YSR Praja News Telugu : హైదరాబాద్: “మైనార్టీల ఓట్లు కావాలి… కానీ వారి ఆత్మగౌరవం అక్కర్లేదా?” అంటూ కాంగ్రెస్ ప్రభుత్వంపై తెలంగాణ స్టేట్ మైనార్టీ హక్కుల పోరాట సమితి (TSMHPS) రాష్ట్ర అధ్యక్షులు అబ్దుల్ వాహాబ్ తీవ్రస్థాయిలో మండిపడ్డారు. కాంగ్రెస్ పాలనలో మైనార్టీలకు జరుగుతున్న అన్యాయంపై సంచలన ప్రకటన విడుదల చేస్తూ, ముఖ్యమంత్రి రేవంత్ రెడ్డి వైఖరిని బహిరంగంగా ప్రశ్నించారు.
రాజాసింగ్ పేరు చెబితేనే భయం ఎందుకు?
గతంలో కేసీఆర్ ప్రభుత్వ హయాంలో వివాదాస్పద వ్యాఖ్యలపై కఠిన చర్యలు తీసుకున్నారని గుర్తు చేసిన అబ్దుల్ వాహాబ్, నేటి కాంగ్రెస్ ప్రభుత్వం మాత్రం రాజాసింగ్ పేరు వినగానే వెనక్కి తగ్గుతోందని ఆరోపించారు.
“ప్రవక్తపై అనుచిత వ్యాఖ్యలు, బెయిల్ నిబంధనల ఉల్లంఘనలు, మత విద్వేషాల రెచ్చగొట్టడం జరుగుతున్నా… పీడీ యాక్ట్ ఎందుకు ప్రయోగించడంలేదు?” అని ప్రభుత్వ చిత్తశుద్ధిపై సందేహం వ్యక్తం చేశారు.
రెండు ప్రమాణాలు – ఒకే చట్టమా?
కొంతమంది నేతల విషయంలో వేగంగా ఫిర్యాదులు, కమిషన్లు… మరికొందరి విషయంలో మౌనం ఎందుకని TSMHPS నిలదీసింది. క్షమాపణల అనంతరం కూడా మానవ హక్కుల కమిషన్లకు ఫిర్యాదులు చేసే ధోరణిని ప్రస్తావిస్తూ, అదే ధైర్యం రాజాసింగ్ అరెస్టుకు ఎందుకు కనిపించడంలేదని ప్రశ్నించింది.
సంచలన సవాల్
“రాజకీయ ప్రయోజనాల కోసం ఎంపికైన లక్ష్యాలపై మాత్రమే పోరాటాలా? నిజంగా చట్టసామ్యంపై నమ్మకం ఉంటే రాజాసింగ్ అరెస్టుకు ఎందుకు డిమాండ్ చేయడం లేదు?” అంటూ అబ్దుల్ వాహాబ్ సూటిగా సవాల్ విసిరారు. లోపాయికారీ ఒప్పందాలున్నాయా? కేవలం డ్రామాలేనా? అని తీవ్ర విమర్శలు గుప్పించారు.
కాంగ్రెస్ ప్రభుత్వానికి అల్టిమేటం
ఒకరికి ఒక న్యాయం… మరొకరికి మరో న్యాయం అన్న ద్వంద్వ విధానాన్ని వెంటనే వీడాలని TSMHPS హెచ్చరించింది. “రేవంత్ రెడ్డి ప్రభుత్వంలో రాజాసింగ్కు ప్రత్యేక రక్షణ కల్పిస్తున్నారా?” అనే అనుమానాన్ని ప్రజల్లోకి తీసుకెళ్తామని స్పష్టం చేసింది.
న్యాయం, చట్టపాలన అన్న మాటలు కేవలం నినాదాలుగా కాకుండా చర్యల్లో కనిపించాలంటూ ప్రభుత్వాన్ని హెచ్చరిస్తూ ప్రకటన ముగిసింది.
