YSR Praja News Telugu : సిద్దిపేట: ముఖ్యమంత్రి రేవంత్ రెడ్డికి బీఆర్ఎస్ పార్టీ పేరు వింటేనే నిద్రలో కూడా వణుకు పుడుతోందని, ఆయన భయమే బీఆర్ఎస్ మళ్లీ అధికారంలోకి రాబోతోందన్న నిజాన్ని స్పష్టం చేస్తోందని మాజీ మంత్రి, బీఆర్ఎస్ కీలక నేత తన్నీరు హరీశ్ రావు తీవ్రస్థాయిలో ధ్వజమెత్తారు. ఆదివారం సిద్దిపేట జిల్లా కేంద్రంలో జరిగిన బీఆర్ఎస్ బూత్ లెవల్ ఏజెంట్ల సమావేశంలో పాల్గొన్న ఆయన.. నల్లగొండ పర్యటనలో సీఎం రేవంత్ రెడ్డి తనపై చేసిన వ్యాఖ్యలకు ఘాటుగా కౌంటర్ ఇచ్చారు.
సమస్యల నుంచి ప్రజల దృష్టి మళ్లించేందుకే ముఖ్యమంత్రి ఇష్టానుసారంగా మాట్లాడుతున్నారని మండిపడ్డారు. ఈ సమావేశంలో హరీశ్ రావు చేసిన ముఖ్యమైన వ్యాఖ్యలు, సవాళ్లు ఇలా ఉన్నాయి:
అసెంబ్లీ రద్దుకు సిద్ధమా? దమ్ముంటే తేల్చుకుందాం!
2034 వరకు రాష్ట్రంలో కాంగ్రెస్ అధికారంలో ఉంటుందని సీఎం రేవంత్ రెడ్డి చేసిన వ్యాఖ్యలపై హరీశ్ రావు సవాల్ విసిరారు. “నిజంగా మీకు అంత నమ్మకం ఉంటే అసెంబ్లీని రద్దు చేయండి, లేదా పార్టీ ఫిరాయించిన బీఆర్ఎస్ ఎమ్మెల్యేలతో రాజీనామా చేయించండి. ప్రజాక్షేత్రంలో ఎన్నికలకు వెళ్దాం. దమ్ము, ధైర్యం ఉంటే నా సవాల్ను స్వీకరించండి” అని డిమాండ్ చేశారు.
“మిస్టర్ రేవంత్ రెడ్డి.. రోజులు లెక్కపెట్టుకో.. ప్రజలు త్వరలోనే నీకు తగిన గుణపాఠం చెబుతారు” అని హరీశ్ రావు హెచ్చరించారు.
నా ఎత్తు కాదు.. నీ బుద్ధి పొట్టిది!
కర్ణాటకలో ముగ్గురు ముఖ్యమంత్రులు ఎందుకు సమావేశమయ్యారు? దాని వెనుక ఉన్న మతలబు ఏంటి? అని ప్రశ్నిస్తే సీఎం సమాధానం దాటవేశారని విమర్శించారు. తెలంగాణ నీటి హక్కులను తాకట్టు పెట్టి ‘ముంపు మేస్త్రీ’గా మారొద్దని అడిగితే.. దానికి బదులివ్వకుండా నల్లగొండ సభలో తన ఎత్తు, పొడవు గురించి ముఖ్యమంత్రి వ్యక్తిగత విమర్శలు చేయడం ఆయన దిగజారుడుతనానికి నిదర్శనమన్నారు. “నా ఎత్తు కాదు.. రేవంత్ రెడ్డి మనస్సు, ఆలోచన, బుద్ధి అంతా పొట్టిదే” అని హరీశ్ రావు ఎద్దేవా చేశారు.
రైతులకు క్షమాపణ చెప్పాలి
రైతుభరోసా ద్వారా రైతుల కళ్లలో ఆనందం చూస్తున్నానని సీఎం చెప్పడం హాస్యాస్పదంగా ఉందన్నారు. కాంగ్రెస్ పాలనలో రైతుల కళ్లలో కన్నీళ్లు వస్తున్నాయని, ఇందుకు బాధ్యత వహిస్తూ సీఎం ముందుగా తెలంగాణ రైతులకు క్షమాపణ చెప్పాలని డిమాండ్ చేశారు. రైతుభరోసా, రైతుబీమాల అమలుపై అసెంబ్లీలో బహిరంగ చర్చకు తాము సిద్ధంగా ఉన్నామని సవాల్ చేశారు.
కాళేశ్వరం కూలిపోతే.. మూసీకి నీళ్లు ఎక్కడివి?
ప్రభుత్వ వైఫల్యాలను, ప్రాజెక్టుల నిర్వహణ లోపాలను హరీశ్ రావు ఎండగట్టారు.
సింగరేణి టెండర్లు: సింగరేణిలో అవినీతిని తాము బహిర్గతం చేస్తే, అసలు టెండర్లే కాలేదని సీఎం బుకాయిస్తున్నారని మండిపడ్డారు. సృజన్ రెడ్డికి టెండర్లు దక్కిన మాట వాస్తవం కాదా? అని ప్రశ్నించారు. ఇది రుజువు చేయడానికి తాము సిద్ధమని, దమ్ముంటే దీనిపై అసెంబ్లీలో చర్చ పెట్టాలన్నారు.
ఎస్ఎల్బీసీ (SLBC) ప్రాజెక్టు: గత రెండున్నరేళ్లలో ఈ ప్రాజెక్టులో కాంగ్రెస్ ప్రభుత్వం కనీసం 12 మీటర్లు కూడా తవ్వలేదన్నారు. సొరంగంలో అన్యాయంగా 8 మంది అమాయక కార్మికులు చనిపోతే, వారి మృతదేహాలను కూడా బయటకు తీయలేని అసమర్థ ప్రభుత్వం ఇది అని విమర్శించారు.
కాళేశ్వరం నీళ్లు: కాళేశ్వరం ప్రాజెక్టు పనికిరాకుండా పోయిందని విమర్శించిన రేవంత్ రెడ్డి.. మరి ఇప్పుడు హైదరాబాద్ తాగునీటికి, మూసీ నదికి ఎక్కడి నుంచి నీళ్లు తరలిస్తున్నారో సమాధానం చెప్పాలని నిలదీశారు.
ఉద్యమకారులపై తుపాకీ గురిపెట్టిన చరిత్ర నీది!
తెలంగాణ ఉద్యమంలో తన పాత్ర గురించి రేవంత్ రెడ్డి మాట్లాడటం విడ్డూరంగా ఉందని హరీశ్ రావు చురకలంటించారు. తెలంగాణ ఉద్యమం ఉవ్వెత్తున ఎగసిపడుతున్న సమయంలో, హైదరాబాద్ నుంచి కరీంనగర్కు వెళ్తూ తెలంగాణవాదులపై తుపాకీ గురిపెట్టిన చరిత్ర రేవంత్ రెడ్డిది అని గుర్తుచేశారు. అలాంటి వ్యక్తి తెలంగాణ ఉద్యమం, త్యాగాల గురించి మాట్లాడితే రాష్ట్ర ప్రజలు చూసి నవ్వుకుంటారని ఎద్దేవా చేశారు.
