YSR Praja News : హైదరాబాద్: తెలంగాణ మహిళా కమిషన్లో నటుడు శివాజీ విచారణ కొనసాగుతోంది. దండోరా సినిమా ప్రమోషన్లో భాగంగా వేదికపై చేసిన మహిళావ్యతిరేక వ్యాఖ్యలు (misogynistic remarks) తీవ్ర విమర్శలకు దారితీసిన నేపథ్యంలో, ఆ వ్యాఖ్యల వెనుక కారణాలను తెలుసుకునేందుకు కమిషన్ చర్యలు చేపట్టింది. ఈ మేరకు కమిషన్ ఛైర్పర్సన్ నేరెళ్ళ శారద శివాజీని ప్రశ్నించారు.
విచారణలో భాగంగా మహిళా కమిషన్ సంధించిన కీలక ప్రశ్నలు ఇవి:
మీరు చేసిన వ్యాఖ్యలు మహిళల గౌరవం, వ్యక్తిగత జీవితంపై ప్రతికూల ప్రభావం చూపుతాయని కమిషన్ భావిస్తోంది—దీనిపై మీ అభిప్రాయం ఏమిటి?
ప్రజాదరణ కలిగిన నటుడిగా మీ మాటలు సమాజంపై ప్రభావం చూపుతాయని తెలిసే ఈ వ్యాఖ్యలు చేశారని భావిస్తున్నాం—దీనిపై మీ సమాధానం?
మహిళల వస్త్రధారణ ఆధారంగా వారి వ్యక్తిత్వాన్ని అంచనా వేయడం రాజ్యాంగ స్ఫూర్తికి విరుద్ధం—చదువుకున్న వ్యక్తిగా ఇది మీకు తెలియదా?
మీ వ్యాఖ్యలు మహిళలను కించపరిచినట్లుకాకపోతే, దానికి సంబంధించిన ఆధారాలు సమర్పించగలరా?
మీ వ్యాఖ్యల వల్ల మహిళలపై దాడులు పెరిగే ప్రమాదం ఉందని ఫిర్యాదులు వచ్చాయి—ఈ ఆరోపణలపై మీ వివరణ ఏమిటి?
ఈ ప్రశ్నలకు శివాజీ ఇచ్చిన సమాధానాలను కమిషన్ రికార్డు చేసింది.
దండోరా సినిమా ఈవెంట్లో చేసిన వ్యాఖ్యలపై సామాజిక మాధ్యమాల్లోనూ, సినీ వర్గాల్లోనూ తీవ్ర దుమారం చెలరేగింది. గాయని చిన్మయి, నటులు అనసూయ, నిధి అగర్వాల్, పాయల్ రాజ్పుత్ తదితరులు బహిరంగంగా అభ్యంతరం వ్యక్తం చేశారు. మరోవైపు, రాష్ట్ర మహిళా కమిషన్ ఈ అంశాన్ని సుమోటోగా స్వీకరించి శివాజీకి నోటీసులు జారీ చేసింది.
ఈ వివాదం ముదిరిన అనంతరం శివాజీ షరతులతో కూడిన క్షమాపణలు ప్రకటించారు. తన కెరీర్లో ఇలాంటి ఘటన జరగలేదని చెప్పిన ఆయన, వ్యాఖ్యల్లో దొర్లిన రెండు అసభ్య పదాల విషయంలో మాత్రమే క్షమాపణలు తెలిపారు. అయితే, మొత్తం స్టేట్మెంట్పై మాత్రం తాను కట్టుబడి ఉన్నానని పేర్కొనడం గమనార్హం. ఇదిలా ఉండగా, ఈ ఘటనపై తెలుగు రాష్ట్రాల్లో ఇప్పటివరకు ఎలాంటి ఫిర్యాదులు లేదా కేసులు నమోదు కాకపోవడం మరో విశేషంగా మారింది.
