కోర్టు ఆదేశాలపై నిర్లక్ష్యం తగదు: హైడ్రా కమిషనర్‌కు హైకోర్టు హెచ్చరిక

YSR Praja News Telugu : హైదరాబాద్: న్యాయస్థానం ఉత్తర్వులను తేలికగా తీసుకోవడమా? అని హైడ్రా కమిషనర్ మీద హైకోర్టు ద్విసభ్య ధర్మాసనం తీవ్ర అసహనం వ్యక్తం చేసింది. కోర్టు ముందు హాజరై వివరణ ఇవ్వాలన్న ఆదేశాలను కూడా పట్టించుకోకుండా నిర్లక్ష్యంగా వ్యవహరించడం సరికాదని స్పష్టం చేసింది.

కోర్టుల పట్ల గౌరవం తప్పనిసరిగా ఉండాలని, అహంకారపూరితంగా వ్యవహరించకూడదని ధర్మాసనం సూచించింది. ఎలాంటి పరిస్థితుల్లోనైనా కోర్టు ఆదేశాలను పాటించాల్సిందేనని చెప్పింది. అవసరమైతే ఉదయం 10:30 నుంచి సాయంత్రం 4:30 గంటల వరకు విచారణకు హాజరుకావాల్సిందేనని ఘాటు వ్యాఖ్యలు చేసింది.

అలాగే తదుపరి విచారణకు కూడా హాజరుకాకపోతే నాన్ బెయిలబుల్ వారెంట్ (NBW) జారీ చేయాల్సి వస్తుందని స్పష్టంగా హెచ్చరించింది. ఈ కేసు తదుపరి విచారణను వచ్చే నెల 5వ తేదీకి వాయిదా వేసింది.

ఈ వ్యవహారానికి సంబంధించి బతుకమ్మకుంట భూ వివాదంపై జూన్ 12న హైకోర్టు స్టేటస్ కో ఉత్తర్వులు జారీ చేసింది. అయితే ఆ ఉత్తర్వులను హైడ్రా ఉల్లంఘించిందని ఆరోపిస్తూ ఎ. సుధాకర్ రెడ్డి హైకోర్టులో ధిక్కరణ పిటిషన్ దాఖలు చేశారు.

ఈ పిటిషన్‌పై జస్టిస్ మౌషుమి భట్టాచార్య మరియు జస్టిస్ బీఆర్ మధుసూదన్ రావులతో కూడిన ధర్మాసనం మరోసారి విచారణ చేపట్టింది.

మునుపటి విచారణలో హాజరై వివరణ ఇవ్వాలని ఆదేశించినప్పటికీ కమిషనర్ రంగనాథ్ హాజరు కాకపోవడంతో ధర్మాసనం తీవ్ర అసంతృప్తి వ్యక్తం చేసింది. అధికారిక పనులు, విపత్తు నిర్వహణ బాధ్యతల వల్ల వ్యక్తిగత హాజరు నుంచి మినహాయింపు ఇవ్వాలంటూ దాఖలు చేసిన మధ్యంతర పిటిషన్‌ను కోర్టు కొట్టివేసింది.

తన హాజరు వల్ల కోర్టుకు ఇబ్బంది కలగకూడదని భావిస్తున్నామని న్యాయవాది వాదించడాన్ని కూడా ధర్మాసనం తీవ్రంగా తప్పుబట్టింది. కోర్టు ముందు వ్యక్తిగతంగా హాజరు కావడం తప్పనిసరి అని స్పష్టం చేసింది.

రైతుల సమస్యలపై వైఎస్ జగన్ కీలక వ్యాఖ్యలు

YSR Praja News Telugu : వైఎస్సార్ జిల్లా పులివెందులరాష్ట్రంలో రైతుల పరిస్థితి రోజురోజుకు దిగజారుతోందని వైఎస్సార్సీపీ అధినేత, మాజీ ముఖ్యమంత్రి వైఎస్ జగన్‌మోహన్ రెడ్డి తీవ్ర ఆవేదన వ్యక్తం చేశారు. బుధవారం పులివెందుల నియోజకవర్గంలోని బ్రహ్మణపల్లి గ్రామంలో అరటి తోటలను ఆయన స్వయంగా పరిశీలించి, పంట నష్టాలపై రైతులను వివరంగా అడిగి తెలుసుకున్నారు.

ఈ సందర్భంగా మీడియాతో మాట్లాడుతూ, వైఎస్ జగన్ గత ప్రభుత్వ కాలాన్ని గుర్తు చేశారు. తమ హయాంలో అరటి పంటకు టన్నుకు సుమారు రూ.30 వేల వరకు ధర లభించిందని తెలిపారు. కరోనా వంటి క్లిష్ట సమయంలోనూ లక్షల టన్నుల అరటి పంటను విదేశాలకు ఎగుమతి చేయగలిగామని చెప్పారు. అరటి ఎగుమతుల కోసం అనంతపురం–ఢిల్లీ, తాడిపత్రి–ముంబై మార్గాల్లో ప్రత్యేక రైల్వే రవాణా సౌకర్యాలు ఏర్పాటు చేసిన విషయాన్ని గుర్తు చేశారు. ఆ కృషికి గాను కేంద్రం నుంచి అవార్డులు కూడా అందుకున్నామని తెలిపారు.

కానీ, ప్రస్తుత కూటమి ప్రభుత్వ పాలనలో అరటి రైతుల పరిస్థితి దిగజారిపోయిందని విమర్శించారు. ప్రస్తుతం టన్ను అరటి పంటకు రూ.2 వేల ధర కూడా లభించడం లేదని, పంట చెట్లపైనే మాగిపోతుందని ఆవేదన వ్యక్తం చేశారు. ఒకప్పుడు వ్యవసాయ రంగంలో ముందున్న రాష్ట్రం, ఇవాళ ఇంత దుస్థితికి చేరిందని ప్రశ్నించారు.

గత 17 నెలల పాలనలో వరుసగా ప్రకృతి విపత్తులు ఎదురైనా, రైతులకు కనీస సాయం కూడా అందలేదని విమర్శించారు. తమ పాలనలో సీజన్ ముగిసేలోపు ఇన్‌పుట్ సబ్సిడీ అందించామని గుర్తుచేశారు. కానీ ప్రస్తుత ప్రభుత్వం ఇప్పటివరకు ఒక్క రూపాయి కూడా సబ్సిడీ ఇవ్వలేదన్నారు.

రైతులకు ’అన్నదాత సుఖీభవ’ పథకం కింద రూ.40 వేల ఆర్థిక సాయం అందిస్తామని హామీ ఇచ్చిన ప్రభుత్వం, కనీసం రూ.10 వేలైనా ఇవ్వకుండా నిర్లక్ష్యం చేస్తోందని ఆరోపించారు. నాణ్యమైన ఎరువులు కూడా బ్లాక్ మార్కెట్ ధరలకు కొనాల్సిన పరిస్థితి నెలకొందని అన్నారు.

ఇంటిగ్రేటెడ్ కోల్డ్ స్టోరేజీలను విద్యుత్ ఆదా పేరుతో మూసివేయడంపై కూడా ఆయన తీవ్ర అసహనం వ్యక్తం చేశారు. ఉన్న కోల్డ్ స్టోరేజీలను కూడా సమర్థంగా వినియోగించుకోవడం లేదని వ్యాఖ్యానించారు. వైఎస్సార్సీపీ హయాంలో వ్యవసాయం ఒక పండుగలా సాగిందని, చంద్రబాబు నాయుడు ముఖ్యమంత్రి అయ్యాక ఈ రంగం తిరోగమనంలోకి వెళ్లిందని జగన్ ఆరోపించారు.

ప్రస్తుత కూటమి ప్రభుత్వం రైతుల పట్ల నిర్లక్ష్యంగా వ్యవహరిస్తోందని, రైతుల ఆవేదన చివరకు ప్రభుత్వాన్ని కుదిపేస్తుందని ఆయన హెచ్చరించారు.

హైదరాబాద్: విద్యారంగంపై కాంగ్రెస్ వైఫల్యాలపై ఉద్యమానికి పిలుపునిచ్చిన కేటీఆర్

YSR Praja News Telugu : తెలంగాణలో విద్యారంగాన్ని నిర్వీర్యం చేస్తున్న కాంగ్రెస్ ప్రభుత్వ వైఫల్యాలు, అవ్యవస్థలపై విద్యార్థులు సమరానికి సిద్ధం కావాలని బీఆర్ఎస్ వర్కింగ్ ప్రెసిడెంట్ కేటీఆర్ పిలుపునిచ్చారు. విద్య అభివృద్ధిలో బీఆర్ఎస్ ఎలాంటి కృషి చేయలేదని కాంగ్రెస్ పార్టీ చేస్తున్న తప్పుడు ప్రచారాన్ని ఖండించాలని పేర్కొన్నారు. ఫీజు రీయింబర్స్మెంట్ బకాయిల విడుదల కోసం వచ్చే నెల నుంచి పెద్ద ఎత్తున ఉద్యమాలు చేపట్టనున్నట్లు ప్రకటించారు.

ప్రతి అసెంబ్లీ నియోజకవర్గ కేంద్రంలో వేలాది మంది విద్యార్థులతో భారీ నిరసన కార్యక్రమాలు నిర్వహించాలని బీఆర్ఎస్ విద్యార్థి విభాగానికి సూచించారు. గురుకుల విద్యాలయాల్లో కల్తీ ఆహారం ఘటనలు, విద్యార్థుల ఆత్మహత్యలపై తీవ్ర ఆవేదన వ్యక్తం చేశారు.

మంగళవారం నందినగర్ నివాసంలో బీఆర్ఎస్ విద్యార్థి విభాగం నేతలతో సమావేశమైన కేటీఆర్‌, చేపట్టాల్సిన కార్యక్రమాలపై మార్గదర్శనం చేశారు.

—

సమకాలీన రాజకీయాలపై విద్యార్థుల స్పందన అవసరం

విద్యార్థులు తప్పనిసరిగా సోషల్ మీడియా వేదికగా సమకాలీన రాజకీయ అంశాలపై స్పందించాలని కేటీఆర్ తెలిపారు. విద్య, ఉద్యోగ, ఉపాధి రంగాల్లో కాంగ్రెస్ ప్రభుత్వం చేస్తున్న అన్యాయాలను ప్రజల్లోకి తీసుకెళ్లాలని కోరారు.

స్థానిక సంస్థలతో పాటు విద్య, ఉద్యోగాల్లో 42 శాతం బీసీ రిజర్వేషన్లు అమలు చేస్తామన్న కాంగ్రెస్ హామీలపై యువత అప్రమత్తంగా ఉండాలన్నారు.

—

దీక్షా దివస్‌ను విజయవంతం చేయాలి

తెలంగాణ రాష్ట్ర సాధన ఉద్యమంలో పార్టీ అధినేత చేపట్టిన దీక్షా దివస్ చారిత్రాత్మక ఘట్టమని కేటీఆర్‌ చెప్పారు. విద్యార్థులు, అమరుల త్యాగాల వల్లే ప్రత్యేక రాష్ట్రం సాధ్యమైందని గుర్తు చేశారు.

నవంబర్ 29న జరిగే దీక్షా దివస్ కార్యక్రమాన్ని అన్ని యూనివర్సిటీలు, కళాశాలల్లో ఘనంగా నిర్వహించాలని పిలుపునిచ్చారు.

—

‘హిల్టీ పీ’ పేరుతో భారీ భూదందా జరుగుతోందన్న కేటీఆర్

‘హిల్టీ పాలసీ’ పేరుతో పారిశ్రామిక భూములను ప్రైవేటు వ్యక్తులకు బదలాయించే కుట్ర జరుగుతోందని కేటీఆర్ ఆరోపించారు. ఈ విధానంతో వేల ఎకరాల భూములను ధారాదత్తం చేసి భారీ అవినీతికి కాంగ్రెస్ ప్రభుత్వం తెరలేపిందన్నారు.

ప్రజలను చైతన్యపర్చేలా విద్యార్థి నాయకులు ప్రత్యేక అవగాహన కార్యక్రమాలు చేపట్టాలని సూచించారు.

ఈ కార్యక్రమంలో మాజీ మంత్రి జగదీశ్ రెడ్డి, మాజీ ఎమ్మెల్యే బాల్క సుమన్, బీఆర్ఎస్‌వీ అధ్యక్షుడు గెల్లు శ్రీనివాస్ యాదవ్ తదితరులు పాల్గొన్నారు. ఈ సందర్భంగా దీక్షా దివస్ పోస్టర్‌ను కేటీఆర్ ఆవిష్కరించారు.

రూ.1,200 ఈ-చలాన్ వివాదం – తెలంగాణ హైకోర్టు కీలక విచారణ

YSR Praja News : హైదరాబాద్:రాష్ట్రంలో అమలులో ఉన్న ఈ-చలాన్ వ్యవస్థ చట్టబద్ధతపై స్పష్టత ఇవ్వాలని హైకోర్టు తెలంగాణ ప్రభుత్వాన్ని ఆదేశించింది. ఈ-చలాన్ పోర్టల్‌లో జరుగుతున్న మార్పులు, అప్డేట్‌లపై పూర్తి వివరాలు సమర్పించాలని సూచించింది.

ఈ విషయమై హోంశాఖ ముఖ్య కార్యదర్శి, డీజీపీ, హైదరాబాద్ ట్రాఫిక్ జాయింట్ కమిషనర్‌లు కౌంటర్ దాఖలు చేయాలని కోర్టు ఆదేశాలు జారీ చేసింది. తదుపరి విచారణను డిసెంబర్ 9వ తేదీకి వాయిదా వేసింది.

సికింద్రాబాద్‌కు చెందిన వి. రాఘవేంద్రచారి అనే వ్యక్తి, తన ద్విచక్ర వాహనంపై ట్రిపుల్ రైడింగ్‌కు విధించిన చలాన్‌ను సవాల్ చేస్తూ హైకోర్టులో పిటిషన్ దాఖలు చేశారు. ఈ క్రమంలో రూ. 1,200 జరిమానాతో పాటు రూ. 35 యూజర్ చార్జీలతో కలిపి మొత్తం రూ. 1,235 చలాన్ విధించడంపై ఆయన అభ్యంతరం తెలిపారు.

ఈ పిటిషన్‌ను జస్టిస్ ఎన్పీ శ్రవణ్ కుమార్ విచారించారు. పిటిషనర్ తరఫు న్యాయవాది మాట్లాడుతూ, చలాన్ విధించే సమయంలో సంబంధిత చట్టపరమైన నిబంధనలను అధికారులు స్పష్టంగా పేర్కొనలేదని వాదించారు.

అలాగే ఈ జరిమానా మోటారు వాహనాల చట్టం, కేంద్ర నిబంధనలకు విరుద్ధమని తెలిపారు. నిబంధనల ప్రకారం రూ. 100 నుంచి రూ. 300 మధ్య మాత్రమే జరిమానా ఉండాల్సి వుండగా, రూ. 1,200 విధించడం అన్యాయమని కోర్టు దృష్టికి తీసుకువచ్చారు. అధిక జరిమానాల వల్ల మధ్యతరగతి ప్రజలకు భారం పెరుగుతోందని తెలిపారు.

ప్రభుత్వం తరఫు న్యాయవాది స్పందిస్తూ, చలాన్‌పై అభ్యంతరం ఉన్నవారు సంబంధిత అధికారులకు వినతిపత్రం ఇవ్వవచ్చని పేర్కొన్నారు. తెలంగాణ పోలీస్ ఇంటిగ్రేటెడ్ ఈ-చలాన్ వ్యవస్థలో కొన్ని వివరాలు ఇంకా అప్‌లోడ్ కాలేదని, వాటిని త్వరలో చేర్చేందుకు చర్యలు తీసుకుంటున్నట్లు తెలిపారు.

వాదనలు విన్న హైకోర్టు, ప్రతివాదులు కౌంటర్ దాఖలు చేయాలని ఆదేశిస్తూ కేసు విచారణను వా

యిదా వేసింది.

తెలంగాణ గ్రామ పంచాయతీ ఎన్నికల షెడ్యూల్ విడుదల

YSR Praja News : హైదరాబాద్: తెలంగాణ గ్రామ పంచాయతీ ఎన్నికల షెడ్యూల్‌ను రాష్ట్ర ఎన్నికల సంఘం విడుదల చేసింది. మూడు దశల్లో ఎన్నికల నిర్వహణ చేపట్టనున్నట్టు రాష్ట్ర ఎన్నికల ప్రధాన అధికారి రాణి కుముదిని మంగళవారం సాయంత్రం ప్రకటించారు. షెడ్యూల్ విడుదలతో వెంటనే ఎన్నికల ప్రవర్తనా నియమావళి అమల్లోకి వచ్చినట్లు ఆమె స్పష్టం చేశారు.

ఈ ఎన్నికలు మూడు విడతల్లో జరగనున్నాయి.

మొదటి విడత నామినేషన్ల స్వీకరణ ఈ నెల 27 నుంచి, రెండో విడత ఈ నెల 30 నుంచి, మూడో విడత డిసెంబర్ 3 నుంచి ప్రారంభం కానుంది. పోలింగ్‌ను డిసెంబర్ 11, 14, 17 తేదీల్లో నిర్వహించనున్నట్లు ప్రకటించారు.

పోలింగ్ సమయం ఉదయం 7 గంటల నుంచి మధ్యాహ్నం 1 గంట వరకు కొనసాగనుంది. ఓట్ల లెక్కింపు అదే రోజు మధ్యాహ్నం 2 గంటల నుంచి ప్రారంభం అవుతుందని ఎన్నికల సంఘం వెల్లడించింది.

రాష్ట్రవ్యాప్తంగా గ్రామీణ ప్రాంతాల్లో సుమారు కోటి 66 లక్షల మంది ఓటర్లు ఉన్నారని అధికారులు తెలిపారు. గతంలో కొన్ని అనివార్య కారణాల వల్ల గ్రామ పంచాయతీ ఎన్నికలు వాయిదా పడ్డాయని, ప్రస్తుతం అన్ని ఏర్పాట్లు పూర్తి చేసి సర్పంచ్‌లు, వార్డు సభ్యుల ఎన్నికలకు సిద్ధంగా ఉన్నామని రాణి కుముదిని పేర్కొన్నారు.

తెలంగాణలోని 31 జిల్లాల పరిధిలో మొత్తం 12,760 గ్రామ పంచాయతీలు, 1,13,534 వార్డు స్థానాలకు ఎన్నికలు నిర్వహించనున్నారు. ఇప్పటికే ఎన్నికల పరిశీలకులను నియమించినట్లు తెలిపారు. ఓటర్ల జాబితా సహా అన్ని వివరాలను ఎన్నికల సంఘం వెబ్‌సైట్‌లో పొందుపరుస్తామని వెల్లడించారు.

ప్రజాస్వామ్య పండుగలో ప్రతి ఓటరు పాల్గొనాలని, తమ ఓటు హక్కును తప్పకుండా వినియోగించుకోవాలని రాష్ట్ర ఎన్నికల కమిషనర్ ప్రజలకు విజ్ఞప్తి

చేశారు.

పులివెందులలో జగన్ ప్రజా దర్బార్‌… వేలాదిగా తరలివచ్చిన ప్రజలు

YSR Praja News : వైఎస్సార్ జిల్లా, పులివెందుల:

వైఎస్సార్సీపీ అధినేత, మాజీ ముఖ్యమంత్రి వైఎస్ జగన్‌మోహన్ రెడ్డి పులివెందులకు రాకతో పట్టణం కిక్కిరిసిపోయింది. భాకరాపురంలోని తన క్యాంప్ కార్యాలయంలో మంగళవారం ఆయన ప్రజా దర్బార్ నిర్వహించి, కార్యకర్తలు, అభిమానులు, ప్రజలతో ముఖాముఖి మాట్లాడారు.

వివిధ గ్రామాల నుంచి వచ్చిన ప్రజలను ఆప్యాయంగా పలకరిస్తూ వారి సమస్యలను ఓపికగా విన్న జగన్, “మీకు నేను అండగా ఉన్నాను” అంటూ ధైర్యం నింపారు. తమ సమస్యలపై స్పందిస్తూ, అవసరమైన చోట్ల కడప ఎంపీ వైఎస్ అవినాష్ రెడ్డికి తగిన సూచనలు చేశారు.

ప్రభుత్వ తీరుపై ప్రజల ఆవేదన

ప్రస్తుత ప్రభుత్వం నుంచి తమకు ఎలాంటి ప్రయోజనం అందడంలేదని పలువురు ప్రజలు జగన్ ఎదుట తమ గోడును వ్యక్తం చేశారు. అన్ని వర్గాలకు వైఎస్సార్సీపీ అండగా నిలుస్తుందని జగన్ భరోసా ఇచ్చారు. ప్రజల సమస్యలపై ప్రభుత్వాన్ని ప్రశ్నిస్తామని హామీ ఇచ్చారు.

రైతుల ఆర్తనాదం

తుపాన్లు, భారీ వర్షాలు పడుతున్నప్పటికీ తమ పంటలకు నష్టపరిహారం అందడంలేదని రైతులు ఆవేదన వ్యక్తం చేశారు. గత వైఎస్సార్సీపీ పాలనలో భరోసాగా జీవించామని, ఇప్పుడు వ్యవసాయం అంటే భయపడే పరిస్థితి వచ్చిందని చెప్పారు. రైతుల హక్కుల కోసం పోరాటం చేస్తామని జగన్ స్పష్టం చేశారు.

వైద్య విద్యార్థుల వేదన

మెడికల్ కాలేజీల ప్రైవేటీకరణ అంశంపై పలువురు వైద్యవిద్యార్థులు జగన్‌ను కలిసి తమ సమస్యలు వివరించారు. పులివెందుల, పాడేరు ప్రాంతాలకు రావాల్సిన సీట్లు కోల్పోయామని వారు తెలిపారు. ఒక్క మార్కుతో సీటు కోల్పోయిన చరణ్ అనే విద్యార్థి వేదన జగన్‌ను కదిలించింది. ఈ అంశాన్ని కేంద్రం దృష్టికి తీసుకెళ్లి న్యాయం చేస్తానని ఆయన హామీ ఇచ్చారు.

అభిమానులతో మమేకం

జగన్‌ను చూడటానికి భారీగా అభిమానులు క్యాంప్ కార్యాలయానికి తరలివచ్చారు. దివ్యాంగులు, మహిళలు, పిల్లలను ఆప్యాయంగా పలకరిస్తూ, యువకులతో సెల్ఫీలు తీసుకున్నారు. కార్యక్రమం అంతా ఉత్సాహభరిత

వాతావరణంలో సాగింది.

సీఎం–డిప్యూటీ సీఎం మధ్య దూరం? బహిరంగ వేదికపై మారిన వాతావరణం

YSR Praja News : శిడ్లఘట్ట (చిక్కబళ్లాపుర):

సీఎం కుర్చీ అంశంపై చర్చలు కొనసాగుతున్న వేళ, కర్ణాటక ముఖ్యమంత్రి సిద్దరామయ్య మరియు డిప్యూటీ సీఎం డీకే శివకుమార్ కలిసి కార్యక్రమాల్లో పాల్గొంటున్నా… ఇద్దరి మధ్య గతంలో కనిపించిన ఆత్మీయత మాత్రం తాజాగా కనిపించడం లేదు.

సోమవారం శిడ్లఘట్టలో నిర్వహించిన అభివృద్ధి పనుల ప్రారంభ సభలో ఆసక్తికర సన్నివేశాలు చోటుచేసుకున్నాయి. డీకే శివకుమార్ వచ్చేవరకు వేచి చూడకుండా సీఎం సిద్దరామయ్య భూమి పూజను పూర్తిచేశారు. ఈ కార్యక్రమంలో మంత్రులు కే.హెచ్. మునియప్ప, ఎం.సీ. సుధాకర్, హెచ్.సీ. మహదేవప్ప పాల్గొన్నారు.

కొద్ది ఆలస్యంగా వేదికకు చేరుకున్న డీకే శివకుమార్ ప్రజలకు చేతులు ఊపుతూ అభివాదం చేసి, వేదికపై ఉన్న మంత్రులు, ఎమ్మెల్యేలకు చేతులెత్తి నమస్కారం చేశారు. సీఎం సిద్దరామయ్య ముందుకూడా వంగి అభివాదం చేశారు. అయితే గతంలో ఇరువురు కలుసుకున్నప్పుడు కనిపించిన సన్నిహిత సంభాషణలు, చిరునవ్వులు ఈసారి స్పష్టంగా కనిపించలేదు. ఇద్దరి ముఖాల్లోనూ కొంత సీరియస్‌ భావన కనిపించిందని స్థానిక నేతలు వ్యాఖ్యానించారు.

—

ఢిల్లీ బాట పట్టిన డీకే వర్గ ఎమ్మెల్యేలు

డీకే శివకుమార్‌ను భవిష్యత్ ముఖ్యమంత్రిగా పరిగణించాలని కోరుతూ కాంగ్రెస్‌కు చెందిన కొంతమంది ఎమ్మెల్యేలు మళ్లీ ఢిల్లీకి వెళ్లారు. ఇటీవల 7 నుంచి 8 మంది ఎమ్మెల్యేలు కాంగ్రెస్ అధ్యక్షుడు మల్లికార్జున ఖర్గే సహా పార్టీ పెద్దలను కలిసి విజ్ఞప్తులు చేసిన విషయం తెలిసిందే.

ఈసారి చన్నగిరి ఎమ్మెల్యే బసవరాజు శివగంగ, మాగడి ఎమ్మెల్యే బాలకృష్ణ, రామనగర ఎమ్మెల్యే హుసేన్ ఇక్బాల్, మద్దూరు ఎమ్మెల్యే ఉదయ్ కడలూరు, హొసకోట ఎమ్మెల్యే శరత్ బచ్చేగౌడ, మూడిగెర ఎమ్మెల్యే నయన మోటమ్మ, ఆనేకల్ ఎమ్మెల్యే శ్రీనివాస్ మానె ఢిల్లీ పర్యటన చేపట్టినట్లు సమాచారం.

—

డీకే నివాసానికి సాధువుల సందర్శనం

ఇదిలా ఉండగా, డిప్యూటీ సీఎం డీకే శివకుమార్ నివాసానికి ఆధ్యాత్మిక ప్రముఖులు తరలివచ్చారు. బెంగళూరులోని సదాశివనగరలో ఆయన నివాసానికి కాశీ నుంచి వచ్చిన వేదగిరి నాగ బాబా ప్రత్యేక పూజలు నిర్వహించి డీకేకు ఆశీర్వాదం చేశారు. ఆయన తలపై చేయి ఉంచి భుజం తట్టడం ద్వారా ఆశీర్వచనాలు ఇచ్చారు.

అలాగే కొన్ని ప్రాంతాలకు చెందిన జ్యోతిష్యులు, దేవస్థానాల పూజారులు డీకే త్వరలో ముఖ్యమంత్రి కానున్నారంటూ వ్యాఖ్యానించినట్లు ఆయన వర్గాలు చెబుతున్నాయి.

—

ఢిల్లీ పర్యటనపై మంత్రి లక్ష్మీ హెబ్బాళ్కర్ స్పష్టీకరణ

కోలారులో మీడియాతో మాట్లాడిన మహిళా శిశు సంక్షేమ శాఖ మంత్రి లక్ష్మీ హెబ్బాళ్కర్, ఎమ్మెల్యేలు ఢిల్లీకి వెళ్లిన అంశంపై తనకు పూర్తి సమాచారం లేదన్నారు. పవర్ షేరింగ్ అంశాన్ని పార్టీ హైకమాండ్‌నే నిర్ణయిస్తుందన్నారు.

ప్రస్తుతం సీఎం సిద్దరామయ్య, కేపీసీసీ అధ్యక్షుడు డీకే శివకుమార్ సమర్ధవంతంగా పని చేస్తున్నారని ఆమె పేర్కొన్నారు. తాను కాంగ్రెస్ అధ్యక్షుడు ఖర్గేతో తన శాఖకు సంబంధించిన అంశాలపైనే చర్చించానని, రాజకీయ అధికార మార్పిడి విషయమై మాట్లాడలేదని స్పష్టం చేశారు.

అదేవిధంగా గృహలక్ష్మి పథకం కింద సెప్టెంబర్, అక్టోబర్ నెలలకు సంబంధించిన పెండింగ్ మొత్తాలను త్వరలో లబ్ధిదారు

ల ఖాతాల్లో జమ చేస్తామని తెలిపారు.

నేటి నుంచి వైఎస్ జగన్ మూడు రోజుల పర్యటన | షెడ్యూల్ ప్రకటించిన వైసీపీ

YSR Praja News Telugu : అమరావతి: వైఎస్సార్సీపీ అధ్యక్షుడు, మాజీ ముఖ్యమంత్రి వైఎస్ జగన్మోహన్ రెడ్డి మంగళవారం నుంచి మూడు రోజులపాటు వైఎస్సార్ కడప జిల్లా పులివెందుల నియోజకవర్గంలో పర్యటించనున్నారు. ఈ పర్యటనకు సంబంధించిన పూర్తి షెడ్యూల్‌ను పార్టీ కేంద్ర కార్యాలయం సోమవారం విడుదల చేసింది.

మంగళవారం సాయంత్రం 4 గంటలకు జగన్ పులివెందులకు చేరుకుని క్యాంప్ కార్యాలయంలో ప్రజలతో సమావేశం కానున్నారు. సాయంత్రం 7 గంటల వరకు ప్రజాదర్బార్ నిర్వహించి, ఆ రాత్రి అక్కడే బస చేయనున్నారు.

బుధవారం ఉదయం 9 గంటలకు పులివెందులలోని వాసవి ఫంక్షన్ హాల్‌లో జరిగే వివాహానికి హాజరవుతారు. అనంతరం బ్రాహ్మణపల్లి గ్రామానికి వెళ్లి అరటి తోటలను పరిశీలించి, అక్కడి రైతులతో ముఖాముఖీ మాట్లాడతారు. తరువాత లింగాల మాజీ సర్పంచ్ మహేష్ రెడ్డి కుటుంబాన్ని పరామర్శిస్తారు. ఆపై వేల్పుల గ్రామంలోని లింగాల రామలింగారెడ్డి నివాసానికి వెళ్లనున్నారు.

పర్యటనలో భాగంగా బుధవారం కూడా క్యాంప్ కార్యాలయంలో సాయంత్రం వరకు ప్రజాదర్బార్ నిర్వహించనున్నారు. ఆ రాత్రి కూడా పులివెందులలోనే బస చేస్తారు.

గురువారం ఉదయం 8 గంటలకు పులివెందుల నుంచి తిరుగు ప్రయాణమవుతారని పార్టీ వర్గాలు తెలిపాయి

తెలంగాణలో 3.50 లక్షల మహిళలకు రూ.304 కోట్ల వడ్డీ లేని రుణాలు

YSR Praja News : హైదరాబాద్: రాష్ట్రవ్యాప్తంగా స్వయం సహాయక సంఘాలకు చెందిన 3.50 లక్షల మంది మహిళలకు రూ.304 కోట్ల వడ్డీ లేని రుణాలను మంగళవారం పంపిణీ చేయనున్నట్లు డిప్యూటీ ముఖ్యమంత్రి భట్టి విక్రమార్క వెల్లడించారు. ఈ కార్యక్రమాన్ని రాష్ట్రంలోని అన్ని అసెంబ్లీ నియోజకవర్గ కేంద్రాల్లో ఒకేసారి నిర్వహించాలని అధికారులను ఆయన ఆదేశించారు.

ఈ రుణాల పంపిణీ కార్యక్రమంపై ముందస్తుగా మంత్రులు, ఎమ్మెల్యేలకు సమాచారం అందించి సమన్వయం చేయాలని చీఫ్ సెక్రటరీ రామకృష్ణారావు, సెర్ప్ సీఈవో దివ్య దేవరాజన్‌కు సూచించారు. ప్రతి నియోజకవర్గంలో మండల సమాఖ్యలు, గ్రామ సమాఖ్యల ప్రతినిధులు తప్పనిసరిగా పాల్గొనేలా చర్యలు తీసుకోవాలని పేర్కొన్నారు.

ఈ అంశంపై సోమవారం సచివాలయం నుంచి జిల్లా కలెక్టర్లతో వీడియో కాన్ఫరెన్స్ నిర్వహించారు. ఈ సందర్భంగా డిప్యూటీ సీఎం మాట్లాడుతూ, గత ప్రభుత్వం వడ్డీ లేని రుణాల పథకాన్ని నిర్లక్ష్యం చేసిందని, తమ ప్రభుత్వం అధికారంలోకి వచ్చిన తర్వాత ఈ పథకాన్ని మళ్లీ విస్తృతంగా అమలు చేస్తోందని తెలిపారు.

ఇప్పటికే పలు దఫాలుగా స్వయం సహాయక సంఘాల సభ్యులకు రుణాలు మంజూరు చేసినట్లు వెల్లడించారు. తాజా దఫాలో మరోసారి భారీ మొత్తంలో రుణాలు విడుదల చేస్తున్నట్లు తెలిపారు. మహిళల్లో ఆర్థిక భరోసా పెరిగిందని, ఆత్మవిశ్వాసం మరింత బలపడిందని ఆయన అన్నారు.

ఇక రాష్ట్రంలో ఇటీవల నిర్వహించిన చీరల పంపిణీ కార్యక్రమం విజయవంతంగా జరిగిందని గుర్తు చేశారు. నాణ్యమైన డిజైన్‌తో కూడిన చీరలను మహిళలకు అందించినందుకు జిల్లా కలెక్టర్లను ఆయన అభినందించారు. ప్రతి గ్రామానికి “ఇందిరమ్మ చీరలు” చేరేలా అధికారులు ప్రత్యేక శ్రద్ధ తీసుకున్నారని పేర్కొన్నారు.

ఈ వీడియో కాన్ఫరెన్స్‌లో మంత్రి సీతక్క, చీఫ్ సెక్రటరీ రామకృష్ణారావు, ఆర్థిక శాఖ ముఖ్యకార్యదర్శి సందీప్ కుమార్ సుల్తానియా, సెర్ప్ సీఈవో దివ్య దేవరాజన్ పాల్గొన్నారు.

వికారాబాద్ DCC అధ్యక్షుడిగా ధారసింగ్ – అభినందనలు తెలిపిన దొరశెట్టి సత్యమూర్తి

YSR Praja News Telugu : వికారాబాద్:

వికారాబాద్ జిల్లా కాంగ్రెస్ కమిటీ (DCC) అధ్యక్షునిగా నియమితులైన ధారసింగ్ గారికి కాంగ్రెస్ పార్టీ సీనియర్ నాయకులు దొరశెట్టి సత్యమూర్తి హృదయపూర్వక శుభాకాంక్షలు తెలిపారు.

ఈ సందర్భంగా సత్యమూర్తి మాట్లాడుతూ, పార్టీ బలోపేతానికి ధారసింగ్ నాయకత్వం ఎంతో కీలకమని పేర్కొన్నారు. జిల్లా స్థాయిలో కాంగ్రెస్ పార్టీని మరింత బలపరచడం, కార్యకర్తల్లో ఉత్సాహం నింపడం ఆయన లక్ష్యమని అభిప్రాయపడ్డారు.

ధారసింగ్ నియామకం వికారాబాద్ జిల్లాలో కాంగ్రెస్ శ్రేణుల్లో నూతన ఉత్సాహాన్ని తీసుకొచ్చిందని, రాబోయే రోజుల్లో పార్టీ కార్యక్రమాలు మరింత ప్రజలకు చేరువవుతాయనే నమ్మకం వ్యక్తం చేశారు.