YSR Praja News Telugu : మేడ్చల్/హైదరాబాద్: ఎల్బీనగర్ ఏసీపీగా విధులు నిర్వహిస్తున్న కృష్ణయ్యపై పోలీసు ఉన్నతాధికారులు సోమవారం సస్పెన్షన్ వేటు వేశారు. ఆయనపై తీవ్రమైన అవినీతి ఆరోపణలు రావడంతో పాటు, పలు వివాదాస్పద కేసుల్లో ప్రత్యక్ష ప్రమేయం ఉన్నట్లు ప్రాథమిక విచారణలో నిర్ధారణ కావడంతో ఈ నిర్ణయం తీసుకున్నారు. 2024, ఫిబ్రవరి 14న ఎల్బీనగర్ ఏసీపీగా బాధ్యతలు చేపట్టిన కృష్ణయ్య.. అతి తక్కువ కాలంలోనే అనేక వివాదాల్లో చిక్కుకోవడం గమనార్హం.
కార్యాలయమే అడ్డాగా సెటిల్మెంట్లు.. క్రెడిట్ కార్డులతో వసూళ్లు!
ఏసీపీ కృష్ణయ్యపై ఉన్నతాధికారులకు ఫిర్యాదుల వెల్లువ కొనసాగింది. ఆయన అక్రమాల లీలలు ఒకటొకటిగా వెలుగులోకి వచ్చాయి.
భూవివాదాల సెటిల్మెంట్లు: మల్కాజిగిరి కమిషనరేట్ పరిధిలో కీలకమైన ప్రాంతాల్లోని భూవివాదాల్లో కృష్ణయ్య తలదూర్చినట్లు ఆరోపణలున్నాయి. రాక్ స్టెన్ ప్రాంతానికి చెందిన ఓ న్యాయవాదితో కలిసి ఏకంగా ఒక బృందాన్ని ఏర్పాటు చేసుకుని, తన కార్యాలయాన్నే సెటిల్మెంట్లకు అడ్డాగా మార్చుకున్నట్లు ఉన్నతాధికారుల దృష్టికి వెళ్లింది.
క్రెడిట్ కార్డులతో స్వైపింగ్: చైతన్యపురి పోలీస్ స్టేషన్ పరిధిలోని ఓ కేసులో కృష్ణయ్య వ్యవహరించిన తీరు విస్మయానికి గురిచేసింది. ఆ కేసులో తలదూర్చిన ఆయన, బాధితులు నగదు ఇవ్వకపోవడంతో వారి వద్ద నుంచి క్రెడిట్ కార్డులు తీసుకుని.. ఏకంగా స్వైపింగ్ యంత్రాలను తెప్పించి మరీ బలవంతపు వసూళ్లకు పాల్పడినట్లు ఆరోపణలున్నాయి. దీనిపై బాధితులు నేరుగా ఎల్బీనగర్ డీసీపీకి ఫిర్యాదు చేశారు.
ఎస్ఐతో గొడవ: ఎల్బీనగర్ పోలీస్ స్టేషన్‌లో ఓ రియల్ ఎస్టేట్ కేసుకు సంబంధించిన ఫైల్ విషయంలో అప్పటి అడ్మిన్ ఎస్ఐతో కృష్ణయ్య వాగ్వాదానికి దిగడం, గొడవ పడటం అప్పట్లో పోలీస్ వర్గాల్లో తీవ్ర చర్చనీయాంశమైంది.
ఆత్మహత్య కేసులో లంచం: సరూర్ నగర్ ఠాణా పరిధిలో వరకట్న వేధింపులు తాళలేక ఓ మహిళ ఆత్మహత్య చేసుకుంది. ఈ సున్నితమైన కేసులో నిందితులను అరెస్టు చేయకుండా కాపాడేందుకు ఏసీపీ భారీగా లంచం తీసుకున్నట్లు తీవ్ర ఆరోపణలు వచ్చాయి.
కోర్టు ధిక్కరణ కేసులో జైలు శిక్ష
అవినీతి ఆరోపణలే కాకుండా, ఏసీపీ కృష్ణయ్య న్యాయపరమైన చిక్కులను కూడా ఎదుర్కొంటున్నారు. ఒక కోర్టు ధిక్కరణ కేసులో గత సెప్టెంబర్ 20న రాష్ట్ర హైకోర్టు ఆయనకు ఏకంగా నెల రోజుల జైలు శిక్షతో పాటు, రూ. 2 వేల జరిమానా విధించింది. అయితే ఈ శిక్షను రద్దు చేయాలని ఆయన కోర్టును ఆశ్రయించినట్లు సమాచారం.
సస్పెన్షన్ చుట్టూ హైడ్రామా.. చివరకు వేటు
కృష్ణయ్య సస్పెన్షన్ వ్యవహారం ఒక సినిమా డ్రామాను తలపించింది. వాస్తవానికి ఆయనపై గత జూలై నెలలోనే ఉన్నతాధికారులు సస్పెన్షన్ వేటు వేశారు. ఇందుకు సంబంధించి మల్కాజిగిరి సీపీ కార్యాలయానికి ఆయన్ను పిలిపించగా.. అక్కడే అనారోగ్యానికి గురైనట్లు నటించి కింద పడిపోయారు. దీంతో ఆయనను ఎల్బీనగర్‌లోని ఓ ప్రైవేట్ ఆస్పత్రికి తరలించారు.
అధికారులు సస్పెన్షన్ ఉత్తర్వులను ఆస్పత్రికి పంపగా, ఆయన వాటిని స్వీకరించకుండా వెనక్కి పంపించి ‘సిక్ లీవ్’ పెట్టి వెళ్లిపోయారు. ఆ తర్వాత ఎల్బీనగర్ ఏసీపీ ఇన్చార్జి బాధ్యతలను కొంతకాలం వనస్థలిపురం ఏసీపీకి, ఇటీవల ఎస్బీ అడ్మిన్ ఏసీపీ రవీందర్ రెడ్డికి ఉన్నతాధికారులు అప్పగించారు.
అయితే, ఎవరూ ఊహించని విధంగా కృష్ణయ్య తన పలుకుబడిని ఉపయోగించి ఆదివారం దౌర్జన్యంగా మళ్లీ విధుల్లో చేరారు. ఈ విషయాన్ని తీవ్రంగా పరిగణించిన ఉన్నతాధికారులు, సోమవారం ఉదయం ఆయన్ను సీపీ కార్యాలయానికి పిలిపించి నేరుగా సస్పెన్షన్ ఉత్తర్వులు చేతికి ఇచ్చినట్లు సమాచారం. ఈ పరిణామంతో రాచకొండ పోలీస్ కమిషనరేట్ వర్గాల్లో తీవ్ర చర్చ జరుగుతోంది.
