YSR Praja News Telugu : హైదరాబాద్: ఫోన్ ట్యాపింగ్ వ్యవహారాన్ని రాజకీయ ప్రయోజనాల కోసం ఉపయోగిస్తూ కాలక్షేపం చేస్తున్నారని మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ తీవ్ర విమర్శలు చేశారు. సిట్ విచారణ పూర్తైన అనంతరం తెలంగాణ భవన్లో మీడియాతో మాట్లాడిన ఆయన, ఇది ప్రజల దృష్టిని మళ్లించేందుకు నడుస్తున్న డ్రామా మాత్రమేనని వ్యాఖ్యానించారు.
ప్రభుత్వం లీకుల రాజకీయాలను ప్రోత్సహిస్తున్నదని ఆరోపించిన కేటీఆర్, నిజమైన సమస్యలను పక్కదారి పట్టించేందుకే ఈ తరహా కథనాలు వెలువడుతున్నాయని అన్నారు. సింగరేణి టెండర్లలో అవకతవకలపై ఆరోపణలు వచ్చినప్పటికీ ఇప్పటి వరకు ప్రభుత్వం స్పందించకపోవడం అనుమానాలకు తావిస్తోందన్నారు.
సిట్ అధికారులను ప్రశ్నించినట్లు వెల్లడించిన కేటీఆర్, ప్రస్తుతం ప్రభుత్వంలో కూడా ఫోన్ ట్యాపింగ్ జరుగుతోందా లేదా అనే అంశంపై స్పష్టమైన సమాధానం రాలేదన్నారు. తమపై వ్యక్తిగతంగా నిందలు మోపే ప్రయత్నం జరుగుతోందని, ఇలాంటి ప్రచారాలు ప్రజల్లో తప్పుడు అభిప్రాయాలను కలిగిస్తున్నాయని తెలిపారు.
తనకు మద్దతుగా నిలిచిన పార్టీ నాయకత్వానికి, సీనియర్ నేతలకు, కార్యకర్తలకు కృతజ్ఞతలు తెలిపారు. పోలీసుల విచారణకు పూర్తిగా సహకరించానని చెప్పారు. సిట్ ఎదుట తాను స్పష్టంగా ప్రశ్నలు వేసినట్లు తెలిపారు. మీడియాలో ప్రచారం అవుతున్న కొన్ని కథనాలు అసత్యమని పోలీసులు కూడా ఖండించారని పేర్కొన్నారు.
ఫోన్ కాల్స్ ట్యాప్ అయ్యాయనే ఆరోపణలపై సిట్ స్పష్టత ఇవ్వకపోవడం విచారణ పారదర్శకతపై సందేహాలు పెంచుతోందన్నారు. బాధ్యత గల ప్రతిపక్షంగా ఏ విచారణకైనా సిద్ధంగా ఉన్నామని, అవసరమైతే ఎన్ని సార్లు అయినా హాజరవుతామని స్పష్టం చేశారు.
సింగరేణి టెండర్ల వ్యవహారంలో సీఎం, మంత్రుల మధ్య జరుగుతున్న లావాదేవీలపై హరీష్ రావు చేసిన ఆరోపణలకు ఇప్పటికీ సమాధానం లేదని గుర్తు చేశారు. వందల కోట్ల రూపాయల టెండర్లపై ఆరోపణలు వస్తే సిట్ ఎందుకు ఏర్పాటు చేయడం లేదని ప్రశ్నించారు. చట్టం అందరికీ సమానంగా వర్తించాలన్నారు.
వ్యక్తిగత ప్రతిష్టకు భంగం కలిగించేలా జరుగుతున్న ప్రచారంపై ఆవేదన వ్యక్తం చేసిన కేటీఆర్, మీడియా వాస్తవాలను ప్రజల ముందు ఉంచాలని కోరారు. తనను మాత్రమే విచారణకు పిలవడం రాజకీయ ఉద్దేశ్యాలతోనే జరుగుతోందని అన్నారు. మరోసారి విచారణకు పిలిస్తే సహకరిస్తానని కూడా వెల్లడించారు.
ఈ పరిణామాలు తెలంగాణ రాజకీయాల్లో మరోసారి తీవ్ర చర్చకు దారి తీస్తున్నాయి. రాబోయే రోజుల్లో సిట్ విచారణ దిశ ఏవైపు సాగుతుందన్నదానిపై రాజకీయ వర్గాల్లో ఆసక్తి నెలకొంది.
