YSR Praja News Telugu : హైదరాబాద్: ఏపీ ఉపముఖ్యమంత్రి, జనసేన అధినేత పవన్ కళ్యాణ్ ఇటీవల తెలంగాణ రాజకీయాలపై చేసిన వ్యాఖ్యలు ప్రకంపనలు సృష్టిస్తున్నాయి. పవన్ వ్యాఖ్యలను తీవ్రంగా ఖండిస్తూ, ప్రజా గాయకుడు దివంగత గద్దర్ కుమార్తె వెన్నెల తీవ్రస్థాయిలో మండిపడ్డారు. తెలంగాణ ఉద్యమ స్ఫూర్తిని, ఇక్కడి ప్రజల త్యాగాలను గుర్తు చేస్తూ ఆమె గట్టి కౌంటర్ ఇచ్చారు.
తెలంగాణ గడ్డ ఎవరికీ సొంతం కాదన్నట్లుగా పవన్ కళ్యాణ్ చేసిన వ్యాఖ్యలపై వెన్నెల ఘాటుగా స్పందించారు. తెలంగాణ భూమితో ఇక్కడి ప్రజలకు ఉన్న పేగు బంధాన్ని, హక్కును ఆమె ఉద్ఘాటించారు. “తెలంగాణ గడ్డ నిన్న మా అయ్యల జాగీరే.. ఈరోజు అది మా జాగీరు.. రేపు రాబోయే మా బిడ్డల జాగీరు. ఈ తెలంగాణ గడ్డ ముమ్మాటికీ మా జాగీరే” అని ఆమె స్పష్టం చేశారు.
తెలంగాణ రాష్ట్ర ఏర్పాటు వెనుక ఉన్నది ఏ రాజకీయ లాబీయింగో, డబ్బుల పంపిణీనో కాదని వెన్నెల తేల్చి చెప్పారు. పైసలు పంచితేనో, ఎక్కడో లాబీలు చేస్తేనో తెలంగాణ రాలేదని, తెలంగాణ ఉద్యమం అనేది అచ్చంగా ఒక ఆత్మగౌరవ పోరాటం అని ఆమె వివరించారు.
ఉద్యమ కాలంలో తెలంగాణ యువత, ప్రజలు చేసిన ప్రాణ త్యాగాలను వెన్నెల ఈ సందర్భంగా గుర్తు చేశారు. “ఉద్యమంలో మా ప్రాణాలు తీసుకున్నాం కానీ, ఎదుటివారిని ఎవరినీ ఒక్క మాట కూడా అనలేదు. కేవలం ప్రాణ త్యాగాలు చేసి మాత్రమే తెలంగాణ రాష్ట్రాన్ని సాధించుకున్నాం. ‘తెలంగాణ’ అన్న ఒకే ఒక్క మాట కోసం గతంలో ఎంతో మందిని ఎన్కౌంటర్ చేశారు. ఈ సుదీర్ఘ ఉద్యమంలో ఎంతో మంది తల్లులు తమ కన్న బిడ్డలను కోల్పోయి గర్భశోకం అనుభవించారు” అని ఆమె నాటి చేదు జ్ఞాపకాలను ఆవేదనతో నెమరువేసుకున్నారు.
అనేక మంది బలిదానాలు, పోరాటాల పునాదుల మీద ఏర్పడిన తెలంగాణను కించపరిచేలా ఎవరు మాట్లాడినా సహించేది లేదని వెన్నెల తన మాటల ద్వారా స్పష్టం చేశారు. ఇటీవల పవన్ కళ్యాణ్ తెలంగాణపై దృష్టి సారించి, రాబోయే ఎన్నికల్లో జనసేన పోటీ చేస్తుందని చెబుతూ చేసిన వ్యాఖ్యలకు వెన్నెల ఇచ్చిన ఈ కౌంటర్ ఇప్పుడు తెలంగాణ రాజకీయ వర్గాల్లో, సోషల్ మీడియాలో తీవ్ర చర్చనీయాంశంగా మారింది.
