సమానత్వం లేకపోవడమే ప్రశ్నలకు కారణం
సమాజం తనకు ‘స్త్రీ’ అనే పాత్రను ఇచ్చిందని, ఆ పాత్రలోనే ఎన్నో ఆంక్షలు ఉన్నాయని రోహిణి అన్నారు. “స్త్రీ అంటే మగాడికంటే తక్కువ, ఆమెకు అంత చదువు అవసరం లేదు, కొన్ని హక్కులు ఆమెకు లేవు అని చెప్పినప్పుడే నేను ఆలోచించడం మొదలుపెట్టాను. సమానత్వం లేదని చిన్న వయసులోనే అర్థమైంది” అని తెలిపారు. చిన్నప్పటి నుంచే అమ్మాయిలకు వంట, ఇంటి పనులు నేర్పి, ‘ఇంకొకరి ఇంటికి వెళ్లినప్పుడు మన పేరు నిలబెట్టాలి’ అని చెప్పడం, అదే సమయంలో అబ్బాయిలకు మాత్రం ‘ఇవి ఆడవాళ్ల పనులు’ అని చెప్పడం ఎంత తప్పో ఆమె ప్రశ్నించారు.
జీతాల్లేని శ్రామికులం మనం
ఇంట్లో అహోరాత్రులు శ్రమించే మహిళల పనిని సమాజం గుర్తించడంలేదని రోహిణి ఆవేదన వ్యక్తం చేశారు. “మనం జీతాల్లేని శ్రామికులం. పుట్టుకతోనే శ్రమ మన వంతు అవుతోంది. అన్నం ఎవరు వండినా ఉడుకుతుంది. ఆడదాని చేత్తో వండితేనే అన్నమవుతుందా?” అని ప్రశ్నించారు. అబ్బాయిలకు కూడా ఇంటి పనులు, వంట సహా అన్నీ నేర్పాలని, ఇద్దరూ కలిసి పనిచేసేలా పెంచితే సమాజంలో చాలా మార్పులు వస్తాయని చెప్పారు.
డ్రగ్స్, చెడు అలవాట్లపై అప్రమత్తత అవసరం
ప్రస్తుతం సమాజంలో మాదకద్రవ్యాల వినియోగం పెరుగుతోందని, దీని వల్ల యువత తప్పుదారి పడే ప్రమాదం ఉందని రోహిణి హెచ్చరించారు. డ్రగ్స్ నియంత్రణ కోసం పోలీసులు ఎంతగా శ్రమిస్తున్నా, తల్లిదండ్రుల పాత్ర మరింత కీలకమని చెప్పారు. పిల్లలకు చిన్నప్పటి నుంచే మంచి అలవాట్లు నేర్పించి, చెడు అలవాట్ల వల్ల వచ్చే నష్టాలను వివరించాల్సిన అవసరం ఉందన్నారు.
అలవాట్లే సంస్కారాలు
వేషధారణ, జీవనశైలి విషయాల్లో ప్రాంతానికీ సంస్కృతికీ తగిన అలవాట్లు ఉంటాయని, మనం పాటించే వాటినే పిల్లలకు నేర్పిస్తామని రోహిణి అన్నారు. “మన సంస్కృతిలో చీరలు కట్టుకుంటాం, ఇతర దేశాల్లో వారి అలవాట్లు వేరుగా ఉంటాయి. ఏది మనం సరైందిగా భావిస్తామో, అదే పిల్లలకు అలవాటు చేస్తాం. మా అబ్బాయికి కూడా నేను అదే చెప్తుంటాను” అని తెలిపారు.
మొత్తానికి, పిల్లల భవిష్యత్తు తీర్చిదిద్దడంలో తల్లిదండ్రుల పాత్ర అత్యంత కీలకమని, సమానత్వం, బాధ్యత, మంచి అలవాట్లే సమాజాన్ని ముందుకు నడిపిస్తాయని నటి రోహిణి తన మాటల ద్వారా స్పష్టంచేశారు.
