YSR Praja News : విశాఖపట్నం: ఆంధ్రప్రదేశ్‌లో రైతాంగం ఎదుర్కొంటున్న ఇబ్బందులు రోజురోజుకు పెరుగుతున్నాయని శాసనమండలి ప్రతిపక్ష నేత బొత్స సత్యనారాయణ తీవ్ర ఆందోళన వ్యక్తం చేశారు. రాష్ట్రంలో రైతులు పండించిన పంటలకు సరైన గిట్టుబాటు ధర లభించడం లేదని ఆరోపించారు.
పంటలు కోతకు వచ్చే సమయంలో ప్రకృతి విపత్తులు దెబ్బతీస్తే, ప్రభుత్వం మాత్రం రైతుల పట్ల స్పందించడంలో విఫలమైందని ఆయన అన్నారు. “రైతులు పండించిన ప్రతి పంటకు మార్కెట్‌లో ధర పడిపోతుంది. గత ప్రభుత్వం ఏర్పాటు చేసిన పంట కొనుగోలు కేంద్రాలు ఇప్పుడు కనిపించట్లేదు. మొక్కజొన్న ధర క్వింటాకు రూ.2300 నుంచి రూ.1500కు పడిపోతే ప్రభుత్వం ఏ చర్యలు తీసుకుంది?” అని ప్రశ్నించారు.
విశాఖ భూముల విషయంలో ప్రభుత్వం వ్యవహరిస్తున్న తీరు పారదర్శకతలేదని ఆయన మండిపడ్డారు. కోట్ల రూపాయల విలువ చేసే భూములను 99 పైసలకే ఇవ్వడం దోపిడీ తప్ప ఏమి కాదన్నారు. “రియల్ ఎస్టేట్ సంస్థలకు భూములు కేటాయించినప్పుడు ఎందుకు వేలం ద్వారా ఇవ్వలేదు? ఎవరి పేర్లతోనో భూములను దోచుకుంటున్నారు” అని విమర్శించారు.
అంతేకాక, వైఎస్ జగన్ అమలు చేసిన పథకాలకు పేర్లు మార్చి రాజకీయ ప్రయోజనాలు చూసుకుంటున్నారని ఆయన ఆరోపించారు. గిరిజన ప్రాంతాల్లో విద్యార్థులు తీవ్ర ఇబ్బందులు పడుతున్న పరిస్థితిని ప్రభుత్వం పట్టించుకోవడంలేదని వ్యాఖ్యానించారు.
భూసేకరణ అంశంపై మాట్లాడుతూ — “గతంలో రైతులకు ఇచ్చిన భూముల సమస్యలు ఇంకా పరిష్కారం కాలేదు. అలాంటప్పుడు అమరావతి పేరుతో మళ్లీ భూసేకరణ ఎలా?” అని ప్రశ్నించారు. ఐదేళ్ల పాటు చంద్రబాబు భూసేకరణ చేయలేకపోయిన విషయాన్ని కూడా గుర్తుచేశారు.
కేజీహెచ్ పర్యవేక్షణలో లోపాలు, లులు సంస్థకు భూముల కేటాయింపు పట్ల ఆక్షేపణలు వ్యక్తం చేస్తూ… “ఇనార్బిట్ మాల్‌తో పోల్చలేని లులు వంటి సంస్థకు ఎలా భారీ భూములు కేటాయించారు?” అంటూ బొత్స సత్యనారాయణ తీవ్ర విమర్శ
లు చేశారు.
