“మీటింగ్ నిర్వహించినప్పుడు తాగునీరు, ఆహారం వంటి ప్రాథమిక సదుపాయాలు ఎందుకు కల్పించలేకపోయారు? దయచేసి న్యాయస్థానాలను రాజకీయ వేదికలుగా మార్చవద్దు” అని కోర్టు వ్యాఖ్యానించింది.
ఇక రాజకీయ ర్యాలీలు, సభలకు అనుమతులు జారీ చేసే విధానంపై కూడా హైకోర్టు తమిళనాడు ప్రభుత్వాన్ని నిలదీసింది. దీనిపై ప్రభుత్వ లాయర్ స్పందిస్తూ, “అఖిలపక్ష సమావేశం నిర్వహించి స్పష్టమైన మార్గదర్శకాలు రూపొందిస్తాం. అప్పటిదాకా ఎలాంటి రాజకీయ ర్యాలీలకు అనుమతి ఇవ్వబడదు” అని తెలిపారు.
అలాగే రోడ్డుపై సభకు అనుమతి ఎలా ఇచ్చారనే అంశంపై పోలీసులు సమాధానం ఇవ్వాలని కోర్టు ఆదేశించింది. బాధితులకు పరిహారం పెంపు అంశంపై రెండు వారాల్లో నివేదిక ఇవ్వాలని కూడా హైకోర్టు ప్రభుత్వాన్ని ఆదేశించింది.
కరూర్ ఘటనపై కుట్ర కోణం ఉందని, స్వతంత్ర దర్యాప్తు జరపాలని TVK వర్గాలు మరో పిటిషన్ దాఖలు చేశాయి. అదేవిధంగా పార్టీ కార్యదర్శులకు ముందస్తు బెయిల్ ఇవ్వాలని వేరే పిటిషన్ వేసింది. ఈ రెండు పిటిషన్లతో పాటు మరో ఐదు పిటిషన్లను కలిపి మొత్తం ఏడు పిటిషన్లపై మద్రాస్ హైకోర్టు మధురై బెంచ్ విచారణ చేపట్టింది.
