YSR Praja News Telugu : ఐటీ హబ్గా శరవేగంగా అభివృద్ధి చెందుతున్న విశాఖపట్నంలో ప్రతిష్టాత్మక అదానీ-గూగుల్ డేటా సెంటర్ ఏర్పాటు రాజకీయంగా తీవ్ర దుమారం రేపుతోంది. ఈ ప్రాజెక్టును వైఎస్సార్ కాంగ్రెస్ పార్టీ స్వాగతిస్తున్నప్పటికీ, ఈ డేటా సెంటర్ ద్వారా రాష్ట్ర యువతకు ఎన్ని ఉద్యోగాలు వస్తాయో ముఖ్యమంత్రి నారా చంద్రబాబు నాయుడు ఎందుకు చెప్పడం లేదని మాజీ మంత్రి, వైసీపీ పశ్చిమ గోదావరి జిల్లా రీజినల్ కో ఆర్డినేటర్ గుడివాడ అమర్నాథ్ సూటిగా ప్రశ్నించారు.
మంగళవారం విశాఖపట్నం మద్దిలపాలెంలోని పార్టీ కార్యాలయంలో మీడియాతో మాట్లాడిన ఆయన.. కూటమి ప్రభుత్వం, మంత్రుల తీరుపై తీవ్ర స్థాయిలో విరుచుకుపడ్డారు. భారీ ఎత్తున ప్రభుత్వ నిధులను, వనరులను ధారదత్తం చేస్తున్నప్పుడు, దానికి తగ్గట్టుగా ఉపాధి కల్పన ఎందుకు జరగడం లేదో ప్రజలకు వివరించాల్సిన బాధ్యత ప్రభుత్వంపై ఉందన్నారు.
రాయితీలు కొండంత.. ఉద్యోగాలు గోరంత!
తాజాగా విశాఖలో జరిగిన అదానీ గూగుల్ డేటా సెంటర్ శంకుస్థాపన కార్యక్రమంలో సీఎం చంద్రబాబు, మంత్రి నారా లోకేశ్ సహా కూటమి నాయకులు ఎవ్వరూ కూడా ఉద్దేశపూర్వకంగానే ‘ఉద్యోగాల కల్పన’ అనే అంశాన్ని ప్రస్తావించకుండా రాష్ట్ర యువతను దారుణంగా మోసం చేస్తున్నారని అమర్నాథ్ ఆరోపించారు. ఈ భారీ సెంటర్ ఏర్పాటు కోసం రాష్ట్ర ప్రభుత్వం ఏకంగా 600 ఎకరాల విలువైన భూమితో పాటు రూ.22 వేల కోట్ల భారీ రాయితీలను కట్టబెడుతోందని గుర్తుచేశారు. ఇవి మాత్రమే కాకుండా, ఈ ప్రాజెక్టుకు భారీ ఎత్తున నీరు, নিরంతర విద్యుత్ సరఫరా కూడా ఇవ్వాల్సి ఉంటుందన్నారు.
ఇంత భారీ స్థాయిలో ప్రజాధనాన్ని, వనరులను రాయితీలుగా ప్రకటిస్తున్నా.. కనీసం ఎన్ని ఉద్యోగాలు కల్పిస్తున్నారనే దానిపై పాలకుల్లో ఎవరూ మాట్లాడకపోవడం ఆశ్చర్యంగా ఉందన్నారు. గత అక్టోబర్ నెలలో ఢిల్లీలో ఒప్పందం జరిగినప్పుడు, ఈ డేటా సెంటర్ ద్వారా ఏకంగా 1.80 లక్షల మందికి ఉద్యోగాలు వస్తాయని చంద్రబాబు సహా మంత్రులు, కూటమి నాయకులు ఊదరగొట్టారని ఎద్దేవా చేశారు. కానీ, వాస్తవ ఒప్పందంలో మాత్రం కేవలం 200 ఉద్యోగాలు మాత్రమే వస్తాయనే అంశాన్ని గుర్తించి వైఎస్సార్సీపీ ఆధ్వర్యంలో ప్రభుత్వాన్ని నిలదీశామన్నారు. కనీసం ఈ రోజు శంకుస్థాపన సందర్భంగానైనా సరే ఉపాధి కల్పనపై స్పష్టత ఇవ్వకపోవడం ఎన్నో అనుమానాలకు తావిస్తోందని విమర్శించారు.
నాడు వైఎస్సార్సీపీ హయాంలో భారీ ప్రణాళిక.. 25 వేల ఉద్యోగాలు
గత వైఎస్సార్సీపీ ప్రభుత్వ హయాంలో ఈ ప్రాజెక్టు పట్ల తీసుకున్న దార్శనికతను అమర్నాథ్ ఈ సందర్భంగా వివరించారు. తమ ప్రభుత్వంలోనే విశాఖలో అదానీ డేటా సెంటర్ ఏర్పాటుకు 130 ఎకరాల స్థలాన్ని కేటాయించామని, అదే సమయంలో స్థానిక యువతకు ఉద్యోగాల కల్పనపై ఆ సంస్థ నుంచి పక్కాగా హామీ తీసుకున్నామని గుర్తుచేశారు.
“విశాఖ డేటా సెంటర్ కు డేటా రావాలంటే సింగపూర్ నుంచి 3,900 కిలోమీటర్ల పొడవున సముద్ర గర్భం (సబ్సి) లో కేబుళ్లు వేయాలని నాడే (2021 మార్చి 9న) సింగపూర్ ప్రభుత్వానికి మేం లేఖ రాశాం. కేవలం డేటా సెంటర్ మాత్రమే కాకుండా, దానితో పాటు ఐటీ పార్కు, రీక్రియేషన్ సెంటర్, స్కిల్ యూనివర్సిటీ ఏర్పాటు చేసేలా నాడు వైఎస్ జగన్ ప్రభుత్వం ఆదానీ గ్రూప్ తో ఒప్పందం చేసుకుంది. ఆ సమగ్ర ప్రణాళికతో ఏకంగా 25 వేల మందికి ఉద్యోగాల కల్పనకు ఆ సంస్థను ఒప్పించాం. ఈ నేపథ్యంలోనే విశాఖలో 300 మెగావాట్ల అదానీ డేటా సెంటర్ ఏర్పాటుకు 2023 మే 3న నాడు శంకుస్థాపన చేశాం” అని అమర్నాథ్ స్పష్టం చేశారు. నాడు తక్కువ భూమి ఇచ్చి ఎక్కువ ఉద్యోగాలు సాధిస్తే, నేడు వందల ఎకరాలు ఇచ్చి వేల కోట్లు రాయితీ ఇస్తూ యువతకు మాత్రం మొండిచెయ్యి చూపుతున్నారని మండిపడ్డారు.
అంతర్జాతీయ వేదికలపై లోకేశ్ రాజకీయాలు.. ఆయన అవివేకానికి నిదర్శనం
సాంకేతికత, అభివృద్ధికి సంబంధించిన ఒక డేటా సెంటర్ శంకుస్థాపన వేదిక మీద కూడా ఐటీ శాఖ మంత్రి నారా లోకేశ్ పనికిమాలిన రాజకీయాలు మాట్లాడటం ఆయన అల్పబుద్ధిని సూచిస్తోందని అమర్నాథ్ ఘాటుగా విమర్శించారు. పారిశ్రామికవేత్తలు, అంతర్జాతీయ ప్రతినిధులు ఉన్న వేదికపై తన శాఖ విజన్ గురించి కాకుండా.. గొడ్డలి, లడ్డూ అంటూ లోకేశ్ చేసిన రాజకీయ ప్రసంగం ఆయన అవివేకానికి నిదర్శనమని దుయ్యబట్టారు. రాష్ట్రానికి పెట్టుబడులు తెచ్చే వేదికలను ఇలా రాజకీయ విమర్శలకు వాడుకోవడం రాష్ట్ర పరువును బజారున పడేయడమేనని వైఎస్సార్సీపీ నేతలు ఆగ్రహం వ్యక్తం చేస్తున్నారు.
