార్సీపీ) తీవ్ర స్థాయిలో ధ్వజమెత్తింది. ప్రభుత్వాన్ని, ముఖ్యంగా డీఎస్సీ అక్రమాలను ప్రశ్నిస్తున్న వారి గొంతు నొక్కేందుకు అక్రమ కేసులు బనాయిస్తూ, ఏకంగా రౌడీషీట్లు తెరుస్తున్నారని ఆ పార్టీ మండిపడింది. రాబోయే స్థానిక సంస్థల ఎన్నికల్లో తమకు ఎలాంటి ఇబ్బందులు, అడ్డంకులు లేకుండా చేసుకునేందుకే అధికార పక్షం ఒక పక్కా ప్లాన్ ప్రకారం ఈ తరహా చర్యలకు తెరతీసిందని ఆరోపించింది.
ప్రశ్నించిన వారిపై రౌడీషీట్లు..
ఇటీవల డీఎస్సీ అక్రమాలను నిరసిస్తూ శాప్ (SAAP) కార్యాలయం ఎదుట ఆందోళన చేపట్టిన వైఎస్సార్సీపీ నేతలు, కార్యకర్తలపై పోలీసులు రౌడీషీట్లు తెరవడాన్ని పార్టీ తీవ్రంగా ఖండించింది. ఈ క్రమంలోనే ఎమ్మెల్సీ తలశిల రఘురామ్, యువనేత దేవినేని అవినాష్ సహా పలువురు నాయకులపై ఉద్దేశపూర్వకంగానే రౌడీషీట్లు నమోదు చేయడం పట్ల ఆగ్రహం వ్యక్తం చేసింది. ప్రశ్నించే వారిని భయభ్రాంతులకు గురిచేసి ప్రతిపక్షాన్ని నిర్వీర్యం చేయాలనే కుట్రలో భాగమే ఈ కేసులని వైఎస్సార్సీపీ విమర్శించింది.
నేడు గవర్నర్తో వైఎస్ జగన్ భేటీ.. సీబీఐ విచారణకు డిమాండ్..
రాష్ట్రంలో నెలకొన్న ఈ రాజకీయ పరిస్థితుల నేపథ్యంలో వైఎస్సార్సీపీ అధినేత, మాజీ ముఖ్యమంత్రి వైఎస్ జగన్మోహన్ రెడ్డి బుధవారం సాయంత్రం రాష్ట్ర గవర్నర్తో సమావేశం కానున్నారు. రాష్ట్రంలో సాగుతున్న ప్రభుత్వ అరాచకాలు, ప్రతిపక్ష నేతలపై జరుగుతున్న కక్షసాధింపు చర్యలను ఆయన నేరుగా గవర్నర్ దృష్టికి తీసుకెళ్లనున్నారు.
ప్రధానంగా డీఎస్సీ వ్యవహారంలో జరిగిన భారీ అక్రమాలపై గవర్నర్కు ఆయన ఫిర్యాదు చేయనున్నారు. నిరుద్యోగుల జీవితాలతో ముడిపడి ఉన్న డీఎస్సీ అక్రమాలపై తక్షణమే సీబీఐ (CBI)తో సమగ్ర విచారణ జరిపించేలా ఆదేశాలు ఇవ్వాలని వైఎస్ జగన్ గవర్నర్ను కోరనున్నారు. ఈ భేటీ అనంతరం వైఎస్ జగన్ మీడియాతో మాట్లాడే అవకాశం ఉన్నట్లు పార్టీ వర్గాలు తెలిపాయి.
