YSR Praja News Telugu : హైదరాబాద్: తెలంగాణలో దశాబ్దాలుగా అన్యాక్రాంతమవుతున్న వక్ఫ్ ఆస్తుల పరిరక్షణకై జాయింట్ యాక్షన్ కమిటీ (JAC) ఆధ్వర్యంలో సాగుతున్న నిరంతర ప్రజా పోరాటాలు, ఆందోళనల ఫలితంగానే ప్రభుత్వంపై ఒత్తిడి పెరిగిందని తెలంగాణ స్టేట్ మైనారిటీ హక్కుల పోరాట సమితి (TSMHPS) రాష్ట్ర అధ్యక్షుడు, జేఏసీ కన్వీనర్ అబ్దుల్ వాహబ్ అన్నారు. జేఏసీ సృష్టించిన ప్రజా ఒత్తిడి కారణంగానే AIMIM శాసనసభ్యుల బృందం ముఖ్యమంత్రి ఎ. రేవంత్ రెడ్డిని కలిసి వక్ఫ్ భూముల పునరుద్ధరణ, పరిహార బకాయిలపై వినతిపత్రం సమర్పించాల్సిన పరిస్థితి ఏర్పడిందని ఆయన స్పష్టం చేశారు.
74 శాతం వక్ఫ్ భూములు ఆక్రమణలోనే!
రాష్ట్రవ్యాప్తంగా వక్ఫ్ బోర్డు పరిధిలోని 33,929 సంస్థల కింద మొత్తం 77,538.61 ఎకరాల భూమి ఉన్నట్లు వెల్లడించారు. అందులో దాదాపు 57,423.91 ఎకరాలు (74.06%) కబ్జాదారుల చేతుల్లోనే ఉన్నాయని, కేవలం 20,114.70 ఎకరాలు మాత్రమే ప్రస్తుతం వక్ఫ్ బోర్డు ఆధీనంలో ఉన్నాయని అబ్దుల్ వాహబ్ ఆందోళన వ్యక్తం చేశారు. ముఖ్యంగా మెదక్, రంగారెడ్డి, ఆదిలాబాద్, మహబూబ్నగర్ జిల్లాల్లో ఆక్రమణల తీవ్రత ఎక్కువగా ఉందన్నారు.
జేఏసీ ప్రధాన డిమాండ్లు:
సెక్షన్ 22-A అమలు: రిజిస్ట్రేషన్ చట్టం-1908లోని సెక్షన్ 22-A కింద వక్ఫ్ భూములను నిషేధిత జాబితాలో చేర్చి, అక్రమ రిజిస్ట్రేషన్లకు తక్షణమే అడ్డుకట్ట వేయాలి.
GHMC పరిహార బకాయిల చెల్లింపు: వివిధ అభివృద్ధి ప్రాజెక్టుల కోసం GHMC సేకరించిన 44 వక్ఫ్ ఆస్తులకు సంబంధించిన రూ.350 కోట్ల పరిహారాన్ని వెంటనే విడుదల చేయాలి.
చారిత్రక వక్ఫ్ సంస్థల పరిరక్షణ: రాయదుర్గంలోని జామియా నిజామియా, మాణికొండలోని హుస్సేన్ షా వలీ దర్గా, ఆలూరులోని మఖ్దూమ్ బియాబాని దర్గా, బాబా షర్ఫుద్దీన్ పహాడీ దర్గా భూ వివాదాలను శాశ్వతంగా పరిష్కరించాలి.
రెండో విడత వక్ఫ్ సర్వే: గతంలో నిలిచిపోయిన రెండో విడత వక్ఫ్ సర్వేను వేగవంతం చేసి అధికారిక లెక్కలను తేల్చాలి.
ముస్లిం శ్మశాన వాటికల రక్షణ: రంగారెడ్డి, మేడ్చల్ జిల్లాల్లో మోడల్ గ్రేవ్యార్డ్స్ కోసం కేటాయించిన 125 ఎకరాలతో పాటు కుర్మాల్గూడ తదితర ప్రాంతాలలోని ముస్లిం శ్మశాన వాటికల భూములను పూర్తిగా పరిరక్షించాలి.
15–30–60–90 రోజుల కాలపట్టిక సమర్పణ:
వక్ఫ్ సమస్యల పరిష్కారానికి ప్రభుత్వం స్పష్టమైన టైమ్-బౌండ్ యాక్షన్ ప్లాన్ ప్రకటించాలని అబ్దుల్ వాహబ్ డిమాండ్ చేశారు:
15 రోజుల్లోగా: సంబంధిత శాఖల సమన్వయంతో జీవో (GO) జారీ చేయాలి.
30 రోజుల్లోగా: GHMC సహా ఇతర శాఖల పరిహార బకాయిల రికన్సిలేషన్ పూర్తి చేయాలి.
60 రోజుల్లోగా: ప్రాధాన్యత ప్రాతిపదికన సర్వేలు, నష్టపరిహార లెక్కలు తేల్చాలి.
90 రోజుల్లోగా: కబ్జాకు గురైన వక్ఫ్ భూముల రికవరీ, రికార్డుల సవరణ ప్రక్రియను పూర్తి చేయాలి.
ప్రభుత్వం కేవలం సమావేశాలకే పరిమితం కాకుండా చేతల్లో స్పందించాలని, నిర్దిష్ట గడువులోగా చర్యలు ప్రారంభించకపోతే జేఏసీ ఆధ్వర్యంలో రాష్ట్రవ్యాప్త ఉద్యమాన్ని మరింత ఉధృతం చేస్తామని హెచ్చరించారు.
