- YSR Praja News Telugu : అమరావతి: ఎన్నికల హామీలను నెరవేర్చాలని కోరుతూ శాంతియుతంగా ఆందోళన చేపట్టిన అంగన్వాడీ వర్కర్లు, హెల్పర్లపై రాష్ట్ర ప్రభుత్వం ప్రదర్శించిన దమనకాండ అత్యంత హేయమని మాజీ ముఖ్యమంత్రి, వైఎస్సార్సీపీ అధినేత వైఎస్ జగన్మోహన్రెడ్డి తీవ్ర స్థాయిలో మండిపడ్డారు. ముఖ్యమంత్రి చంద్రబాబు నాయుడు తీరు శిశుపాలుడి పాపాల్లా పెరిగిపోతున్నాయని, వీటికి కచ్చితంగా మూల్యం చెల్లించుకోక తప్పదని హెచ్చరించారు. అంగన్వాడీ మహిళల పట్ల అమానుషంగా ప్రవర్తించినందుకు చంద్రబాబు తక్షణమే బహిరంగ క్షమాపణలు చెప్పాలని ఆయన డిమాండ్ చేశారు. ఈ మేరకు మంగళవారం ‘ఎక్స్’ (ట్విట్టర్) వేదికగా వైఎస్ జగన్ కూటమి ప్రభుత్వంపై నిప్పులు చెరిగారు.
- ‘ఛలో విజయవాడ’పై ఉక్కుపాదం.. అర్ధరాత్రి అరెస్టులు
- తమ న్యాయమైన హక్కుల సాధన కోసం ‘ఛలో విజయవాడ’ కార్యక్రమానికి తరలివచ్చిన అంగన్వాడీ మహిళలను కూటమి ప్రభుత్వం అణచివేసిన తీరును వైఎస్ జగన్ తీవ్రంగా తప్పుబట్టారు. “అర్ధరాత్రి వేళ మహిళలు నిద్రిస్తున్న సమయంలో వారిని దారుణంగా, అక్రమంగా అరెస్టులు చేయడం ఏ విధమైన ప్రజాస్వామ్యం?” అని ఆయన ప్రశ్నించారు. మహిళలని కూడా చూడకుండా వారిపై పోలీసుల చేత లాఠీచార్జి చేయించడం, బలప్రయోగంతో అణిచివేయడం, కనీస సౌకర్యాలు కూడా లేకుండా ఎక్కడికక్కడ నిర్బంధించడం దారుణమన్నారు.
- హామీలు అడిగితే.. లాఠీ దెబ్బలా?
- సార్వత్రిక ఎన్నికల సమయంలో అంగన్వాడీ వర్కర్లు, హెల్పర్లకు స్వయంగా చంద్రబాబే ఎన్నో హామీలు ఇచ్చారని వైఎస్ జగన్ గుర్తుచేశారు. “అధికారంలోకి వచ్చి రెండేళ్లు గడుస్తున్నా ఆ హామీల అమలుకు దిక్కు లేదు. మీరు ఇచ్చిన హామీలను అమలు చేయాలని వారు గట్టిగా అడగడం తప్పెలా అవుతుంది? ప్రభుత్వ మోసాన్ని నిలదీయడం, ప్రశ్నించడం ఈ రాష్ట్రంలో నేరమా?” అని ఆయన ఆగ్రహం వ్యక్తం చేశారు. శాంతియుతంగా నిరసన తెలిపే హక్కును సైతం కాలరాస్తూ అంగన్వాడీల పట్ల ప్రభుత్వం అత్యంత అమానవీయంగా వ్యవహరించిందని దుయ్యబట్టారు.
- అన్ని వర్గాలకు వెన్నుపోటు.. శిశుపాలుడిలా పాపాలు
- చంద్రబాబు ప్రభుత్వం కేవలం అంగన్వాడీలకే కాకుండా.. రాష్ట్రంలోని అన్ని వర్గాలను మోసం చేస్తోందని వైఎస్ జగన్ విమర్శించారు. రైతులు, విద్యార్థులు, మహిళలు, నిరుద్యోగులు, ఉద్యోగులు సహా వివిధ వర్గాల వారికి ముఖ్యమంత్రి చేస్తున్న అన్యాయాలు, వెన్నుపోట్లు సరిగ్గా శిశుపాలుడి పాపాల్లా పెరిగిపోతున్నాయని తీవ్ర వ్యాఖ్యలు చేశారు. పాపాలు పండిన రోజున ప్రజలే తగిన బుద్ధి చెబుతారని స్పష్టం చేశారు.
- తక్షణం క్షమాపణలు చెప్పాలి
- మహిళల పట్ల ఇంతటి కర్కశంగా వ్యవహరించినందుకు ముఖ్యమంత్రి చంద్రబాబు నాయుడు తక్షణమే అంగన్వాడీ వర్కర్లు, హెల్పర్లకు క్షమాపణలు చెప్పాలని వైఎస్ జగన్ డిమాండ్ చేశారు. అలాగే, ఎన్నికల మేనిఫెస్టోలో వారికిచ్చిన హామీలను వెంటనే అమలు చేసి తీరాలని పట్టుబట్టారు.
