YSR Praja News Telugu : హైదరాబాద్: ఏపీ డిప్యూటీ సీఎం, జనసేన అధినేత పవన్ కళ్యాణ్ హైదరాబాద్ వేదికగా చేసిన రాజకీయ వ్యాఖ్యలు తెలంగాణలో తీవ్ర ప్రకంపనలు సృష్టిస్తున్నాయి. రెండు రాష్ట్రాల మధ్య మరోసారి రాజకీయ దుమారానికి ఈ వ్యాఖ్యలు దారి తీశాయి. పవన్ కళ్యాణ్ వైఖరిపై అటు అధికార కాంగ్రెస్ నేతలతో పాటు, తెలంగాణ ఉద్యమకారులు తీవ్ర స్థాయిలో మండిపడుతున్నారు. మంత్రి పొన్నం ప్రభాకర్, ఎమ్మెల్యే అనిరుధ్ రెడ్డి, ఎమ్మెల్సీ ప్రొఫెసర్ కోదండరాం వంటి కీలక నేతలు పవన్పై విరుచుకుపడటంతో తెలుగు రాష్ట్రాల మధ్య పొలిటికల్ హీట్ ఒక్కసారిగా పెరిగింది.
కౌంటర్ ఎటాక్కు దిగిన కాంగ్రెస్ నేతలు
పవన్ కళ్యాణ్ చేసిన వ్యాఖ్యలను తెలంగాణ కాంగ్రెస్ నేతలు తీవ్రంగా తిప్పికొట్టారు. జడ్చర్ల ఎమ్మెల్యే అనిరుధ్ రెడ్డి, రాష్ట్ర మంత్రి పొన్నం ప్రభాకర్ సంయుక్తంగా మీడియాతో మాట్లాడుతూ పవన్ రాజకీయ ఉనికిని ప్రశ్నించారు.
క్షమాపణలు చెప్పాలన్న ఎమ్మెల్యే అనిరుధ్:
గతంలో “తెలంగాణ రైతుల దిష్టి తగిలే కోనసీమ కొబ్బరి చెట్లు పడిపోయాయి” అంటూ పవన్ చేసిన వ్యాఖ్యలను ఎమ్మెల్యే అనిరుధ్ రెడ్డి గుర్తు చేశారు. తెలంగాణ ప్రజలను అవమానించిన ఆయన వెంటనే బహిరంగ క్షమాపణలు చెప్పాలని డిమాండ్ చేశారు. ఏపీలో గతంలో వైఎస్ జగన్ ముఖ్యమంత్రిగా ఉన్నప్పుడు భయపడి హైదరాబాద్లో దాక్కున్న చరిత్ర పవన్ది అని, ఇప్పుడు ఏపీలో డిప్యూటీ సీఎం హోదాలో ఉంటూ తెలంగాణలో రాజకీయం చేయడం విడ్డూరంగా ఉందని ఆయన ఎద్దేవా చేశారు.
స్క్రిప్ట్ చదువుతున్నారన్న మంత్రి పొన్నం:
మంత్రి పొన్నం ప్రభాకర్ సైతం పవన్ కళ్యాణ్పై తీవ్రస్థాయిలో విమర్శలు గుప్పించారు. పవన్ కళ్యాణ్కు సొంత సిద్ధాంతాలు లేవని, ఢిల్లీలో అమిత్ షా దగ్గర ప్యాకేజీ తీసుకొని ఆయన ఇచ్చిన స్క్రిప్ట్ను ఇక్కడ చదువుతున్నారని ఆరోపించారు. “పైసలిస్తే నాకోసం కూడా ఆయన పని చేస్తాడు” అంటూ మంత్రి పొన్నం ఘాటు వ్యాఖ్యలు చేశారు.
ప్రాంతీయ విద్వేషాలు రగల్చొద్దు: ప్రొఫెసర్ కోదండరాం
వ్యక్తుల మధ్య ఉన్న విభేదాలను ఆసరాగా చేసుకుని ప్రాంతాల మధ్య చిచ్చు పెట్టే ప్రయత్నం చేయొద్దని తెలంగాణ జన సమితి అధినేత, ఎమ్మెల్సీ ప్రొఫెసర్ కోదండరాం పవన్ కళ్యాణ్కు హితవు పలికారు.
హైదరాబాద్లో ప్రెస్ మీట్ ఎందుకు?:
ఏపీ డిప్యూటీ సీఎంగా ఉన్న పవన్ కళ్యాణ్, తన రాజకీయ విమర్శల కోసం ప్రత్యేకంగా హైదరాబాద్లో ప్రెస్ మీట్ పెట్టాల్సిన అవసరం ఏముందని కోదండరాం ప్రశ్నించారు. ఈ మొత్తం వ్యవహారం వెనుక తెలంగాణలో అలజడి సృష్టించి రాజకీయ పబ్బం గడుపుకోవాలన్న బీజేపీ వ్యూహం దాగి ఉందన్న అనుమానాలను ఆయన వ్యక్తం చేశారు. ఏవైనా అభ్యంతరాలు ఉంటే చట్టబద్ధంగా పోరాడాలి కానీ, ఇలా ప్రెస్ మీట్లు పెట్టి తెలంగాణ – ఆంధ్రా మధ్య మళ్లీ వైరుధ్యాలు తీసుకురావడం సరికాదని ఆయన స్పష్టం చేశారు.
తారాస్థాయికి చేరిన ఉత్కంఠ
మొత్తం మీద పవన్ కళ్యాణ్ వ్యాఖ్యలు, దానికి తెలంగాణ నేతల కౌంటర్లు సోషల్ మీడియాలో సైతం తీవ్ర చర్చనీయాంశంగా మారాయి. ఏపీ డిప్యూటీ సీఎం హోదాలో ఉన్న పవన్, తెలంగాణలో రాజకీయ జోక్యం చేసుకోవడంపై భిన్నాభిప్రాయాలు వ్యక్తమవుతున్నాయి. కాంగ్రెస్ శ్రేణులు ఏపీ వ్యవహారాలకే పరిమితం కావాలని డిమాండ్ చేస్తుండగా, జనసేన వర్గాలు మాత్రం తమ నేతకు ఏ రాష్ట్రంలోనైనా మాట్లాడే స్వేచ్ఛ ఉందంటూ కౌంటర్ ఇస్తున్నాయి. ఈ పరిణామాలు రాబోయే రోజుల్లో ఇరు రాష్ట్రాల ప్రభుత్వాల మధ్య ఎలాంటి వాతావరణానికి దారి తీస్తాయో అన్న ఉత్కంఠ రాజకీయ వర్గాల్లో నెలకొంది.
