YSR Praja News Telugu : హైదరాబాద్/కొడంగల్: ముఖ్యమంత్రి రేవంత్ రెడ్డి సొంత నియోజకవర్గమైన కొడంగల్లో మైనారిటీ వర్గాలు ప్రభుత్వ వైఖరిపై తీవ్ర అసంతృప్తి వ్యక్తం చేస్తున్నాయి. ఇటీవల కూల్చివేసిన ప్రార్థనా స్థలాల పునర్నిర్మాణంపై ప్రభుత్వం ఇచ్చిన హామీలు అమలు కావడం లేదని ఆరోపిస్తూ, మైనారిటీ సంఘాలు బహిరంగంగా నిరసన స్వరం వినిపిస్తున్నాయి.
తెలంగాణ స్టేట్ మైనారిటీ హక్కుల పోరాట సమితి రాష్ట్ర అధ్యక్షుడు అబ్దుల్ వాహాబ్ నేతృత్వంలో విడుదలైన ప్రకటన కొడంగల్ రాజకీయాల్లో చర్చనీయాంశంగా మారింది. పట్టణ పరిధిలోని కొన్ని ప్రార్థనా స్థలాలు, సమాధి స్థలాలు, ఆశుర్ఖానాలను అధికారులు రాత్రికి రాత్రే కూల్చివేశారని ఆరోపణలు చేస్తున్నారు. ఈ చర్య మైనారిటీల మనోభావాలను తీవ్రంగా దెబ్బతీసిందని వారు అంటున్నారు.
“కూల్చిన చోటే పునర్నిర్మాణం చేయాలి”
ప్రభుత్వం అప్పట్లో పునర్నిర్మాణానికి హామీ ఇచ్చినప్పటికీ, నెలలు గడుస్తున్నా ఎటువంటి స్పష్టమైన చర్యలు కనిపించడం లేదని మైనారిటీ నాయకులు విమర్శిస్తున్నారు. “ఎక్కడ కూల్చారో అక్కడే ప్రార్థనా స్థలాలను తిరిగి నిర్మించాలి” అంటూ ప్రభుత్వానికి అల్టిమేటం జారీ చేశారు.
సీఎం హామీలపై ప్రశ్నలు
“ముఖ్యమంత్రి గారు ఇచ్చిన మాట ఏమైంది? మైనారిటీల ఆత్మగౌరవంతో ఆడుకోవద్దు” అంటూ నాయకులు ఘాటుగా వ్యాఖ్యానించారు. ప్రజాస్వామ్యంలో హామీలకు విలువ ఉండాలని, ముఖ్యంగా మత, సామాజిక అంశాల్లో ప్రభుత్వం సున్నితంగా వ్యవహరించాలని వారు కోరుతున్నారు.
మున్సిపల్ ఎన్నికల ముందు హెచ్చరిక
రాబోయే మున్సిపల్ ఎన్నికల నేపథ్యంలో ఈ అంశం రాజకీయంగా కీలకంగా మారింది. ప్రభుత్వం తక్షణమే స్పందించి పునర్నిర్మాణ పనులు ప్రారంభించకపోతే, మైనారిటీలు తమ ఆగ్రహాన్ని ఎన్నికల ద్వారా వ్యక్తం చేస్తారని హెచ్చరించారు. కొడంగల్లో ఈ పరిణామాలు అధికార పక్షానికి రాజకీయంగా కొత్త సవాళ్లను తెచ్చే అవకాశముందని రాజకీయ వర్గాలు విశ్లేషిస్తున్నాయి.
