YSR Praja News Telugu : తాండూరు: ఎన్నికల సమయంలో మైనార్టీల ఓట్లతో గెలుపొంది, తీరా అధికారంలోకి వచ్చాక నామినేటెడ్ మరియు పార్టీ పదవుల పంపిణీలో వారిని పూర్తిగా విస్మరించిన తాండూరు ఎమ్మెల్యే బుయ్యాని మనోహర్ రెడ్డిపై తెలంగాణ స్టేట్ మైనార్టీ హక్కుల పోరాట సమితి రాష్ట్ర అధ్యక్షులు అబ్దుల్ వాహాబ్ తీవ్రస్థాయిలో మండిపడ్డారు. మైనార్టీలను కేవలం ఓటు బ్యాంకుగా వాడుకొని ఎమ్మెల్యే దారుణంగా మోసం చేశారని ఆయన ధ్వజమెత్తారు. తాండూరు నియోజకవర్గంలో ఎమ్మెల్యే అనుసరిస్తున్న మైనార్టీ వ్యతిరేక విధానాలను ఆయన తీవ్రంగా ఖండించారు.
వరుసగా జరుగుతున్న మోసాలు ఇవే..
ఎమ్మెల్యే మనోహర్ రెడ్డి స్థానిక మైనార్టీ నాయకులకు, ప్రజలకు చేస్తున్న అన్యాయాలను అబ్దుల్ వాహాబ్ ఈ సందర్భంగా ఏకరువు పెట్టారు. పార్టీ కోసం కష్టపడిన వారికి తగిన గుర్తింపు ఇవ్వడంలో ఎమ్మెల్యే పూర్తిగా విఫలమయ్యారని ఆరోపించారు.
మున్సిపల్ చైర్ పర్సన్ పదవి: గత మున్సిపల్ ఎన్నికల్లో మైనార్టీలు పార్టీకి అండగా నిలిచారని, అయినప్పటికీ న్యాయబద్ధంగా వారికి దక్కాల్సిన మున్సిపల్ చైర్ పర్సన్ పదవిని ఇవ్వకుండా ఎమ్మెల్యే అన్యాయం చేశారని గుర్తుచేశారు.
మార్కెట్ కమిటీ చైర్మన్: తాండూరులో ప్రతిష్టాత్మకమైన వ్యవసాయ మార్కెట్ కమిటీ చైర్మన్ పదవి భర్తీ క్రమంలో కూడా మైనార్టీ నాయకులకు కనీస అవకాశం కల్పించకుండా పూర్తిగా పక్కన పెట్టారని ఆవేదన వ్యక్తం చేశారు.
కాంగ్రెస్ కమిటీ నియామకాల్లో ద్రోహం: తాజాగా జరిగిన కాంగ్రెస్ కమిటీ నియామకాల్లో ఎమ్మెల్యే వ్యవహరించిన తీరును అబ్దుల్ వాహాబ్ తీవ్రంగా తప్పుబట్టారు. నియోజకవర్గ పరిధిలోని నాలుగు మండలాల అధ్యక్ష పదవులు, తాండూరు పట్టణ అధ్యక్ష పదవిని భర్తీ చేసిన క్రమంలో.. ఒక్క మైనార్టీ నాయకుడికి కూడా చోటు కల్పించకపోవడం పక్షపాత వైఖరికి నిదర్శనం అన్నారు.
“ఒక్కరు కూడా అర్హులుగా కనిపించడం లేదా?”
ఈ సందర్భంగా ఎమ్మెల్యే మనోహర్ రెడ్డిని ఉద్దేశించి అబ్దుల్ వాహాబ్ ఘాటైన ప్రశ్నలు సంధించారు. “కాంగ్రెస్ పార్టీలో ఏళ్ల తరబడి నిబద్ధతతో పనిచేస్తున్న మైనార్టీ నాయకులలో మీకు ఒక్కరు కూడా పదవులకు అర్హులుగా కనిపించడం లేదా?” అని ఆయన సూటిగా నిలదీశారు. మైనార్టీల ఓట్లను కేవలం అధికారంలోకి రావడానికి వాడుకొని, ఆ తర్వాత వారిని పక్కన పెట్టడం తీవ్రమైన రాజకీయ ద్రోహమని ఆయన మండిపడ్డారు.
రాబోయే రోజుల్లో తగిన బుద్ధి చెబుతాం..
ఎమ్మెల్యే మనోహర్ రెడ్డి చేసిన ఈ మోసాన్ని తాండూరు నియోజకవర్గంలోని ప్రతి మైనార్టీ గడపకు తీసుకువెళ్తామని అబ్దుల్ వాహాబ్ స్పష్టం చేశారు. మైనార్టీలను చైతన్యపరిచి, వారి ఓటు హక్కు శక్తి ఏంటో రాబోయే రోజుల్లో చూపిస్తామని హెచ్చరించారు. మైనార్టీలను విస్మరించే నాయకులకు తగిన బుద్ధి చెబుతామని తెలంగాణ స్టేట్ మైనార్టీ హక్కుల పోరాట సమితి తరపున ఆయన స్పష్టం చేశారు.
